1. Een van die grootste uitdagings wat die onderwys in die gesig staar is die dreigende VIGS-krisis. Uit navorsing is dit duidelik dat skole die primêre bron (formeel en informeel) van inligting vir jongmense aangaande die voorkoming van VIGS bly. Die WKOD is daartoe verbind om hierdie rol te versterk sodat ons jeug die kennis, vaardighede, gesindhede en waardes kan verwerf om gesonde en verantwoordelike lewenskeuses te maak en dit te handhaaf.
2. Kurrikulumgebaseerde onderrig in MIV/VIGS- en seksualiteitslewensvaardighede sal vir graad 8 en 9-opvoeders verskaf word vanaf September 2004, en vir graad 10 tot 12-opvoeders in Julie 2005. ('n Verdere 10 000 primêreskoolopvoeders is alreeds vir hierdie belangrike taak opgelei.)
3. As 'n byvoeging tot kurrikulumgebaseerde onderrig en om portuuronderrig en buitemuurse leeraktiwiteite in sekondêre skole te fasiliteer, word daar hiermee aan 'n beperkte getal opvoeders die geleentheid gebied om deel te neem aan 'n geïntegreerde loveLifestyle opleidingsprogram. Hierdie program sal in tien opleidingsessies regoor die provinsie vanaf Julie tot September 2004 aangebied word. Die opleiding sal die volgende vier modules insluit:
  • Liggaamswysheid (Body Ys) - totale gesondheid, welsyn en seksualiteitsinligting

  • Motivering (Motivation) - stel van doelwitte en keuses vir jongmense

  • Bestemmingsverbeelding (Destination Imagination) - kreatiewe probleemoplossingsvaardighede

  • Debattering (Debating) - geleentheid vir jongmense om 'n platform vir hulle oortuigings te kry, dit te ontleed en te beoordeel.

Twee opvoeders per sekondêre skool word uitgenooi om deel te neem en u word sterk aangeraai om hierdie inisiatief te ondersteun.

4. Die volgende dokumente is aangeheg:


GETEKEN: M.J. THERON
HOOF: ONDERWYS
DATUM: 2004:07:16

Brief van die LUR  (grootte: 31 KB)
Opleidingsdatums, -tye en -plekke  (grootte: 12 KB)
Registrasievorm  (grootte: 8 KB)