1. Die 7de Wêreldkonvensie van die Internasionale Konfederasie van Prinsipale (World Convention of the International Confederation of Principals) (ICP) word van Sondag 10 Julie tot Donderdag 14 Julie 2005 vir die eerste keer op die Afrika-kontinent gehou en wel by die Kaapstad Internasionale Konvensiesentrum wat sentraal geleë is en maklike toegang tot akkommodasie en vervoerfasiliteite bied.
2. Die tema van die 2005 ICP-konvensie, wat die volle steun van die Stad Kaapstad, Suid-Afrikaanse Toerisme en die nasionale Departement van Onderwys geniet, is Ubuntu (Menslikheid aan andere) - Menslikheid, gemeenskap en verantwoordelikheid.
3. Hierdie tweejaarlikse konvensie bied aan prinsipale die geleentheid om kwessies wat hulle almal raak te bespreek, byvoorbeeld die uitdagings van die onderrig van leerders in die 21ste eeu, die aanmoediging van personeel om hulle volle potensiaal te ontwikkel, en die ontwikkeling van strategieë vir die hantering van nuwe politieke, wetgewende en sosio-ekonomiese eise wat aan skole gestel word.
4. Verskillende tipes aanbiedinge sal deel uitmaak van die konvensie: referate gelewer deur gassprekers gedurende volle sittings, symposiums, seminare en praktiese werkwinkels wat tydens die wegbreeksessies aangebied sal word.
5. Onder die gassprekers tel president Thabo Mbeki, aartsbiskop Desmond Tutu, me. Naledi Pandor, mev. Graca Machel, mnr. Pieter-Dirk Uys, mnr. Mark Shuttleworth, professor Louise Stoll (Hoof van Professionele Leer, Bath-universiteit, VK), president Mary Robinson (voormalige President van Ierland), dr. Barry McGaw (Direkteur van Onderwys, Parys, Frankryk) en barones Helena Kennedy (Voorsitter van die British Council, VK).
6. Vir meer inligting oor die konvensieprogram, registrasie, koste, ens., besoek die INTER- NATIONAL CONFEDERATION OF PRINCIPALS (ICP) se webtuiste: http://www.icp2005.com of e-pos Amanda Engelbrecht ( aengelb@pgwc.gov.za ).
7. Die Wes-Kaap Onderwysdepartement steun hierdie konvensie en wil graag soveel prinsipale van skole as moontlik aanmoedig om deel te hê daaraan sodat hulle met kollegas van regoor die wêreld kan skakel.


GETEKEN: R.B. SWARTZ
HOOF: ONDERWYS
DATUM: 2004:12:01