1. Die Fees van die Lerende Kaap 2004 is 'n inisiatief van die Departement van Ekonomiese Ontwikkeling en Toerisme in samewerking met die Wes-Kaap Onderwysdepartement en die Departement van Arbeid. Die fees sal tussen 12 Augustus en 9 September vanjaar plaasvind. Nou in sy derde jaar, beklemtoon en vertoon die fees die beste van die onderwys, opleiding en ontwikkelingshulpbronne en dienste in die Wes-Kaap.
2. Die Fees van die Lerende Kaap beloof om die grootste en mees innoverende nog te wees, wat verskeie opwindende temas en geleenthede bied om die huidige uitdagings en ontwikkelings in die onderwys- en opleidingsfeer aan te pak.
3. Volle programbesonderhede kan gevind word op die fees se webtuiste by Learning Cape Festival (http://www.learningcape.org). Plakkate sal aan skole verskaf word en volle besonderhede van gebeurtenisse sal in die koerant verskyn. Die media sal voortgaan met artikels en advertensies gedurende die feesmaand.
4. Die algemene feesprogram van seminare en ander aktiwiteite sal op verskillende plekke aangebied word, bv. by die Suid-Afrikaanse Astronomiese Observatorium en die MTN-wetenskapsentrum. 'n Athlone-korridorprogram word beplan, asook aktiwiteite te OBOS: Metropool-Suid. Die sessies gedurende die feesmaand sal van groot belang vir opvoeders wees. Skole word ook versoek om ouers en leerders sterk aan te moedig om relevante aktiwiteite by te woon sodat hulle in 'n beter posisie kan wees om vak- en studiekeuses te maak.
5. 'n Leerfees - 'n "leermarkplek" wat by die Oliver Tambo-sentrum, Khayelitsha aangebied sal word tussen 2 en 4 September, beloof om opwinding, motivering en geleenthede te bring vir almal wat betrokke is by die onderwys, opleiding en ontwikkeling, sowel as by diegene wat betrokke is by die bevordering van die ekonomie en die opbou van ons gemeenskap op alle vlakke. Dit is die eerste van sy soort in die provinsie. Die Sentrum is aangrensend aan die N2 en is baie maklik bereikbaar.
5.1 Uitstallers sal toegang tot inligting oor alle aspekte van die onderwys, opleiding en ontwikkeling, die nuutste kursusse, kursusmateriaal, onderwysprogrammatuur, leer- en onderrigondersteunings-materiaal, leerderskappe, tegnieke en metodes verleen.
5.2 Die beplande deelname van opvoeders, opleiers, praktisyns wat vaardighede ontwikkel sal seker maak dat daar blootstelling is aan nasionale tot internasionale tendense vir opvoeders en leerders in alle sektore en vlakke van onderrig en leer. Die Leertentoonstelling sal ook 'n strategiese platform vir netwerkvorming, vennootskappe en huidige debatvoering verskaf.
5.3 Die Fees se fokus op die blootstelling aan en ontdekking van onderwys en opleidingsgeleenthede is in lyn met die huidige strategiese doelwitte van die WKOD en skakel presies in by die huidige WKOD opleidingsprogram vir Lewensoriëntering-onderwysers. Skole wat oorweeg om hulle vakkeuses te verander sal ook baatvind by 'n besoek aan die tentoonstelling, wat hulle aan die volle omvang van leeropsies en groeiareas van die provinsie kan blootstel.
5.4 Op Vrydag, 3 September sal die LUR vir Onderwys, Minister Cameron Dugmore, en mnr Ron Swartz, Superintendent-Generaal van Onderwys, by die Sentrum wees tussen 14:00 en 16:00 om opvoeders informeel te ontmoet en met hulle gesprek te voer.
5.5 Die organiseerders het Saterdag se program spesiaal beplan om onderwysers te akkommodeer, met inbegrip van diegene van die platteland. Opvoeders word aangemoedig om 'n plan te maak om hierdie waardevolle gebeurtenis asook gebeurtenisse wat vir Beaufort-Wes, George, Caledon, Hermanus, Worcester en Vredenburg geskeduleer is, by te woon. Dit sal gereël word op datums wat nie met die Leerfees bots nie.
5.6 Die uitstallings sal deur 'n reeks praatjies, panele en aanbiedings in die vertoonsaal aangevul word.
5.7 Die Uitstalling is gemodelleer op die patroon van internasionale uitstallings van hierdie aard en opvoeders is baie gelukkig dat hulle die geleentheid kry om by so 'n ervaring baat te vind. Daar word 'n beroep op alle opvoeders gedoen om te beplan om die Uitstalling te besigtig.
6. Die feesmaand is 'n geleentheid vir netwerkvorming en om die leerbehoeftes en -geleenthede te ontleed en te beklemtoon. Alle WKOD-inrigtings word versoek om die fees aktief te ondersteun deur geleenthede by te woon, dit te propageer en hulle eie ooreenstemmende geleenthede te organiseer.


GETEKEN: A.M. ATTWELL
HOOF: ONDERWYS
DATUM: 2004:08:18