| 1. |
OBOS'e word hiermee voorsien van 'n analise van die uitslae per vraestel per vak wat in 'n spesifieke OBOS-distrik in die Wes-Kaapprovinsie in die 2004 Senior Sertifikaat-eksamen behaal is. |
| 2. |
Tydens die nasienproses in Desember is die punte wat deur elke kandidaat in elke vraag in elke vraestel behaal is, vasgelê ten einde die Wes-Kaap Onderwysdepartement (WKOD) in staat te stel om 'n analise aan elke skool te voorsien, en om moontlike foute soos wanneer kandidate te veel vrae of 'n foutiewe kombinasie van vrae beantwoord, te identifiseer. Hierdie statistieke sal deur eksamineringspanele benut word om die gehalte en toepaslikheid van elk van die vrae en die algemene standaard van die vraestelle te assesseer. |
| 3. |
Alhoewel hierdie inligting vertroulik is, moet hoofkurrikulumadviseurs (HKA's) die relevante statistieke met die kurrikulumadviseurs (KA's) vir elke vak deel. Hierdie statistieke dui die gemiddeld vir die OBOS en die provinsie vir elke vraag vir elke vraestel per vak aan, asook die provinsiale gemiddeld vir die vraestel as geheel. ’n Afskrif van die inligting wat aan elke skool in 'n OBOS gestuur is, is ook ingesluit. |
| 4. |
KA's moet versoek word om die statistieke te bestudeer en afdelings van die sillabus wat nie goed beantwoord is deur kandidate in hulle OBOS nie, identifiseer. Die bevindings moet dan met die betrokke opvoeders bespreek word en skole wat indiensopleiding rakende spesifieke aspekte van die sillabus benodig, moet geïdentifiseer word. KA's kan ook die inligting gebruik om opvoeders by skole wat uitstekend in dieselfde afdelings gepresteer het, te identifiseer en hulle versoek om die opleiding aan te bied. |
| 5. |
KA's moet ook versoek word om ’n kort skriftelike verslag saam te stel oor hoe hulle geïdentifiseerde probleme sal aanspreek en om aan te dui of ondersteuning benodig word. HKA's word versoek om waar die OBOS ’n KA het, voor die einde van die eerste kwartaal van 2005 een verslag per vak by die Direkteur: Kurrikulumontwikkeling in te dien. |
| 6. |
Die WKOD vertrou dat die voorsiening van hierdie statistieke KA's sal help om die gehalte van onderrig in elke vak in hulle OBOS'e te verbeter deur die identifisering van spesifieke swak areas en deur onderwysers van advies rakende remediërende aksie te bedien. |
GETEKEN: J.P. RAULT-SMITH
HOOF: ONDERWYS
DATUM: 2005:01:19
|