1. Die WKOD het groot waarde daaraan om leerders bloot te stel aan loopbaangeleenthede, en die bogenoemde loopbaanuitstalling, wat ‘n integrale deel uitmaak van die Fees van die Lerende Kaap, skep ‘n ideale geleentheid vir sulke blootstelling.
2. Skole word aangemoedig om gebruik te maak van hierdie geleentheid om graad 9-, 11- en 12-leerders na die uitstalling te neem sodat hulle vertroud kan raak met ‘n groot aantal beroepe in ‘n verskeidenheid velde en ook kennis van die relevante studiekeuses by verskillende tersiêre inrigtings kan opdoen. Lewensoriëntering- en Beroepsvoorligtingsonderwysers sal die kans kry om met al die uitstallers te skakel vir toekomstige verwysings.
3. Om van hierdie geleentheid ‘n waardevolle leerervaring te maak, word graad 9-leerders aangemoedig om ‘n uitdrukstuk van hulle PACE-belangstellingsvraelys met hulle saam te bring en om dit as gids te gebruik wanneer hulle ondersoek instel na hulle loopbaan- en vakkeuses. Hulle bevindings sou kon dien as ‘n beginpunt vir verdere ontdekking en bespreking in die klaskamer.
4. Graad 11- en 12-leerders moet die vraelys voltooi wat aan hulle uitgedeel word as hulle by die uitstalsaal arriveer. Die doel van hierdie vrae is om leerders aan te moedig en te help om die uitstalling op ‘n gefokusde en doelmatige manier te ondersoek. Hierdie geleentheid kan nie slegs die leerder se beroepskeuse be?nvloed nie, maar ook belangstelling wakker maak en rigting gee aan leerders wat nog nie oor hulle toekoms sekerheid het nie.
5. Prinsipale word versoek om die inhoud van hierdie minuut onder die aandag van hulle Lewensoriëntering- en Beroepsvoorligtingsonderwysers te bring. Ter wille van die geordende aankoms van skole by die Kaapstadse Internasionale Konferensiesentrum word skole wat graag teenwoordig wil wees versoek om die aangehegte antwoordstrokie te voltooi en dit te pos aan die PACE-projekbestuurder, me BJ Prince, by Hoofkantoor. Dit moet haar teen 22 Julie 2005 bereik. Alternatiewelik mag dit na haar faksnommer gefaks word. 021 467 2258 of aan bprince@pgwc.gov.za teen daardie datum ge-epos word.


GETEKEN: V.W. DEACON
HOOF: ONDERWYS
DATUM: 2005:06:22

Lerende Kaap Fees: Inligtingsblad  (grootte: 29 KB)
Antwoordstrokie  (grootte: 6 KB)