1. Ooreenkomstig Resolusie 7 van 2000 van die Staatsdienskoördinerings-bedingingsraad en Resolusie 2001 van die Raad op Arbeidsverhoudinge in die Onderwys moes alle staatsdepartemente die vakansieverlofdae (kalenderdae) wat staatsamptenare en opvoeders tot en met onmiddellik voor die inwerkingtrede van die nuwe verlofbedeling tot hul krediet gehad het, oudit en in werksdae omskep. In die geval van staatsamptenare was die datum 1 Julie 2000 en in die geval van opvoeders 1 Januarie 2002.
2. Die Wes-Kaap Onderwysdepartement (WKOD) bevestig graag hiermee dat hierdie omvattende taak intussen voltooi is en dat die kantoor van die Ouditeur-Generaal sy tevredenheid met die verlofouditproses uitgespreek het. Die WKOD is derhalwe nou in staat om staatsamptenare en opvoeders individueel van hulle persoonlike verlofkrediete in kennis te stel. Hierdie individuele bevestigings word binnekort aan hoofde van kantore/skole uitgereik.
3. Verlofkrediete wat tot en met 2000 in die geval van staatsamptenare en 2001 in die geval van opvoeders opgehoop is, is volgens die nuwe verlofbedeling van weeksdae na werksdae omgeskakel. Verlofkrediet van 210 dae voor 2000 is byvoorbeeld omgeskakel na 150 dae verlofkrediet (210 x 5/7). Dit sal nie die uitbetaling van `n verlofgratifikasie beïnvloed nie, aangesien dit nou in die formule oor 261 werksdae, en nie meer oor 365 werksdae nie, in `n jaar bereken word.
4. Werknemers wat hul verlofkrediete bevraagteken, moet asseblief hulle navrae skriftelik met die WKOD opneem. Dit moet aan die volgende adresse gerig word:

Vir staatsamptenare:

Die Direkteur: Personeelbestuur (Staatsdiens ) 
Wes-Kaap Onderwysdepartement
Privaatsak 9114
KAAPSTAD
8000

Vir opvoeders:

Die Direkteur: Personeelbestuur (Opvoeders)
Wes-Kaap Onderwysdepartement
Privaatsak  X9114
KAAPSTAD
8000
5. Bring asseblief die inhoud van hierdie minuut onder die aandag van alle personeellede onder u beheer.


GETEKEN: J.H. HURTER
HOOF: ONDERWYS
DATUM: 2004:08:27