1. Daar word met kommer daarop gelet dat die korrekte prosedure rakende die sekondering van KS-opvoeders, veral na direktorate te Hoofkantoor en OBOS’e, nie streng nagevolg word nie.
2. Die Direktoraat Personeelbestuur (Opvoeders) is verantwoordelik vir die prosessering van versoeke om sekonderings ingevolge die delegasiebevoegdhede van die Onderwyshoof. Indien hierdie prosedure nie gevolg word nie, kan dit daartoe aanleiding gee dat die aanstellings van plaasvervangers of daaropvolgende waarnemende aanstellings nie geprosesseer word nie. Let daarop dat geen post facto-goedkeuring vir sekonderings verleen sal word nie.
3. Die volgende skriftelike dokumentasie word benodig wanneer 'n aansoek om 'n sekondering ingedien word:
3.1 Volledige redes waarom die sekondering nodig is
3.2 Die aanbevelings van die betrokke direkteur en hoofdirekteur
3.3 Die voorgestelde gesekondeerde opvoeder se skriftelike instemming tot die sekondering en bevestiging dat die sekondering op die opvoeder se eie koste sal geskied
4. Direkteure word versoek om toe te sien dat bogemelde dokumentasie aan die voormelde direktoraat voorsien word. Die betrokke direktoraat het trouens opdrag ontvang om nie sekonderings te prosesseer as hulle nie in ooreenstemming met die voorgeskrewe prosedures is nie.
5. U samewerking sal waardeer word.


GETEKEN: J.H. HURTER
HOOF: ONDERWYS
DATUM: 2004:04:05