1. Die volgende reëlings sal van toepassing wees met die nasien en moderering van eksamenskrifte vir die aanvullende eksamen 2004. `n DRINGENDE beroep word op eksaminatore gedoen om die nasienwerk binne die bepaalde tydperk soos hieronder uiteengesit af te handel sodat die vooraf bepaalde keerdatums in verband met die afhandeling en bekendmaking van die uitslae nagekom kan word.
(i) Die Direktoraat: Eksamens sal die eksamenskrifte van ‘n vak sewe (7) werksdae na die datum waarop die eksamen afgelê is, aan die HOOF EKSAMINATOR voorsien vir nasien deur hom/haarself, paneellede en nasieners (indien nodig).
(ii) Puntestate moet deur die eksaminator in duplikaat voltooi word. Die oorspronklike moet elke besending skrifte vergesel terwyl die afskrif teruggehou en tesame met ander dokumentasie soos eisvorms en verslae aan die Departement oorhandig word na afhandeling van die nasienproses.
(iii) EKSAMINATORE MOET ASSEBLIEF DIE EKSAMENSKRIFTE BAIE NOUKEURIG KONTROLEER EN SEKER MAAK DAT ALLE SKRIFTE VOLLEDIG NAGESIEN, DIE PUNTE KORREK OPGETEL EN OP DIE PUNTESTATE OORGEDRA IS. SKRIFTE WAT ONTBREEK, MOET ONMIDDELLIK AAN DIE DIREKTORAAT: EKSAMENS GERAPPORTEER WORD, BY TEL 467-2960/1 (MEV. M. BUYS of MNR. P. KOLLER).
(iv) In gevalle waar die punte slegs uit twee syfers bestaan moet `n syfer 0 voor die betrokke syfers ingevoeg word, byvoorbeeld 020 vir 20. Foutiewe inskrywings op puntestate moet asseblief netjies deurgehaal en geparafeer word, aangesien korreksies wat nie geparafeer is, nie aanvaar word nie.
(v) Die voltooide puntestate moet tussen die omslag en die eerste eksamenskrif van elke pakkie eksamenskrifte geplaas word wanneer die eksamenskrifte aan die Departement gestuur word. (Afskrifte moet teruggehou word soos per par. (ii)).
(vi) Die puntestate moet noukeurig en in DUIDELIK LEESBARE handskrif voltooi word. (Gebruik swart ink).
(vii) Die skrifte moet in streng numeriese volgorde gehou word.
(viii) In gevalle waar `n kandidaat die vak/vraestel op `n ander graad afgelê het as waarvoor hy/sy geregistreer is, met ander woorde in die eksamenlokaal vanaf HG na SG of omgekeerd omgeskakel het, moet `n asterisk (*) teenoor sy/haar nommer aangebring en `n gepaste nota onderaan die puntestaat gemaak word.

Die Departement moet onverwyld van sodanige gevalle in kennis gestel word ten einde te reël vir die nasien van die betrokke skrifte.

2. TOETSING VAN MEMORANDUM VAN PUNTETOEKENNING EN INDIENING VAN FINALE VERSLAE DEUR MODERATORE

Die onderstaande prosedure word voorgeskryf met die oog op eenvormigheid in die evaluering van kandidate se eksamenantwoorde en die handhawing van `n betroubare standaard van puntetoekenning.

(i) Slegs die HOOFEKSAMINATOR sal verantwoordelik wees vir die kollektering en verspreiding van skrifte van sy/haar paneellede. Alternatiewe reëlings moet met Mev. M. Buys of Mnr. P. Koller getref word indien nodig.
(ii) Die eerste 20 nagesiene skrifte van elk van die eksaminatore moet tesame met die memorandum van puntetoekenning, gewysig indien nodig, aan die moderator voorgelê word vir sy/haar verslag.
(iii) Hierdie skrifte moet direk aan die moderator gestuur word en vir die doel sal eksaminatore en moderatore voorsien word van SkyNet Koerierdiens versendingsnotas sowel as roeteplakkers. NASIEN MAG SLEGS MET DIE MODERATOR SE TOESTEMMING AAN DIE HOOFEKSAMINATOR, VOORTGAAN EN ONDERWORPE AAN DIE VERANDERING IN DIE MEMORANDUM VAN PUNTETOEKENNING SOOS FINAAL OOREENGEKOM TUSSEN DIE MODERATOR EN EKSAMINATOR.

L.W.: ALLE VOLTOOIDE PUNTESTATE MOET AAN DIE DIREKTORAAT: EKSAMENS GESTUUR WORD.
(iv) Die moderator moet die eksamenskrifte wat van die paneel ontvang word, so spoedig moontlik, modereer en die volgende aspekte in gedagte hou:
(a) Het die eksaminator die memorandum van puntetoekenning noulettend en konsekwent toegepas?
(b) Het die eksaminator ‘n eenvormige standaard gehandhaaf?; en
(c) Gaan die moderator akkoord met die voorgestelde wysigings, indien enige, van die memorandum van puntetoekenning?

LW: DIE MODERATOR STUUR DIE GEMODEREERDE EKSAMENSKRIFTE TESAME MET SY VERSLAG (OP VORM VRE- 604) PLUS SY KOMMENTAAR EN BESLISSINGS TERUG AAN DIE HOOFEKSAMINATOR EN NIE AAN DIREKTORAAT: EKSAMENS NIE.
(v) Dit is die Hoofeksaminator se verantwoordelikheid om enige wysigings of byvoegings met die moderator te bespreek en in samewerking met sy/haar paneel te sorg dat ALLE SKRIFTE VOLGENS DIE GEWYSIGDE MEMORANDUM NAGESIEN WORD. DIE GEWYSIGDE MEMORANDUM MOET MET U EISVORMS INGEDIEN WORD.

3. Die nasienwerk moet nie later nie as 2 April 2004 voltooi wees en al die nagesiene eksamenskrifte en punteblaaie moet op die gemelde datum om 12:00 in die besit van die Direktoraat: Eksamens wees.

L.W.: `N DRINGENDE BEROEP WORD OP EKSAMINATORE GEDOEN OM BOGENOEMDE DATUM STRENG NA TE KOM EN WORD DAAR DERHALWE AANBEVEEL DAT WAAR NODIG, DIE DIENSTE VAN NASIENERS OOK AANGEWEND WORD.

4. `n Sentrale nasiensentrum word nie vir die aanvullende eksamen gereël nie. Die paneel van eksaminatore moet derhalwe onderlinge reëlings tref vir die nasien en veilige bewaring van eksamenskrifte. Die Departement kan genader word indien probleme ondervind word met akkommodasie.


GETEKEN: L.C. ARENDSE
HOOF: ONDERWYS
DATUM: 2004:02:12