1. Die sluitingsdatum vir inskrywings vir Senior Sertifikaat-eksamens is 15 Maart van elke jaar (verwys na Omsendbriewe 167/2003 en 13/2004). Dit beteken dat skole alle graadveranderinge voor daardie datum moet afhandel en dat kandidate nie die eerste kwartaal se verslag of die tweede kwartaal se eksamens kan gebruik as maatstaf van hulle vermoë om die werk op 'n spesifieke graad te hanteer nie.
2. Aangesien hierdie nuwe keerdatum in 2004 ingestel is, is graadveranderinge tot 30 Junie 2004 aanvaar. Die vraestelle vir 2004 se Senior Sertifikaat-eksamen word tans gedruk volgens skole en sentrums se inskrywings vir elke vak en graad en geen verdere graadveranderinge sal dus hierdie jaar aanvaar word nie.
3. Vanaf 2005 sal geen aansoeke om graadveranderinge na 15 Maart oorweeg word nie, uitgesonderd dié wat voor 30 April (verwys na Omsendbrief 13/2004 vir die nodige aansoekvorm) ingedien word en waaraan 'n geldige mediese sertifikaat geheg is.
4. Hoofde van inrigtings mag nie enige graadveranderinge na 15 Maart goedkeur nie - dit is die verantwoordelikheid van die komitee wat vir hierdie doel deur die Onderwyshoof aangestel is.
5. Ten einde probleme rakende graadveranderinge te voorkom, moet skole verseker dat hulle graad 10- en 11-eksamens van die vereiste standaard is.
6. Kurrikulumbeamptes by OBOS'e word versoek om by skole en sentrums toe te sien dat die graad 11-eksamenvraestelle van die vereiste standaard op beide HG- en SG-vlak, waar toepaslik, opgestel word en dat selfs die fynste besonderhede korrek is.


GETEKEN: A.P. CLAUSEN
HOOF: ONDERWYS
DATUM: 2004:07:27