1. Bestuurders van volwassene leersentrums word vriendelik versoek om die name en adresse van geskikte persone wat gewillig is om as hoofopsieners en hulpopsieners op te tree, op bygaande Addendum A, in te vul en voor 10 September 2004 aan die Kringbestuurders voor te lê vir goedkeuring. Die finale lys moet die Departement voor/op Donderdag, 23 September 2004 bereik.
2. Die finale rooster vir die VBOO Vlak 4 assessering van Oktober 2004 sal eersdaags aan VLS’s versend word.
3. Die Kringbestuurder moet homself/ haarself vergewis van die bona fides van genomineerde persone veral ten opsigte van hul lees, skrywe, gehoor- en gesigsfiksheid sowel as gesondheidstoestand. Voorts moet die Kringbestuurder ‘n persoonlike onderhoud met die persoon wat as hoofopsiener genomineer is voer. Aansoekers/genomineerdes wat elders vir ‘n voltydse werk aansoek gedoen het moet verkieslik nie vir aanstelling oorweeg word nie. As gevolg van die implementering van die nuwe wette rakende die wisseling van tjeks, is dit noodsaaklik dat genomineerdes oor ‘n bankrekening moet beskik aangesien opsienersgelde outomaties in bankrekeninge gedeponeer sal word.

4. NOMINASIE VAN HOOFOPSIENERS

Addendum B (Nominasie van hoofopsieners) moet deur die sentrumbestuurder voltooi en onderteken word waarna ‘n afdruk onmiddellik aan die persoon wat as hoofopsiener genomineer is, oorhandig moet word. Dié nominasiebrief vir hoofopsieners bevat belangrike instruksies. Tydens die onderhoud met die hoofopsiener moet die Kringbestuurder, nadat hy homself/haarself vergewis het dat die hoofopsiener bevoegd is vir die taak, Addendum C aan hom/haar oorhandig vir voltooiing daarvan waarna die vorm ook deur die Kringbestuurder onderteken moet word.

5. NOMINASIE VAN HULPOPSIENERS

Die sentrumbestuurder moet verklaar dat die persoon/persone wat as hulpopsiener(s) benoem word, geskik is om in hierdie hoedanigheid op te tree, waarna die Kringbestuurder die aanstelling van die persoon/persone wat benoem is, bekragtig. Addendum D moet deur die hulpopsiener(s) voltooi en onderteken word.

6. Na voltooiing moet Addendums A, B, C, D en E onverwyld deur die Kringbestuurder aangestuur word om die Direktoraat: Eksamens te bereik teen nie later nie as Donderdag, 23 September 2004 (VIR AANDAG: MNR. L. VAN GENSEN/C. SLEE, KAMER 417).

L.W. Geen persoon wie se aanstelling nie deur die Kringbestuurder goedgekeur is, mag as opsiener optree nie. Opsieners mag onder geen omstandighede self plaasvervangers vir enige gedeelte van hul werk reël nie. Indien omstandighede verhoed dat ‘n hoofopsiener of hulpopsiener toesig oor ‘n assessering kan hou, moet die sentrumbestuurder in oorleg met die Kringbestuurder die benoeming van ‘n plaasvervanger reël. Die Departement moet onverwyld dienooreenkomstig verwittig word.
7. In gewone omstandighede moet geen persoon vir aanstelling as hoof-/ hulpopsiener aanvaar word indien hy/sy:
(a) onder die ouderdom van 25 jaar is nie;
(b) enige familieverwantskap het met ‘n leerder wat geassesseer word of ‘n fasiliteerder wat leerders vir die assessering voorberei;
(c) in enige hoedanigheid dien in die personeel van die VLS; en
(d) die eggenoot of eggenote of enige ander familieverwant van die hoofopsiener is.

Hoofopsieners moet oor `n akademiese kwalifikasie beskik van ten minste Graad 12 en Hulpopsieners oor ten minste Graad 10. Indien nie moet `n motivering voorgelê word.
8. Indien daar meer as 30 leerders by een sitting is, is die Departement bereid om vir so ‘n sitting een hulpopsiener vir elke addisionele 30 leerders of gedeelte daarvan aan te stel, of een hulpopsiener vir elke kamer waarin daar leerders gehuisves word. By sittings waar daar slegs ‘n klein getal leerders is (tot ‘n minimum van twee) sal die dienste van een hulpopsiener benodig word. In hierdie geval sal die hoofopsiener nie normale opsienersdiens verrig nie, behalwe om ‘n hulpopsiener wat ‘n leerder moet vergesel wat toegelaat is om die lokaal weens ‘n dringende behoefte te verlaat, af te los. Waar praktiese en teoretiese assesserings by dieselfde sessie afgeneem word, moet van die dienste van ‘n hulpopsiener gebruik gemaak word. Indien twee of meer hulpopsieners gebruik word waar daar twee of meer lokale gelyktydig benut word, sal die hoofopsiener nie normale opsienersdiens verrig nie.

VOORBEELD:

GETAL
LEERDERS		GETAL
HOOFOPSIENERS		GETAL
HULPOPSIENERS
2
30
31
 1
1
1
 1
1
2
9. Waar die leerders almal vroulik is, behoort die hoofopsiener en al die hulpopsieners dames te wees. Waar beide manlike en vroulike leerders by een sentrum geassesseer word en die hoofopsiener ‘n man is, moet ten minste een van die hulpopsieners ‘n dame wees, of as die hoofopsiener ‘n dame is, moet ten minste een van die hulpopsieners ‘n man wees.

