1. DOEL EN OMVANG VAN MINUUT

Hierdie dokument verskaf ondersteuning aan amptenare met hulle voorbereiding om ingeligte oordele te vel aangaande die vorderingsbesluite wat deur onderwysers geneem is. Dit verteenwoordig geen nuwe beleid of afwyking van enige vorige beleid nie.

2. AMPTELIKE BELEID

Die spesifikasies vir die AOO-band vir die WKOD is vervat in die WKOD-dokument van November 2003, genaamd "Assesseringsriglyne vir die Algemene Onderwys en Opleidingsband" Hierdie riglyne is weer gebaseer op die nasionale beleidsdokumente.

3. DIE ROL VAN ASSESSERING IN DIE BESTUUR VAN DIE LEER- EN ONDERRIGPROSES

Die Nasionale Departement van Onderwys se HNKV-riglyne vir die Ontwikkeling van Leerprogramme (2003) verklaar op bladsy 15 dat assessering moet vasstel wat 'n leerder ken, verstaan en/of kan doen en oordele moet vel wat op geldige en behoorlike getuienis gegrond is - Hierdie oordele moet ons dan in staat stel om goed-ingeligte besluite te neem oor wat 'n leerder volgende moet leer.

4. STEL VAN PROVINSIALE STANDAARDE

Vergaderings vir die vasstel van provinsiale- en distriksvlakstandaarde sal met verloop van tyd verseker dat daar 'n algemene standaard oor die provinsie heen sal bestaan. Vir hierdie doel sal drie klustervergaderings per jaar gehou word. Voldoende kennis sal gegee word en OBOS-personeel sal teenwoordig wees. Met verloop van tyd sal kurrikulumadviseurs in 'n posisie wees om klassse te besoek ten einde te verseker dat die werk voltooi word en op 'n behoorlike vlak geassesseer word.

5. DIE BETEKENIS EN FUNKSIE VAN KODES
5.1 Kodes 1- 4 is bedoel om die vlak aan te dui waarop 'n leerling in elke leerarea vorder. A "1" dui aan dat daar 'n probleem bestaan. Alle ander kodes dui aan dat 'n leerder 'n mate van vordering toon. Dit is die onderwyser wat die assesseringstake opstel en die leerder se werk nasien. Die kode verteenwoordig dus die onderwyser se professionele oordeel daaroor of die leerder leer of nie leer nie. Die onderwyser maak dus deurlopende assesserings aangaande 'n leerder se leer en vordering.
5.2 Die kodes word gebruik om prestasie aan te dui teenoor die standaard wat tot elke leerder op enige tydstip rekevant is. Dit is 'n wanbegrip om te dink dat leerders elke jaar moet begin deur 1's en 2's te behaal en dat hulle slegs oor die tyd heen na 'n 3 kan vorder.

6. DIE ROL VAN DIE ASSESSERINGSTANDAARDE
6.1 Assesseringstandaarde is ontwerp om konseptuele progressie aan te toon. Indien 'n oorhoofse vlak in 'n omvattende prestasie bereik word wat bewys lewer van suksesvolle voltooiing van 'n aantal hulp- of aanvullende assesseringstandaarde, is slegs 'n opsommingsrekord van daardie prestasie nodig.
6.2 Onderwysers hoef dus nie teenoor elke assesseringstandaard 'n inskrywing te maak nie.
6.3 Die assesseringstandaarde moet egter die onderwyser in sy/haar beplanning en onderrig lei om seker te maak dat leerders voortdurend vorder tot hoër vlakke van kennis en vaardighede en 'n meer komplekse, dieper en breër begrip.

