1. Ten einde die verbetering van standaarde in die onderskeie Senior Sertifikaat-eksamens te verseker en om voor te berei vir die implementering van die Nasionale Senior Sertifikaat (NSS) in 2008, sal die nasionale vraestelle in die Senior Sertifikaat-eksamen van 2006 uitgebrei word om die volgende vyf vakke in te sluit:

  • Aardrykskunde HG & SG

  • Bedryfsekonomie HG & SG

  • Ekonomie HG & SG

  • Landbouwetenskap HG & SG

  • Afrikaans Tweede Taal HG & SG
2. Die Departement van Onderwys wag dus aansoeke in om poste vir nasionale eksaminators en interne moderators vir bogenoemde vakke, sowel as Geskiedenis HG & SG en Engels Tweede Taal HG & SG.

Vakkenners, d.w.s. opvoeders, kurrikulumadviseurs, senior kurrikulumbeplanners en moderators wat beskik oor die nodige kennis en kundigheid met betrekking tot die Senior Sertifikaat, word uitgenooi om aansoek te doen. Ten einde oorweeg te word om op hierdie panele te dien, moet die aansoeker oor die volgende beskik:

  • ten minste ‘n erkende 3-jaar-, na-matrikulasiekwalifikasie, wat die betrokke vak op derdejaarsvlak insluit;

  • omvangryke ervaring as ‘n opvoeder in die betrokke vak of in ‘n verwante veld en ten minste 2 jaar se onderwyservaring gedurende die afgelope 5 jaar op Senior Sertifikaat-vlak; en

  • ondervinding as ‘n nasiener.

Omvangryke kennis en ondervinding in onderwys, leer en assessering op sekondêreskoolvlak, ondervinding in die opstel van vraestelle vir die Senior Sertifikaat-eksamen en kennis van die nasionale kurrikulumverklarings vir die VOO-sertifikaat sal sterk aanbevelings wees.

Daar sal van die suksesvolle aansoekers vereis word om in ‘n eksamineringspaneel te werk ten einde die vraestelle op te stel en om die nasienmemorandums voor te berei vir die finale en aanvullende eksamens. Daar sal van interne moderators vereis word om vraestelle objektief en krities na te gaan met betrekking tot die dekking van die sillabus en deurlopende standaard. Daar sal van die eksaminators en interne moderators verwag word om somtyds na Pretoria te reis ten einde die funksies wat verband hou met die opstel van die eksamenvraestelle uit te voer. Daar sal ook van die suksesvolle aansoekers verwag word om ‘n kontrak vir ‘n minimum van twee jaar en ‘n vertroulikheidsooreenkoms te onderteken.
3. Aansoekers word vriendelik versoek om alle navrae aangaande hierdie geadverteerde poste te rig aan mnr SNP Sishi, by telefoonnommer 012 312 5717.
4. Die nasionale Departement van Onderwys is verbind tot die voorsiening van gelyke geleenthede en die toepassing van indiensneming op grond van regstellende aksie. Aansoeke moet op die Z83-vorm ingedien word, wat verkrygbaar is van enige staatsdiensdepartement en moet vergesel wees van ‘n omvattende CV en gewaarmerkte afskrifte van kwalifikasies.
5. ‘n Voornemende aansoeker wie se nabye familielid die Senior Sertifikaat-eksamen sal aflê waarvoor die voornemende aansoeker beoog om aansoek te doen, MAG NIE AANSOEK DOEN NIE.
6. Die Departement van Onderwys het ook die advertensies vir hierdie poste in die Sondagkoerante van 07 Agustus 2005 geplaas. Die verwysingsnommer is S9572 en die sluitingsdatum vir aansoeke is 05 September 2005 .
7. Aansoekers moet hulle aansoeke pos na die onderstaande adres, NIE aan die WKOD nie: 
Die Direkteur-generaal
Personeeldienste
Departement van Onderwys
Privaatsak X895
PRETORIA
0001


GETEKEN: J.P. RAULT-SMITH
HOOF: ONDERWYS
DATUM: 2005:08:17

Z83-vorm  (grootte: 29 KB)