|
In die lig van probleme wat jaarliks ondervind word om geskikte eksamenakkommodasie vir privaatkandidate te vind, asook die vervroeging van die sluitingsdatum en die finalisering van statistieke vir die Senior Sertifikaat-eksamen teen 31 Mei 2004, word u nou reeds genader met die oog op reëlings vir eksamenakkommodasie vir privaatkandidate. Die WKOD strewe daarna om sover moontlik beskikbare dienste en hulp na die gemeenskap te neem en word u vriendelik versoek om die volgende in aanmerking te neem wanneer u die meegaande bylae voltooi. Privaatkandidate is soos u bewus is leerders wat om verskeie redes nie hul skoolopleiding kon voltooi nie, nie aan enige skool verbonde is nie en wat - dikwels met groot opoffering - self hul studies onderneem om ‘n positiewe bydrae tot die samelewing te kan lewer. Wanneer hulle registreer vir die Senior Sertifikaat-eksamen, dui privaatkandidate ‘n eksamensentrum naby hul woon- of werkplek aan. Ander verkies om by hul 'ou' skool te skryf. Prinsipale word dus vriendelik versoek om sover moontlik hierdie kandidate te ondersteun deur hulle toe te laat om by die skool van hulle keuse te skryf sodat dit slegs nodig sal wees om in werklik uitsonderlike gevalle hulle in gekombineerde sentrums te plaas. Gekombineerde sentrums veroorsaak in baie gevalle dat kandidate lang afstande moet reis om eksamen te kan skryf. Dikwels is hulle werkloos en kan eenvoudig nie reiskoste bekostig nie. Hulle vind dit ook onbegryplik dat hulle kilometers ver moet reis om eksamen te skryf terwyl hulle binne bereik van ‘n skool woon. Geliewe die ingeslote bylae te voltooi en teen 19 April 2004 per faks by nommer 021- 4615637, of per E-pos aan Samuel Adams by sadams@pgwc.gov.za te stuur, of by die volgende adres in te dien: Mnr S.Adams, Kamer 515, Grand Central Towers, Laer Parlementstraat, Kaapstad. GETEKEN: A.P. CLAUSEN |