1. Die volgende logistieke reëlings is goedgekeur om te verseker dat die 2004-skooljaar op ‘n ordelike wyse ten einde loop.
2. Die Nasionale Minister van Onderwys het aangekondig dat die 2004 Senior Sertifikaat-eksamenuitslae vir alle provinsies op Woensdag 29 Desember 2004 aan skole bekendgemaak sal word en aan die media op Donderdag 30 Desember 2004.
3. Om te verseker dat die Wes-Kaap Onderwysdepartement die uitslae teen daardie datum gereed sal hê, moet die nasien van die eksamenskrifte op Woensdag 1 Desember 2004 begin.
4. Die vierde kwartaal eindig op Vrydag 3 Desember 2004 vir leerders en op Woensdag 8 Desember 2004 vir opvoeders (verwys na Omsendbrief 05/2004.)
5. Aangesien die laaste dag van skoolbywoning vir alle leerders van graad R tot 11 Vrydag 3 Desember 2004 is, moet die interne assessering aan die einde van die jaar soos volg geskied:
5.1 Graad R tot 7

Graad R- tot 7-opvoeders kan hulle dokumentasie vir Deurlopende Assessering (DASS) en hulle progressieskedules gedurende die laaste week van November 2004 finaliseer aangesien daar nie van hierdie leerders verwag word om eksamens te skryf nie.
5.2 Graad 8

Toetse wat in graad 8 deel van DASS uitmaak, moet tussen Donderdag 4 November 2004 en Dinsdag 23 November 2004 geskryf word.
5.3 Graad 9

Die Gemeenskaplike Take vir Assessering (GTA's) moet op die volgende wyse gehanteer word:

Afdeling A: Maandag 4 Oktober tot Vrydag 5 November 2004 gedurende normale skoolure, ter voorbereiding vir Afdeling B.

Afdeling B: Vanaf Maandag 8 November 2004 tot Maandag 22 November 2004 soos per nasionaal-verspreide rooster (verwys na Omsendbrief 35/2004).
5.2 Graad 10 en 11

In sekondêre skole kan die eksamens geskryf word in die loop van 'n maksimum van 14 dae. Die interne eksamens vir graad 10 en 11 moet tussen Donderdag 4 November 2004 en Dinsdag 23 November 2004 geskryf word om te verseker dat die nodige prosedures afgehandel is en die dokumentasie betyds gereed is vir die moderering en progressie wat teen Maandag 6 Desember 2003 deur die OBOS- multifunksionele spanne voltooi moet wees. Alle eksamenroosters moet vir finale goedkeuring by die betrokke OBOS-direkteur ingedien word.
6. Eksamenreëlings vir graad 12-leerders
6.1 Die Senior Sertifikaat-eksamens begin op Maandag 11 Oktober 2004 en eindig op Vrydag 19 November 2004 (verwys na Omsendbrief 26/2004).
6.2 Die laaste dag van skoolbywoning vir graad 12-leerders voor die aanvang van die Senior Sertifikaat-eksamen is Woensdag 6 Oktober 2004. Dit moet beklemtoon word dat kandidate onder die jurisdiksie van die skool bly totdat die eksamen op 19 November 2004 eindig.
7. DASS-prosedures
7.1 Leerderprofiele en portefeuljes moet beskikbaar wees vir moderering en progressie deur die OBOS-multifunksionele spanne aan die einde van die skooljaar.
7.2 Bewyse van assessering en die verslaghouding daarvan is die deurslaggewende faktore wanneer besluite ten opsigte van leerderprogressie aan die einde van die jaar geneem word.
7.3 Alle rolspelers moet die belangrikheid besef van geverifieerde, bygewerkte profiele en portefeuljes aangesien dit die leerder se vordering deur die jaar uitbeeld.
8. Leerderveiligheid aan die einde van die jaar
8.1 Elke leerder se veiligheid is ten alle tye van die uiterste belang. Skole word versoek om veiligheidsmaatreëls as 'n prioriteit met alle personeellede te bespreek wanneer die beplanning vir die einde van die jaar gedoen word.
8.2 Ouers van leerders en die skoolbeheerliggaam moet skriftelik in kennis gestel word van die reëlings vir die einde van die jaar en van die skool se veiligheidsplanne vir leerders.
8.3 Ouers van leerders moet in kennis gestel word as enige reëlings verander word en ook as hulle kinders hulle nie hou by die reëlings waarop ooreengekom is nie.
8.4 Die rolle, verantwoordelikhede, besluite, reëls en moontlike gevolge indien daar nie vir leerderveiligheid beplan word nie, moet aan alle opvoeders, leerders en ander rolspelers verduidelik word.
8.5 Diensverskaffers van die gemeenskap, bv. verkeersbeamptes, die munisipale polisie, skoolvervoerverskaffers en taxibestuurders, moet ingelig word oor die skool se planne vir die einde van die jaar sodat hulle, indien nodig, hulp kan verleen.
8.6 Riglyne moet vir jaareindfunksies voorsien word en al die aspekte van veiligheid en verantwoordelikheid moet onder die aandag van alle leerders gebring word.


GETEKEN: D.R. SHEPHERD
HOOF: ONDERWYS
DATUM: 2004:09:07