1. Lewensoriëntering, ‘n basiese vakaanbieding in die VOO-band waaraan alle leerders in graad 10 tot 12 blootgestel sal word, het vier fokusareas, naamlik Persoonlike Welsyn, Burgerskapopvoeding, Ontspanning en fisiese aktiwiteit en Loopbane en Loopbaankeuses.
2. Opleidingskursusse in twee van hierdie areas, naamlik Persoonlike Welsyn en Loopbane en Loopbaankeuses, sal gedurende die Maart/April 2005-skoolvakansie aangebied word.
2.1 Die kursus in Persoonlike Welsyn, wat die WKOD se opleiding in die Nasionale Kurrikulumverklaring (NKV) ondersteun wat gedurende die Junie 2005-vakansie aangebied sal word, sal die inhoud dek wat op hierdie uitkoms van toepassing is en sal op 31 Maart 2005 en op 1 en 2 April 2005 (3 dae) aangebied word. Dit sal beide ‘n papiergebaseerde en CD-ROM-toepassing hê en alle skole met toepaslike rekenaartoerusting sal van ‘n elektroniese weergawe, ‘n onderwyserhulpbronhandleiding en ‘n leerderboek voorsien word.
2.2 Die PACE-“Adviseer en Verwys”-kursus, wat ‘n geakkrediteerde kursus op NKR­vlak 5 is, sal vanaf 29 tot 31 Maart 2005 (3 dae) aangebied word. Die doel van die kursus is om onderwysers te bemagtig om leerders te adviseer en hulle te lei om ingeligte vak- en loopbaankeuses te maak. Dit ondersteun voorts die implementering van sekere assesseringstandaarde in Uitkoms 4 (VOO) en Uitkoms 5 (AOO) en sal bystand verleen met onderrig en leer in Lewensoriëntering. Die aanbieding sal beide papier- en rekenaargebaseerd wees. Deelnemers sal 6 krediete by voltooiing van die portefeulje kry en sal opvolgtake vir hulle portefeuljes moet voltooi.
3. In beide gevalle mag slegs een onderwyser per skool die eerste rondte van opleiding bywoon. Verwys asseblief na Bylae A vir die korrekte lokaal in die geval van die Persoonlike Welsynkursus en na Bylae B in die geval van die PACE-“Adviseer en Verwys”-kursus. Albei kursusse sal stiptelik om 8:30 in die oggend begin en sal op al drie opleidingsdae om 16:00 in die namiddag sluit. Let daarop dat slegs onderwysers wat die aanvanklike PACE-Loopbaanvoorligtingskursus bygewoon het, die geakkrediteerde PACE-“Adviseer en Verwys”-kursus mag bywoon.
4. Onderwysers sal vergoed word vir reisonkoste. Onderwysers wat beoog om vir hierdie onkoste te eis, moet die volgende inligting by die kursus beskikbaar hê:

  • PERSAL-nommer

  • Enjinkapasiteit en die jaarmodel van die voertuig wat gebruik is

  • Die kilometerafstand vanaf die skool tot by die lokaal
5. Onderwysers van plattelandse OBOS’e wat akkommodasie benodig, moet hulle eie reëlings tref. Geskikte bed-en-ontbyt-akommodasie word aanbeveel. Hierdie opvoeders moet hulle eise indien voordat hulle op die laaste dag van die kursus vertrek.
6. In die geval van albei kursusse word prinsipale versoek om die voltooide registrasievorms teen nie later nie as 14 Maart 2005 aan die Projekbestuurder, me BJ Prince te Hoofkantoor te pos, faks 021 467 2256 of e-pos Brenda Prins (bprince@pgwc.gov.za).
7. Bogenoemde kursusse sal weer gedurende Maart 2006 aangebied word. Onderwysers sal dan die geleentheid hê om die kursus wat hulle nog nie bygewoon het nie, by te woon. Bykomende PACE-loopbaanvoorligtingskursusse sal gedurende die tweede en derde kwartale van 2005 aangebied word aan Lewensoriënteringsonderwysers wat nie ‘n kursus gedurende 2004 bygewoon het nie.
8. Prinsipale van alle hoërskole word versoek om die inhoud van hierdie minuut onder die aandag van hulle Lewensoriënteringsonderwysers te bring. Die aangehegte toepaslike vraelys moet voltooi en teen nie later nie as 14 Maart 2005 per pos, faks 021 467 2258 of e-pos Brenda Prins (bprince@pgwc.gov.za) by die Projekbestuurder, me BJ Prince, by Hoofkantoor ingedien word.
9. Prinsipale word daaraan herinner dat bywoning van bogenoemde kursusse in ag geneem kan word wanneer onderwysers se GGBS'e voltooi word.


GETEKEN: J.P. RAULT-SMITH
HOOF: ONDERWYS
DATUM: 2005:03:02

Bylae A: Vraelys: Persoonlike Welsynkursus  (grootte: 45 KB)
Bylae B: Vraelys: PACE-“Adviseer en Verwys”-kursus  (grootte: 52 KB)