1. Onderwyswitskrif 6 oor Onderwys vir Spesiale Behoeftes noem dat inklusie handel oor die ondersteuning van alle leerders, onderwysers en die stelsel as geheel, sodat die volle omvang van leerbehoeftes gedek kan word. ‘n Groot getal leerders vorder steeds nie op skool as gevolg van die vele leerstoornisse wat hulle ervaar nie.
2. As deel van ‘n voortgesette strategie om nuwe en effektiewe metodes te vind om onderwysers te ondersteun in hulle hantering van ‘n verskeidenheid leerstoornisse in die klaskamer, het die Wes-Kaap Onderwysdepartement ‘n CD-ROM oor Leerstoornisse vrygestel.
3. Die doel van die CD-ROM is om, in samewerking met alle ander ondersteuning tot beskikking van onderwysers, hulp te verleen met die individuele wyse waarop leerders leerstoornisse in die klas ervaar.
4. Die CD-ROM sal help om die onderwysers meer bewus te maak van sekere toestande en leerstoornisse. Met hierdie kennis gewapen, sal onderwysers in staat wees om sodanige leerders suksesvol te ondersteun sodat hulle ware voordeel kan put uit die onderrig en tot hulle maksimum kapasiteit kan ontwikkel.
5. Die inligting aangaande elke leerstoornis op hierdie CD-ROM ingesluit, is slegs vir onderwysdoeleindes, en moet nie gebruik word as plaasvervanger vir mediese advies, of om ‘n diagnose te maak of vir die beplanning van mediese behandeling nie. Dit kan onderwysers wel bewus maak van gevalle waar professionele hulp van Ondersteuningsdienste of van ‘n professionele medikus aangevra moet word. Onderwysers moet egter daarteen waak om hierdie inligting te gebruik om leerders op enige wyse te etiketteer of te brandmerk.
6. Die CD-ROM sluit onderwyswenke en -strategieë ter ondersteuning van die leerder in die klaskamer in.

    • Hierdie onderwyswenke en -strategieë behoort geïnkorporeer te word by en deel te vorm van die Leerprogram in ‘n fase.

    • Aangesien alle leerders uniek is, is die onderwyswenke en -strategieë wat op hierdie CD-ROM voorgestel word hoegenaamd nie ‘n een-grootte-pas-almal-benadering nie, maar eerder algemene idees wat voorgestel word en wat aangepas moet word om, waar van toepassing, in individuele leerders se behoeftes te voorsien. Sodra die behoefte ontstaan aan sodanige individuele planne ter ondersteuning van ‘n spesifieke leerder, behoort dit saamgestel te word as ‘n Individuele Onderwysprogram (IOP) en in die Leerderprofiel gehou word.

    • Individuele Onderwysprogramme vir leerders met spesiale behoeftes behoort met die ondersteuning van die skool se Onderwyserondersteuningspan en die OBOS se Distrikondersteuningspan geskryf te word.
7. Die CD-ROM is verkrygbaar vanaf Edumedia teen R20.00 per kopie (verpakking en posgeld uitgesluit). ‘n Bestelvorm is vir u gerief hierby aangeheg.
8. Terugvoer aangaande hierdie CD-ROM, positief sowel as negatief, sal verwelkom word.
Kontakbesonderhede:
Me Kobie Kitshoff
Kkitshoff@pgwc.gov.za
Fax 021 467 2620
9. Daar word vertrou dat die inligting op hierdie CD-ROM ‘n positiewe bydrae sal lewer tot onderwysers se beplanning ten opsigte van akademiese prestasie deur alle leerders, en dat voorsiening gemaak sal word vir leerders se affektiewe behoeftes deur andersheid te aanvaar en ooreenkomste te vier.


GETEKEN: JP RAULT-SMITH
HOOF: ONDERWYS
DATUM: 2005:09:30

Bestelvorm  (grootte: 65 KB)