1. Die Wes-Kaap Onderwysdepartement (WKOD) moedig navorsing wat in die beste belang van die onderwys is aan, en sal enige sinvolle navorsingsprojek in hierdie verband oorweeg.
2. Die Direktoraat: Onderwysnavorsing het op 1 Januarie 2001 tot stand gekom en is verantwoordelik vir die identifisering, onderneming, koördinering, fasilitering en aanbeveling van navorsing op ‘n professionele, sistematiese en objektiewe wyse. Dit evalueer en oorweeg ook navorsingsversoeke.
3. Die volgende komitees is in die lewe geroep om sake rakende navorsing binne die WKOD te hanteer.
3.1 NAVORSINGSKOMITEE

Hierdie komitee vergader vir ‘n uur op elke eerste en derde Vrydag van die maand, en in uiterste gevalle as ‘n besluit onverwyld geneem moet word.
3.1.1 SAMESTELLING

  • Direkteur: Onderwysnavorsing (DER).

  • Beamptes in die Direktoraat: Onderwysnavorsing.
3.1.2 FUNKSIES
  1. Alle dokumentasie wat verband hou met die navorsingsprojekte/navrae word vir bespreking voorgelê.
  2. Die dokumentasie word bestudeer en onduidelikhede word uitgeklaar.
  3. Die praktiese implementering van die projekte of navrae ten opsigte van die beskikbaarheid van navorsers, infrastruktuur, befondsing (waar van toepassing) word geëvalueer.
  4. Die moontlike impak van die voorgestelde projekte of navrae op die onderwysstelsel word geëvalueer.
  5. Die voorgestelde navorsingsprojekte word goedgekeur/afgekeur/hersiening word versoek.
  6. Navorsingsprojekte wat deur die WKOD Navorsingsdagbestuur goedgekeur moet word, word voorberei vir die maandelikse vergaderings van daardie bestuur.
3.2 NAVORSINGSDAGBESTUUR

Hierdie komitee vergader vir 'n uur, ses keer per jaar.
3.2.1 SAMESTELLING
  • Adjunk-direkteur-generaal: Onderwysbeplanning en -ontwikkeling (ADG:E)
  • Hoofdirekteur: Onderwysondersteuning en -ontwikkeling (HDP) - Voorsitter
  • Hoofdirekteur: Streekdienste: Landelik (HDR)
  • Hoofdirekteur: Streekdienste: Metropool (HDM)
  • Hoofdirekteur: Onderwysbeplanning (HDB)
  • Direkteur: Onderwysnavorsing (DER)
  • Beamptes in die Direktoraat: Onderwysnavorsing
3.2.2 FUNKSIES
  1. Alle dokumentasie wat met navorsingsprojekte en -versoeke verband hou, saam met aanbevelings, word vyf dae voor die maandelikse vergadering vanaf die Navorsingskomitee ontvang.
  2. Dokumentasie word bestudeer en onduidelikhede word uitgeklaar.
  3. Die praktiese implementering van die projekte of versoeke ten opsigte van die beskikbaarheid van navorsers, infrastruktuur, befondsing (waar van toepassing) word bespreek.
  4. Die moontlike impak van die voorgestelde projekte of versoeke op die onderwysstelsel word bespreek en bepaal.
  5. Die voorgestelde navorsingsprojekte word goedgekeur/afgekeur/hersiening daarvan word versoek.
  6. Verslae en afdrukke van verhandelings en proefskrifte word geëvalueer en enige moontlike implementering word bespreek voordat dit by Topbestuur aanbeveel word.
3.3 ADVISERENDE NAVORSINGSKOMITEE

Hierdie komitee vergader twee keer per jaar vir twee uur.

3.3.1 SAMESTELLING
  • Superintendent-generaal (SG)
  • Adjunk-direkteur-generaal: Onderwysbeplanning en -ontwikkeling (ADG:E)
  • Adjunk-direkteur-generaal: Operasionele Onderwysbestuur (ADG:O)
  • Adjunk-direkteur-generaal: Korporatiewe Bestuur (ADG:A)
  • Hoofdirekteur: Onderwysondersteuning en -ontwikkeling (HDP)
  • Hoofdirekteur: Streekdienste: Landelik (HDR)
  • Hoofdirekteur: Streekdienste: Metropool (HDM)
  • Hoofdirekteur: Onderwysbeplanning (HDB)
  • Direkteur: Onderwysnavorsing (DER)
  • Beamptes in die Direktoraat: Onderwysnavorsing
  • Dekane van Fakulteite/Fakulteitshoofde/Departementshoofde/Hoofde van Navorsings- eenhede
3.3.2 FUNKSIES
  1. Navorsingsprojekte word beskou en bespreek.
  2. Moontlike toekomstige navorsingsbehoeftes of -projekte word geïdentifiseer.
  3. Medewerkende navorsing tussen WKOD en tersiêre inrigtings word bespreek.
4. NAVORSINGSPROJEKTE EN -VOORSTELLE
4.1