Die opsiener word aangestel met die uitdruklike veronderstelling dat hy/sy gedurende assessering sy/haar volle aandag aan toesighouding sal gee en ander werk van watter aard ook al (bv. Lees, skryf, brei, ens.) is nie toelaatbaar terwyl hulle toesig hou as opsiener by die afneem van enige assessering nie. DIE OPSIENER MAG HOEGENAAMD ONDER GEEN OMSTANDIGHEDE DIE LOKAAL TYDENS DIE ASSESSERING VERLAAT EN LEERDERS SONDER TOESIG LAAT NIE.

10(a) Die Departement stel opsieners aan en besoldig hulle ooreenkomstig die neer- gelegde departementele voorskrifte. Personeel in diens van gevangenisse wie as opsieners vir die VBOO Vlak 4 assessering optree ontvang geen addisionele besoldiging nie. Indien opsieners nie in diens van die gevangenis is nie, moet die Departement skriftelik in kennis gestel word.
10(b) Huidiglik is die tariewe R76,60 per sessie aan hoofopsieners en R51,05 per sessie aan hulpopsieners. (Die tariewe is onderhewig aan verandering)
10(c) ONDER GEEN OMSTANDIGHEDE SAL REISKOSTE AAN OPSIENERS BETAAL WORD NIE. (Sentrumbestuurders word dus aangemoedig om opsieners aan te stel wat deel vorm van die onmiddellike gemeenskap wat die VLS bedien).Waar 'n persoon tydens dieselfde sessie vir beide VBOO Vlak 4 en Senior Sertifikaat opsienerswerk verrig, kan slegs een keer vir daardie sessie ge-eis word.

L.W. DIE REGULASIES (IRP10) MET BETREKKING TOT DIE AFTREKKING VAN WERKNEMERSBELASTING, BEPAAL DAT SALARISSE VAN PERSONE WAT DEELTYDS IN DIENS IS, ONDERWORPE IS AAN ‘N AFTREKKING VAN 25% BELASTING. DIE DEPARTEMENT SAL GEVOLGLIK DIE AFTREKKING VAN 25% WERKNEMERSBELASTING TEN OPSIGTE VAN ALLE OPSIENERS MOET TOEPAS. DIE INDIENING VAN DIE SERTIFIKAAT VIR AANWYSINGS VAN WERKNEMERSBELASTINGAFTREKKING (IRP 3) GELD DERHALWE NIE MEER NIE. OPSIENERS WAT KWALIFISEER OM KWYTSKELDING OF GEDEELTELIKE KWYTSKELDING VAN DIE BETALING VAN WERKNEMERSBELASTING MOET DUS NA ONTVANGS VAN HUL IRP 5 SERTIFIKAAT (BESONDERHEDE VAN WERKNEMERSBELASTING AFTREKKING VANAF DIE DEPARTEMENT) DIT TESAME MET DIE VOORGESKREWE VORM IB 12.S BY HUL PLAASLIKE BELASTING KANTOOR INDIEN.
10(d) Hoofde van Gevangenisse moet asseblief daarop let dat dit verpligtend is om die aannamevorms (Addendums C en D) te voltooi en aan die Departement te besorg.
10(e) Ten einde die uitbetaling van opsienerseise te bespoedig is dit nodig dat elke hoof- en hulpopsiener hul identiteitsnommer op die aannamevorm aanbring sowel as ‘n afdruk van die ID-dokument en huweliksertifikaat (waar van toepassing) by die aannamevorms aanheg. Dit is ook noodsaaklik dat beide hoof- sowel as hulpopsieners oor bankrekeninge moet beskik ten einde die uitbetaling te vergemaklik. Geen tjeks sal uitgereik word nie. Addendum E moet deur die genomineerdes voltooi word.
11. AKKOMMODASIE

Ten minste ‘n maand voordat die assessering begin, moet die hoofopsiener in oorleg met die sentrumbestuurder seker maak dat voldoende geskikte akkommodasie beskikbaar is vir al die leerders wat vir die assessering ingeskryf het. Leerders moet geplaas word met voldoende ruimte tussen hulle om die moontlikheid van enige onreëlmatige gedrag uit te skakel. Die saal en/of die aantal klaskamers wat nodig sal wees, moet so benut word om ‘n spasie van 150 cm aan weerskante en 120 cm voor en agter elke bank, lessenaar of tafel waarby ‘n leerder plaasneem, te verseker. (Die Kringbestuurder moet besoeke aan die assesseringsentra in sy kring bring om vas te stel of aan hierdie voorskrif voldoen is.)

DIT IS DIE PLIG VAN ELKE HOOFOPSIENER OM HOM/HAAR TE GAAN VERGEWIS VAN DIE GESKIKTHEID VAN DIE AKKOMMODASIE VOOR DIE ASSESSERING AMPTELIK BEGIN.

12. Sentrumbestuurders word versoek om in oorleg met die Kringbestuurder toe te sien dat bevredigende reëlings vir die assessering getref word en dit van so ‘n aard is dat die leerders nie gedurende assesseringsessies gesteur sal word nie.
13. Kringbestuurders is alleenlik verantwoordelik vir die aanstel van opsieners vir VLS’s.
14. DIE INHOUD VAN HIERDIE EKSAMENMINUUT MOET ONDER DIE AANDAG VAN DIE HOOFOPSIENER GEBRING WORD WAT DIT WEER AAN DIE HULPOPSIENERS MOET OORDRA.


GETEKEN: A.P. CLAUSEN
HOOF: ONDERWYS
DATUM: 2004:08:30

Bylae A  (grootte: 5 KB)
Bylae B  (grootte: 7 KB)
Bylae C  (grootte: 6 KB)
Bylae D  (grootte: 9 KB)
Bylae E  (grootte: 8 KB)