1. VOOR DIE EKSAMEN
1.1 ’n Kompakskyf met die datalêers sal ongeveer 2 weke voor die eksamen aan skole voorsien word. Die Rekenaarstudieopvoeder moet onmiddellik die hele inhoud van die kompakskyf na ‘n gids op ‘n rekenaar se hardeskyf wat deur niemand anders bekom kan word nie, kopieer en kyk of hy/sy die lêers kan oopmaak. (Verdere inligting sal saam met die skyf verskaf word.) Die oorspronklike kompakskyf moet in die inrigting se kluis bewaar word.
1.2 Nadat die Rekenaarstudieopvoeder verseker het dat die LEES ALLEEN-funksie afgeskakel is en onder toesig van die hoofopsiener, moet hy/sy hierdie inligting op die netwerk of op die hardeskyf van elke rekenaar wat gebruik gaan word, stoor of ’n stiffie vir elke kandidaat voorberei. ONDER GEEN OMSTANDIGHEDE MAG KANDIDATE VOOR DIE EKSAMEN TOEGANG TOT HIERDIE LÊERS VERKRY NIE.
2. NA DIE EKSAMEN
2.1 Na afloop van die eksamen moet die Rekenaarstudieopvoeder onder toesig van die hoofopsiener al die werk wat deur die kandidate gedoen is, op die oorspronklike kompakskyf stoor. Elke kandidaat se werk moet afsonderlik in ‘n lêer met sy/haar van, voorletters en die laaste 4 syfers van sy/haar eksamennommer (bv. HarmseJ0023) gestoor word.
2.2 Die Rekenaarstudieopvoeder moet ‘n presiese afskrif van hierdie finale kompakskyf maak en dit in die kluis bewaar. Hy/sy moet die oorspronklike kompakskyf gebruik om die kandidate se werk te merk. Hierdie skyf en elke kandidaat se merkstate moet op 18 November 2004 saam met die skrifte van die teorie-eksamen in Rekenaarstudie aan die Direktoraat: Eksamens gestuur word.
3. DIE EKSAMEN
3.1 Die volgende addisionele reëlings in verband met die afneem van die eksamen in Rekenaarstudie moet streng nagekom word:
3.1.1 Kandidate vir Rekenaarstudie moet ‘n addisionele 10 minute vroeër as die 25 minute wat vir ander eksamens toegelaat word, tot die eksamenlokaal toegelaat word sodat hulle hul rekenaars vir die eksamen gereed kan kry. Hierdie bedrywighede moet egter ongeveer 25 minute voor die aanvang van die eksamen gestaak word.
3.1.2 ’n Ervare Rekenaarstudieopvoeder, nie noodwendig die betrokke kandidate se opvoeder nie, moet vir die volle duur van die eksamen in die eksamenlokaal teenwoordig wees sodat hy/sy hulp kan verleen aan kandidate wat probleme met hulle rekenaars ondervind. Addisionele tyd, gelykstaande aan die tyd wat hulle weens faktore buite hulle beheer verloor het, moet aan sulke kandidate toegestaan word. Geen ekstra tyd sal toegelaat word vir werk wat verlore gegaan het omdat ‘n kandidaat dit nie gestoor het nie.
3.2 Dit word sterk aanbeveel dat een van die toesighouers rekenaargeletterd moet wees.
3.3 Twee persone moet te alle tye in die lokaal teenwoordig wees indien daar 10 of minder kandidate is. Vir elke addisionele 10 kandidate moet ‘n ekstra toesighouer in die lokaal teenwoordig wees.
3.4 Prinsipale/sentrumbestuurders moet toesien dat rekenaars wat vir hierdie eksamen gebruik gaan word, in goeie werkende toestand is.
4. PROSEDURE IN DIE GEVAL VAN 'N KRAGONDERBREKING
4.1 Kandidate moet in die lokaal bly totdat die kragtoevoer herstel word. Hulle mag op geen wyse met mekaar kommunikeer terwyl hulle wag dat die kragtoevoer herstel word nie. Die tyd wat tydens die kragonderbreking verloor word, moet as addisionele eksamentyd toegelaat word.
4.2 INDIEN DIE KRAGTOEVOER NA ’N HALFUUR NOG NIE HERSTEL IS NIE, MOET DIE EKSAMEN AFGELAS WORD. DIT SAL DAN OP ’N DATUM SOOS OOREENGEKOM DEUR DIE DEPARTEMENT EN DIE BETROKKE SKOOL/SKOLE GEHERSKEDULEER WORD.
4.3 Die Direktoraat: Eksamens moet onverwyld van die kragonderbreking verwittig word.
4.4 Die werk wat reeds deur die kandidate gedoen is, moet aan die Direktoraat: Eksamens gestuur word.
4.5 Ten einde te help om 'n kragonderbreking te voorkom, word prinsipale/sentrumbestuurders versoek om te verseker dat swaar elektriese toerusting (bv. dié wat vir Metaalwerk, Houtwerk en Huishoudkunde gebruik word) nie vir die tydsduur van die Rekenaarstudie-eksamen gebruik word nie.
4.6 Waar daar twee sessies gedurende ’n eksamen is, geld bogenoemde prosedure vir albei sessies.
4.7 Indien ’n kragonderbreking gedurende die eerste sessie voorkom en die eksamen van die eerste sessie afgelas word, moet prinsipale/sentrum­bestuurders verseker dat daar voor die aanvang van die tweede sessie hoegenaamd geen kontak tussen kandidate van die eerste en die tweede sessie is nie.
4.8 Sodra daar ’n kragonderbreking is, moet die prinsipaal/sentrumbestuurder onmiddellik die plaaslike owerhede daarvan in kennis stel en, indien moontlik, vasstel hoe lank die kragonderbreking sal duur.
4.9 Om te voorkom dat foutiewe elektriese toerusting en installasies 'n kragonderbreking veroorsaak, moet alle elektriese toerusting, bedrading, verlengingskoorde, muurproppe en muursokke by die skool nagegaan word ten einde te verseker dat hulle in goeie werkende toestand is.
4.10 Skoolhoofde word dringend versoek om voorkomende maatreëls te tref om enige moontlikheid van kragonderbrekings uit te skakel.


GETEKEN: A.P. CLAUSEN
HOOF: ONDERWYS
DATUM: 2004:09:27