Indien die Direktoraat: Onderwysnavorsing ‘n behoefte aan navorsing identifiseer en sy eie navorsing onderneem of dit deur middel van ‘n diensverskaffer laat onderneem, is die prosedure soos volg:
4.1.1 Die behoefte aan navorsing word geïdentifiseer.
4.1.2 ‘n Toepaslike navorsingsprojek word voorberei en gedokumenteer.
4.1.3 Alle dokumentasie wat met die navorsingsprojek verband hou, word vyf dae voor die maandvergadering vir evaluering aan die WKOD se Navorsingsdagbestuur voorgelê.
4.1.4 Die praktiese implementering van die projek ten opsigte van die beskikbaarheid van navorsers, infrastruktuur en befondsing, word deur die komitee bepaal.
4.1.5 Die voorgestelde navorsingsprojek word goedgekeur/afgekeur/hersiening word versoek.
4.2 Indien ‘n ander direktoraat van die WKOD ‘n behoefte aan navorsing identifiseer en graag navorsing wil onderneem, is die prosedure soos volg:
4.2.1 Die relevante Direktoraat identifiseer die behoefte aan navorsing.
4.2.2 Dokumentasie word voorberei en voorgelê aan die Direktoraat: Onderwysnavorsing wat die navorsingsprojekte noukeurig bestudeer en koördineer.
4.2.3 Alle dokumentasie wat met die navorsingsprojek verband hou, saam met die aanbeveling van die Direktoraat: Onderwysnavorsing, word vyf dae voor hulle maandvergadering aan die WKOD Dagbestuur voorgelê.
4.2.4 Die voorgestelde navorsingsprojek word goedgekeur/afgekeur/hersiening daaraan word versoek.
4.3 Indien navorsingsversoeke van individue, inrigtings of organisasies ontvang word, is die prosedure soos volg:
4.3.1 Skriftelike aansoeke word aan die Direktoraat: Onderwysnavorsing gestuur.
4.3.2 Alle literatuur met betrekking tot hierdie versoek word versamel en bestudeer. Indien ‘n versoek ontoereikend is of omstrede stof bevat, is daar wisselwerking met die aansoeker.
4.3.3 Toepaslike hersiening en wysigings kan versoek word.
4.3.4 Indien die navorsingsvoorstel binne die grense van ‘n bepaalde Direktoraat val, word dit na daardie Direktoraat verwys vir bestudering en 'n aanbeveling.
4.3.5 Indien die navorsingsvoorstel aan alle vereistes voldoen, word dit óf deur die Navorsingskomitee goedgekeur óf na die Navorsingsdagbestuur vir oorweging verwys.
4.3.6 Indien die navorsingsvoorstel nie aan al die vereistes voldoen nie, kan dit teruggehou word totdat die verlangde hersiening afgehandel is.
5. PROSEDURE VIR AANSOEK OM NAVORSING BY DEPARTEMENTELE INRIGTINGS TE ONDERNEEM
5.1 ‘n Skriftelike aansoek om toestemming om die voorgestelde navorsing te onderneem, moet twee maande (of meer) voor die tyd deur die navorser of projekleier ingedien word by

DIE HOOF: ONDERWYS
(VIR AANDAG: DIREKTEUR: ONDERWYSNAVORSING)
WES-KAAP ONDERWYSDEPARTEMENT
PRIVAATSAK X9114
KAAPSTAD
8000
5.2 Voornemende navorsers moet die volgende in gedagte hou:
5.2.1 Departementele goedkeuring vir voorgestelde navorsing moet verkry word voordat enige WKOD-inrigting of beampte om samewerking in sodanige navorsing genader mag word.
5.2.2 Die aansoek moet die volgende insluit:

  1. Die volledige opskrif van die navorsingsprojek.

  2. 'n Beknopte beskrywing van die navorsingsprojek.

