| 1. |
Die aangehegte rooster vir die BOOV-vlak 4-eksamen in Oktober 2005 is van die Nasionale Departement van Onderwys ontvang. Die eksamen sal op 12 Oktober 2005 ‘n aanvang neem en op 1 November 2005 ten einde loop. Elke leerarea sal van 14:00 tot 17:00 geskryf word. Aangesien hierdie assessering `n nasionale proses is, is die datums en tye landswyd van toepassing en geen afwyking van die rooster kan toegelaat word nie.
|
| 2. |
Soos in die verlede sal die eksamenproses deur amptenare van die OBOS’e en Hoofkantoor en verteenwoordigers van UMALUSI gemonitor word.
|
| 3. |
Indien die assessering op die perseel van `n hoofstroomskool plaasvind, moet die sentrumbestuurder vooraf reëlings tref vir die gebruik van die kluis, die administrasiegebou, klaskamers, ablusiegeriewe, ens.
|
| 4. |
Sentrums moet verseker dat hulle hoofopsieners en opsieners goed opgelei en bevoeg is om die administrasie van die eksamen effektief te behartig.
|
| 5. |
Ten einde in staat te wees om die administratiewe sake te bestuur, moet sentrumbestuurders voor die aanvang en aan die einde van elke assesseringsessie by die eksamensentrums wees.
|
| 6. |
Geen persoon mag die eksamenlokaal binnegaan tensy hy of sy 'n wettige identifikasiekaart getoon het nie.
|
| 7. |
Sentrumbestuurders word ook versoek om
|
| 7.1 |
so gou as moontlik die rooster aan al hulle opvoeders en kandidate beskikbaar te stel sodat hulle finale reëlings vir die eksamen kan tref.
|
| 7.2 |
al hulle kandidate daaraan te herinner dat hulle identiteitsdokumente en toelatingsbriewe voor die aanvang van elke assesseringsessie getoon moet word.
|
| 7.3 |
namens die Wes-Kaap Onderwysdepartement al hulle kandidate voorspoed met die assessering toe te wens. |
GETEKEN: J.P. RAULT-SMITH
HOOF: ONDERWYS
DATUM: 2005:08:08
|