1. Die Wes-Kaap Onderwysdepartement (WKOD) sal gedurende Oktober en November 2004 die geletterdheids- en syfervaardigheidsvlakke van graad 3-leerders in die provinsie navors.
2. Hierdie navorsing moet nie verwar word met die Sistemiese Evaluering van graad 6-leerders nie (verwys na Omsendbrief 0024/2004 ).  Dit word in September 2004 deur die Gehalteversekeringsafdeling te Hoofkantoor onderneem.
3. Die hoofdoel van die graad 3-assessering is die meting van leerders se geletterdheids- en syfervaardigheidsvlakke en hulle vordering ter bereiking van hoë standaarde van geletterdheid en syfervaardigheid. Die toets sal gebaseer wees op die Hersiene Nasionale Kurrikulumverklaring (HNKV). Hierdie assessering sal ook bydra tot die WKOD se beplanning van remediërende werk in skole.
4. Voorbereidings het reeds 'n aanvang geneem en alle skole met graad 3-leerders sal mettertyd ingelig word oor die prosedure en voorsien word van administratiewe besonderhede.
5. Bring asseblief die inhoud van hierdie minuut onder die aandag van alle betrokkenes, veral graad 3-opvoeders.
6. Enige navrae rakende die inhoud van hierdie minuut kan gerig word aan dr RS Cornelissen by telefoon (021) 467 2286 of e-pos Dr Cornelissen by rcornelissen@pgwc.gov.za.
7. U samewerking sal waardeer word.


GETEKEN: P.PRESENT
HOOF: ONDERWYS
DATUM: 2004:05:07