7. VERSLAGGEWING
7.1 Die verslagkaart moet sinvol wees vir die ouer of voog. Dit word die beste bereik deur middel van eenvoudige en beskrywende rapporte wat die essensie van die hoofareas van onderwys en assessering vasvang en suksesse aandui sowel as areas wat ondersteuning verg. Die kode wat per leerarea of -program behaal is, moet op die rapportkaart verskyn.
7.2 Verslae deur die loop van die jaar dui aan op watter vlak die leerder presteer ingevolge die assesseringstandaarde en uitkomste wat in daardie kwartaal behandel is en nie ten opsigte van die hele reeks uitkomste en assesseringstandaarde vir die graad nie.

8. VORDERINGSBELEID
8.1 Die Assesseringsbeleid dui aan dat alle leerders in graad R tot 8 saam met hulle ouderdomsgroep vorder tensy hulle meer tyd in 'n graad benodig.
8.2 Slegs graad 9-leerders moet die vereiste vlakke vir vordering tot graad 10 bereik, soos aangedui in Omsendbrief 111 (2003) en die Regeringskoerant 25699 van November 2003.
8.3 Geen leerder mag meer as 4 jaar in 'n fase deurbring nie, tensy spesiale verlof daarvoor deur die Hoof van Onderwys verleen is.
8.3.1 Indien 'n leerder 'n graad R-jaar voltooi het, tel dit as een van die vier jare. Indien sodanige leerder geassesseer word as iemand wat 'n addisionele jaar in graad 3 benodig, moet die bogenoemde verlof verkry word.
8.3.2 Hierdie reël is van toepassing op graad 9-leerders ook. Hulle mag nie in daardie fase bly vir meer as 4 jaar tensy verlof formeel deur die Hoof van Onderwys verleen is nie. Die nodige regverdiging hiervoor moet sodanige versoek vergesel.

9. VORDERING: WAT DIT BETEKEN
9.1 Uitkomsgebaseerde onderwys is 'n ondersteunende stelsel; een wat die belange van die leerder sentraal plaas. Die kwessie wat ter sprake is in K2005 en die HNKV is nie vordering tot 'n ander graad nie - dit is om te verseker, deur monitering, assessering en ander meganismes dat onderrig en leer deur die hele jaar plaasvind.
9.2 Navorsing het aangedui dat die meerderheid leerders nie verbeter of meer ontvanklik vir leer raak indien hulle 'n graad herhaal nie. Navorsing dui ook aan dat leerders se vordering en ontwikkeling van mekaar verskil wat die tempo en tydsaspek betref.
9.3 Vordering beteken eenvoudig dat die leerder voortgaan om te leer en die uitkomste te bereik (teen die behoorlike assesseringstandaarde gemeet, waar toepaslik). Nie alle leerders bereik presies dieselfde standaarde aan die einde van die jaar nie. In die verlede kon 'n leerder slaag met 95% of 35% In uitkomsgebaseerde onderrig word die minimum slaagsyfer vervang deur getuienis dat 'n leerder vorder op pad na begrip en bevoegdheid, alhoewel op 'n ander vlak en teen 'n ander pas as sy/haar eweknieë. In plaas daarvan dat punte versamel en bygevoeg word, moet onderwysers bewyse versamel en interpreteer wat op die leerder se werk en assesseringsaktiwiteite gebaseer is.
9.4 Besluite oor die vordering van 'n leerder word deur die onderwyser geneem na gelang hy/sy die vordering en prestasie van die leerder deur die jaar monitor. Die besluit word aan die einde van die jaar bevestig. Dit beteken egter nie dat 'n onderwyser in die loop van die jaar kan besluit dat 'n leerder nie vordering sal maak nie. Die onderwyser moet bewys dat hy/sy alles probeer het om die leerder te laat vorder.Dit is onwaarskynlik dat enige leerder vir retensie geïdentifiseer sal word kort na die begin van die vierde kwartaal. Uitsonderlike gevalle kan egter aandag ontvang sodra die onderwyser die behoefte om die leerder terug te hou geïdentifiseer het.

