1. Die Nasionale Kurrikulumverklaring (NKV) Graad 10 - 12 (Algemeen) en die HNKV (AOO) sal gedurende die tydperk 2006 - 2008 stelselmatig geïmplementeer word. Aangesien 'n groot aantal permanent aangestelde WKOD-opvoeders ondergekwalifiseerd is in bogenoemde vakke/leerareas, beplan die Wes-Kaap Onderwysdepartement (WKOD) om opleiding aan ongeveer 200 opvoeders te verskaf ten einde hulle agtergrondkennis en professionele vaardighede in hierdie verband op te gradeer.
2. Die GOS-kursus sal vanaf Januarie 2005 tot Desember 2006 as 'n deeltydse kursus aangebied word. Dit sal lei tot 'n NKR vlak 6-kwalifikasie en is `n kombinasie van afstandonderrig/-leer en kontaksessies gedurende die skoolvakansies/naweke.
3. Die WKOD bied beurse aan wat die onderrig- en registrasiegelde van die programme sal dek. Opvoeders van die landelike gebiede sal gedurende die kontaksessies in die relevante Hoër Onderwysinrigtings se koshuise op WKOD-onkoste gehuisves word.
4. Ovoeders is self verantwoordelik vir die betaling van hulle vervoerkoste en leerondersteuningsmateriaal.
5. 'n Totaal van ongeveer 200 opvoeders, ongeveer 40 per vak/leerarea, sal in 2005 geakkommodeer word.
6. Die volgende opvoeders kan in aanmerking kom vir beurse vir hierdie kursusse:

  • Opvoeders permanent in diens van WKOD. Voorkeur sal gegee word aan opvoeders wat tans bogenoemde of verwante vakke/leerareas in graad 10 - 12 en Kuns en Kultuur in graad 7 - 9 aanbied.

  • Opvoeders met `n twee-/driejaardiploma

  • Opvoeders met 'n graad en `n professionele kwalifikasie, maar met geen formele opleiding in bogenoemde vakke/leerareas nie
7. Die kursus sal die volgende elemente van die Nasionale Kurrikulumverklaring vir Verdere Onderwys en Opleiding (graad 10 - 12) en/of die HNKV vir graad 7 - 9 dek:

  • Die beginsels van die NKV/HNKV

  • Die leeruitkomstes en assesseringstandaarde

  • Die kennisareas en assessering

  • Uitkomsgebaseerde metodologie (leer-/onderrig- en assesseringstrategieë)

  • Vaardighede vir die seleksie van ondersteuningsmateriaal, insluitend rekenaarsagteware

  • Wat opvoeders in die klaskamersituasie sal benodig

  • Skryf van leerprogramme
8. Aan die begin van die kursus sal daar van alle deelnemers verwag word om 'n aanvangs-/diagnostiese toets af te lê. Dit sal deel vorm van die WKOD se evaluering van die effektiwiteit van die kursus.
9. Opvoeders wat om 'n beurs aansoek wil doen, moet die aangehegte aansoekvorm (Leesbare fotokopieë sal aanvaarbaar wees.) voltooi en via hulle prinsipale teen nie later nie as Vrydag 30 Julie 2004 indien by 
Hoof: Onderwys
(Aandag mnr. J. Smit, Kamer 8-79, Grand Central Towers)
Wes-Kaap Onderwysdepartement
Privaatsak X9114 
Kaapstad
8000
10. Bring asseblief die inhoud van hierdie minuut onder die aandag van alle betrokkenes.


GETEKEN: L.J. ROSE
HOOF: ONDERWYS
DATUM: 2004:06:11

Studie beursaansoekvorm: Gevorderde Onderwyssertifikaat (GOS)  (grootte: 39 KB)