  3. As vraelyste, onderhoude en/of toetse in die ondersoek gebruik word, moet kopieë van sodanige vraelyste, gestruktureerde vrae of toetse, met die skriftelike toestemming van die studieleier/projekleier die aansoek vergesel. Wanneer hierdie vraelyste voorberei word, moet voornemende navorsers rekening hou met die sensitiwiteit van die inhoud aangesien respondente soos die WKOD, opvoeders, dosente, leerders, studente, beheerliggame en ouers nie aanstoot mag neem of in die verleentheid gestel mag word nie.

  4. Die name van die departementele inrigting(s) waar die navorsing onderneem gaan word.

  5. Respondente (d.w.s. leerders of opvoeders) wat aan die navorsing gaan meedoen.

  6. Die tydperk waartydens die navorsing by departementele inrigtings onderneem sal word.
5.3 Nadat goedkeuring om navorsing te onderneem deur die WKOD verleen is, sal die volgende voorwaardes normaalweg geld:
5.3.1 Daar mag geen finansiële implikasies vir die WKOD wees nie.
5.3.2 Dit moet onder geen omstandighede moontlik wees om inrigtings en respondente uit die navorsingsresultate te identifiseer nie.
5.3.3 Die navorser moet alle reëlings rakende sy/haar ondersoek tref.
5.3.4 Voornemende navorsers moet ‘n afskrif van die skriftelike goedkeuring van die WKOD aan die betrokke inrigtingshoof voorlê voordat enige navorsing onderneem mag word.
5.3.5 In die geval van sekere navorsingsprojekte, sal dit vir aansoekers noodsaaklik wees om persoonlik die skriftelike toestemming van die ouers of wettige voogde te verkry voordat leerders/studente betrek kan word.
5.3.6 Navorsing mag nie gedurende amptelike kontaktyd onderneem word nie, aangesien opvoeders se programme nie onderbreek mag word nie, behalwe in uitsonderlike gevalle en met die spesiale toestemming van die WKOD.
5.3.7 Indien die navorser die navorsingstydperk sou wou verleng nadat goedkeuring verleen is, moet ‘n aansoek in hierdie verband aan die Direkteur: Onderwysnavorsing gerig word.
5.3.8 Die navorsing mag nie gedurende die vierde skoolkwartaal onderneem word nie, behalwe in gevalle waar die WKOD dit nodig mag ag om gedurende daardie tydperk navorsing by skole te onderneem. Dit sal deur die Navorsingsdagbestuur geëvalueer en bepaal moet word.
5.3.9 Die navorsing sal beperk word tot daardie skole of inrigtings waarvoor goedkeuring verleen is.
5.3.10 'n Afskrif van die voltooide verslag, verhandeling of proefskrif, tesame met ‘n aparte oorsig (maksimum 2 - 3 getikte bladsye) van die belangrikste bevindings en aanbevelings, indien dit nie reeds ‘n oorsig bevat nie, moet aan die Direkteur: Onderwysnavorsing voorsien word.
6. ALGEMEEN
6.1 Voldoening aan die departementele riglyne en prosedures sal ‘n spoedige reaksie op navorsingsaansoeke tot gevolg hê.
6.2 Van tyd tot tyd sal die WKOD sy eie navorsing onderneem ten einde op die hoogte te bly van onlangse verwikkelings, ondersteuning te verleen en opvoeder-, leerder- en kurrikulumontwikkeling te verseker. Dit kan ook navorsing in medewerking met tersiêre inrigtings, Nie-Regerings Organisasies (NRO's) en ander organisasies onderneem. In sulke gevalle sal skole op ‘n gepaste wyse gekies word, d.w.s. gebaseer op hulle grootte, heterogeniteit, omstandighede, ens. volgens die soort navorsing en die beoogde uitkomste van die ondersoek.
6.3 Indien ‘n skool gekies word om deel te hê aan so 'n navorsingsprojek (paragraaf 6.2), sal daar van die prinsipaal en personeel verwag word om hul volle samewerking te gee. Sulke navorsing strek tot voordeel van alle onderwysinrigtings en kan ‘n kernrol in die oplossing van probleme speel, asook in die bekendstelling en implementering van innoverende bestuurstelsels en doeltreffende onderrigpraktyk.
6.4 Die WKOD is op ’n besondere wyse verantwoording aan ouers, leerders, studente, departementele beamptes en inrigtings verskuldig. Die reg van deelnemers aan ‘n navorsingsprojek tot privaatheid, anonimiteit, vertroulikheid en respek vir menswaardigheid moet ten alle tye eerbiedig word.


GETEKEN: R.B. SWARTZ
HOOF: ONDERWYS
DATUM: 2003:12:08