| 1. |
Ingevolge artikel 3(4)(I) en 7 van die Wet op Nasionale Onderwysbeleid, 1996 (Wet 27 van 1996) en artikel 6(A) en 61 van die Suid-Afrikaanse Skolewet (Wet 84 van 1996) het die Minister van Onderwys, in samewerking met die Raad van Onderwysministers, die beleidsdokument (gepubliseer in Staatskoerant 27819 van 20 Julie 2005) goedgekeur, wat die regulasies, reëls en maatreëls beskryf vir die toekenning van die Nasionale Senior Sertifikaat (NSS) op vlak 4 van die Nasionale Kwalifikasieraamwerk.
|
| 2. |
Alle leerders wat in 2006 in graad 10 is, sal die NSS vir graad 10 tot 12 (Algemeen) aanbied. Hierdie groep leerders sal in Desember 2008 die eerste kandidate wees om die NSS te verwerf, mits hulle die uitgangsvlak-leeruitkomste bereik soos gestipuleer in die Nasionale Kurrikulumverklaring (NKV) graad 10 tot 12 (Algemeen).
|
| 3. |
Voltydse, deeltydse en privaatkandidate sal hierdie kwalifikasie aanbied.
|
| 4. |
Onsuksesvolle Senior Sertifikaat-kandidate in die Senior Sertifikaat-eksamen van 2007 en deeltydse kandidate wat reeds ingeskryf is vir die Senior Sertifikaat sal tot Maart 2011 toegelaat word om die Senior Sertifikaat-program te voltooi. Alle Senior Sertifikaat-vakke wat voor 2006 suksesvol afgehandel is, sal tot Maart 2011 erken word vir die uitreiking van die Senior Sertifikaat.
|
| 5. |
Vanaf 1 Januarie 2006 sal geen nuwe inskrywings van voltydse of deeltydse leerders in graad 10 aanvaar word vir enige vakke wat uit Verslag 550 (huidige lys vakke wat vir die Senior Sertifikaat aangebied word) gekies is nie.
|
| 6. |
Die nasionale Departement van Onderwys het die WKOD in kennis gestel dat afskrifte van hierdie nuwe beleid met betrekking tot die NSS aan skole gepos sal word. Dit is die plig van hoofde van inrigtings om bekend te word met die inhoud van hierdie nuwe beleid en om alle opvoeders en graad 10-leerders dienooreenkomstig in te lig.
|
GETEKEN: J.P. RAULT-SMITH
HOOF: ONDERWYS
DATUM: 2005:08:17
|