1. Aangesien Spesiale Skole wat graad 4 tot 6 klasse aanbied, reeds hulle begrotings vir die aankoop van Leer- en onderrigondersteuningsmateriaal (LOOM) ontvang het, word hulle hiermee versoek om Wiskunde-, Wetenskap- en Tegnologiestelle, een waarvan aan elke Wes-Kaap Onderwysdepartement (WKOD) gewone openbare skool met Intermediêre Fase-leerders verskaf is, self direk van die verskaffer aan te koop.
2. Die items in die stel, wat toegespits is op die konseptuele ontwikkeling van leerders, kan aangewend word vir onderrig ter bereiking van die leeruitkomste vir Wiskunde, Wetenskap en Tegnologie, met die klem op Tegnologie, asook vir sekere leeruitkomste in verwante leerareas. In die geval van enige onsekerheid oor of leerders by 'n spesifieke skool baat sal vind by hierdie hulpbronne, kan prinsipale 'n afspraak met die Intermediêre Fase- of Tegnologieadviseur by hulle OBOS maak en voordat hulle 'n bestelling plaas na die inhoud van die stel kyk.
3. Opleiding in die gebruik van die stel sal soos volg deur die diensverskaffer, Supedi Trust, voorsien word:
3.1 As gevolg van finansiële beperkings sal slegs een opvoeder per skool opgelei word.
3.2 Opleiding sal deur die onderskeie OBOS'e gereël word en vroeg in April plaasvind.
3.3 Daar sal 'n opleidingsessie wees by elk van twee verskillende plekke in elke OBOS-distrik.
3.4 Indien skole 'n aansienlike afstand van enigeen van hierdie opleidingsplekke geleë is, sal die betrokke opvoeder op 'n later datum opleiding van die Tegnologie-kurrikulumadviseur ontvang.
3.5 Spesiale skole wat beoog om so 'n stel aan te koop, moet so gou as moontlik met die Tegnologieadviseur by hulle OBOS in verbinding tree om inligting oor die opleidingsessies te bekom.
4. Prinsipale word versoek om opleiding in die gebruik van hierdie LOOM te inkorporeer by hulle personeelontwikkelingsplanne vir Intermediêre Fase-opvoeders.
5. Intermediêre Fase-kurrikulumadviseurs by OBOS'e sal gedurende die jaar verdere ondersteuning bied.
6. Daar moet gelet word op die volgende rakende die versorging van die stelle:
6.1 Die prinsipaal moet toesien dat al die items met die skool se naam gemerk word en in die inventaris geskryf word.
6.2 Aangesien die stel deur al die Intermediêre Fase-opvoeders gedeel moet word, sal 'n doeltreffende moniterings- en kontrolestelsel noodsaaklik wees.
6.3 Die stel moet gebêre word op 'n veilige plek wat maklik toeganklik is vir opvoeders.
6.4 'n Lid van die Skoolbeheerspan moet aangewys word om die voorsiening van items aan Intermediêre Fase-opvoeders te beheer.
7. Die aangehegte bestelvorm moet voltooi en direk aan N Steenkamp, Supedi, Faks: 011 672 8365, E-pos: I Bishop (ibishop@intekom.co.za) gestuur word en nie aan die WKOD nie.
8. Indien prinsipale enige navrae aangaande die stel en die gebruik daarvan het, kan hulle met die Intermediêre Fase- of Tegnologiekurrikulumadviseur by hulle OBOS'e in verbinding tree.


GETEKEN: J.P. RAULT-SMITH
HOOF: ONDERWYS
DATUM: 2005:03:11

Bestelvorm  (grootte: 10 KB)