1. Prinsipale en opvoeders by inrigtings van die Wes-Kaap Onderwysdepartement (WKOD) word aangemoedig om vroulike leerders wat tans Wiskunde HG en Wetenskap HG op graad 12-vlak bestudeer, of in 2002 of 2003 bestudeer het, te nomineer vir Carnegie-Suid-Afrika se beurstoekennings vir voorgraadse studie.
2. Carnegie-Suid-Afrika se studiebeursprogram is 'n inisiatief van die Nasionale Departement van Onderwys (DvO) in samewerking met Carnegie in die Verenigde State van Amerika. Die program het ten doel die verhoging van die getalle vroue wat die wetenskap-, tegnologie-, ingenieurs-, gesondheidswetenskappe-, ekonomiese en onderwysstudievelde betree en daarin gradueer. Tot dusver het dertien vroulike studente van die Wes-Kaap gebaat by hierdie merkwaardige program wat fondse voorsien het en sal voorsien vir drie groepe vroulike studente wat in 2003, 2004 and 2005 vir hoër onderwys ingeskryf het of sal inskryf.
3. Om vir die studiebeurs in 2005 in aanmerking te kan kom, moet vroulike studente in hulle graad 12-jaar aan 'n Suid-Afrikaanse openbare skool wees of moes hulle in 2002 of 2003 by so 'n skool gematrikuleer het. Aansoekers moet Suid-Afrikaanse burgers wees, onder die top 5% presteerders in hulle graad 12-jaar en belangstelling toon in een van die bogenoemde studievelde. Oorweging sal aan finansiële behoeftes geskenk word. Elke WKOD-openbare skool met vroulike leerders in graad 12 sal geregtig wees op twee vorms. Hierdie skole, asook studente wat reeds die skool verlaat het, sal vorms by die Onderwysbestuurs-en-Ontwikkelingsentrums (OBOS'e) of Hoofkantoor kan bekom.
4. Inligting rakende die reëls en die keuringsprosedure word op die aansoekvorm voorsien. Voltooide aansoekvorms moet by die volgende adres ontvang word teen nie later nie as 17 September 2004: 
Carnegie-Suid-Afrika Studiebeursprogram
Departement van Onderwys
Privaatsak X895
Pretoria
0001


GETEKEN: P.A. VINJEVOLD
HOOF: ONDERWYS
DATUM: 2004:07:27