Ingevolge Regeringskoerant Nr 25699 van 7 November 2003 moet alle leerders van openbare skole, onafhanklike skole, privaatskole en alle ander inrigtings wat die WKOD-sillabus volg en wat graad 9 aanbied, voldoen aan die regulasie ten einde bevorder te kan word. Geen uitsondering kan dus vanaf vanjaar aan enige inrigting toegestaan word om van die assessering kwytgeskeld te word nie.

Soos in 2003 sal skole steeds verantwoordelik wees vir die bevordering en uitreiking van rapportkaarte aan leerders. Die Gemeenskaplike Take vir Assessering maak 25% van die bevorderingspunt van ‘n leerder uit en skool-gebaseerde assessering 75%.

GTA’s sal weer vanjaar aan skole voorsien word. Soos verlede jaar word dit ingevolge die Nasionale Departement se opdrag weer beplan om die GTA Afdeling A gedurende die derde (3de) kwartaal en Afdeling B gedurende die vierde (4de) kwartaal by skole af te lewer. Die GTA Afdeling B sal gedurende November 2004 deur leerders afgelê word. Die betrokke rooster sal eersdaags aan u beskikbaar gestel word.

Die inskrywingsvorms vir Graad 9 leerders is reeds aan skole voorsien en die keerdatum vir indiening was 19 Maart 2004. Indien dit steeds uitstaande is word u versoek om dit onverwyld in te dien. Neem egter kennis dat skole onder ‘n wetlike verpligting is om aan die graad 9 assessering deel te neem en u word dus versoek om dit deel te maak van u skool se beplanningsprosesse en keerdatums.

Die veilige bewaring van assesseringsvraestelle kan nie oorbeklemtoon word nie. Daarom is dit van die grootste belang dat alle voorsorgmaatreëls getref word wanneer vraestelle geberg word. Assesseringsvraestelle wat nog nie afgelê is nie, mag onder geen omstandighede voor of gedurende die assessering uit die skool verwyder en of die inhoud met leerders bespreek word nie. Oortredinge soos hierdie kan ernstige probleme vir die skool en die WKOD inhou asook die geloofwaardigheid van sy assesserings laat bevraagteken.

Puntestate op die nou reeds bekende "Lotto"-kaarte met leerders se name en unieke nommers sal weer aan skole vir voltooiing versend word. Prinsipale word daaraan herinner dat die punte die Departement moet bereik voor die skole sluit aan die einde van die jaar sodat dit op ‘n rekenaarprogram ingesleutel kan word voor 31 Desember 2004. Versuim om by hierdie terugdatum te hou sal in ‘n ernstige lig beskou word, selfs meer nou dat deelname aan die projek verpligtend is.