10. VORDERING: DIE NEEM VAN BESLUITE
10.1 Indien daar genoegsame vordering is om aan te dui dat die leerder, hoewel stadiger as ander, wel duidelik besig is om te verbeter, behoort daardie leerder toegelaat te word om na die volgende graad te gaan waar hy/sy addisionele ondersteuning sal moet ontvang.
10.2 Indien dit duidelik is dat die leerder nie vordering maak nie, en klaarblyklik meer tyd benodig om met die kennis en vaardighede in die huidige graad vertroud te raak, mag die leerder teruggehou word.
10.3 Kringbestuurders of multifunksionele spanne sal die onderwyser se besluit oor watter leerders behoort te vorder en watter meer tyd nodig het in die graad onderskryf of verwerp. Aangesien dit nie 'n tegniese besluit is wat op kodes of persentasies gebaseer is nie, moet skole met die kringbestuurder en/of multifunksionele span saamwerk vanaf die begin van die vierde kwartaal ten opsigte van leerders wat nie genoegsame bewyse van vordering getoon het nie.

Die kringbestuurder of multifunksionele span sal seker maak

  • dat genoegsame ondersteuning verskaf is soos per Omsendbrief 108/1999.

  • verseker dat ouers of voogde geraadpleeg is.

  • kurrikulumadviseurs versoek om die bewyse van die leerder se werk en assesseringstake te hersien.
10.4 'n Kwalitatiewe verslag deur die onderwyser, wat gerugsteun kan word deur getuienis van assessering en ondersteuning en wat die terughouding van 'n leerder motiveer, moet die besluit van die kringbestuurder of multifunksionele span lei, en nie 'n gemiddelde van kodes nie.
10.5 Na hierdie preliminêre werk onderneem is, sal die kringbestuurder of multifunksionele span aan die einde van die jaar in 'n posisie verkeer om te bevestig dat hierdie leerders in dieselfde graad teruggehou moet word, indien daar geen verandering in hulle posisie is aan die einde van die jaar nie.
10.6 Senior kringbestuurders en leiers van multifunksionele spanne moet vergader om 'n bestuursplan op te trek en seker te maak dat hulle bekend is met die kriteria vir die terughouding van leerders. Hierdie kriteria sal verband hou met die kwalitatiewe verslag van die onderwyser sowel as die beskikbare getuienis van assesserings en die ondersteuning wat gebied is.

11. SPESIALE KATEGORIEË
11.1 Waar die gevolge die produk is van swak gedissiplineerde gedrag, moet die prinsipaal aandui hoe die probleem hanteer word, hoe die skool se dissiplinêre beleid toegepas is, watter stappe gedoen is en wat onderskeidelik gedoen sal word om die probleem in die volgende jaar die hoof te bied.
11.2 Indien daar oormatige afwesigheid was, soos blyk uit die portefeulje, moet daar ooreenkomstige getuienis wees van intervensiestappe wat geneem is.
11.3 Kwessies soos 'n probleem t.o.v. die taal is (bv. t.o.v. die taal van onderrig en leer), die waarde van 'n leerder se vordering saam met sy of haar vriende en eweknieë, of die leerder se selfkonsep, moet hierdie sake ook in ag geneem word. Vir sover dit moontlik is, moet sodanige leerders addisionele ondersteuning geniet in die volgende graad.

12. DIE ROL VAN SKOOLLEIERSKAP

Prinsipale moet verseker dat hulle verantwoordelikheid neem vir alle sake wat in verband staan met assessering in hulle skool, ingesluit interne moderering, en hulle moet afwesigheid en dissiplinêre probleme wat die vordering van leerders vertraag, aanspreek. Dit beteken nie dat hulle onderwysers met die rekordhouding of ander verwante administratiewe funksies moet oorlaai nie. Multifunksionele spanne sal ondersteuning bied waar versoek, maar kan nie die verantwoordelikheid van prinsipale oorneem nie.


GETEKEN: P.A. VINJEVOLD
HOOF: ONDERWYS
DATUM: 2004:10:18