1. Die aangehegte eisvorms ( Addendum A ) ten opsigte van die aanvullende eksamen moet deur die Hoofopsiener ten opsigte van homself/haarself en elke hulpopsiener wat by ‘n betrokke sentrum diens gedoen het, voltooi word. Sorg moet asseblief gedra word dat die eisvorm(s) in INK voltooi word. Die aantal sessies moet deur die prinsipaal/ sentrumbestuurders bevestig word deur mede-ondertekening van die eisvorm.
2. Prinsipale van onafhanklike skole en kolleges word daaraan herinner dat hulle verantwoordelik is vir die besoldiging van hul opsieners.
3. Indien opsieners na die inhandiging van die nominasievorms van posadres verander, moet die Departement skriftelik in kennis gestel word.
4. Na afloop van die laaste eksamensessie moet die eisvorms in die geadresseerde koevert per geregistreerde pos aan die volgende adres gestuur of per hand afgelewer word:
Vir Aandag: Mnr. J.C. Albertyn 
Posadres                    Straatadres
Die Hoof: Onderwys             Die Hoof: Onderwys
Wes-Kaap Onderwysdepartement   Wes-Kaap Onderwysdepartement
Direktoraat: Eksamens          Direktoraat: Eksamens
Privaatsak X9114               5de Vloer - Kamer 515 A
KAAPSTAD                       Grand Central Towers
                               Laer Parlementstraat 
                               KAAPSTAD
5. Gevangenisse of nywerheidskole wat gebruik maak van opsieners anders as hul eie personeel, moet die Departement skriftelik van sulke reëlings inlig.
6. Opsieners sal teen Departementele tariewe vergoed word.

L.W: By die betaling van opsieners word eksamensessies voor twaalfuur as oggendsessies beskou. (Noukeurigheidstoets in Tik vanaf 9:00 - 9:10 uitgesluit) Eksamensessies wat na twaalfuur begin, word as middagsessies beskou. Die Departementele tarief vir hoofopsieners is R76.60 en vir hulp-opsieners R51.05 per sessie.

7. Eise vir plaasvervangers van opsieners wat ontvang word, sal slegs geprosesseer word indien die korrekte prosedure met die nominasie en aanstelling gevolg word.
8. Daar moet toegesien word dat slegs die voorgeskrewe aantal hulpopsieners per sessie aangestel word. ‘n Verduidelikende brief moet die eisvorms vir addisionele opsieners vergesel.
9. Alle opsienersgelde sal in die skool se bankrekening gedeponeer word, behalwe waar vooraf gereël is dat dit in die opsieners se bankrekeninge inbetaal word.


GETEKEN: A.P. CLAUSEN
HOOF: ONDERWYS
DATUM: 2004:01:28

Bylae A: eisvorm  (grootte: 12 KB)