1. Sedert Oktober 2002 is 'n aantal inisiatiewe onderneem om onderwysers te help met die bestuur van die oorgang van leerders van Kurrikulum 2005 in graad 9 tot die Verslag 550 Kurrikulum graad 10.
2. Alle hoër en intermediêre skole is voorsien van vakriglyne vir die hantering van basiese vakkennis en vaardigheidsleemtes wat deur leerders in graad 10 ondervind kan word. 'n Aantal assesseringsriglyne is ook versprei. Laasgenoemde het ten doel die versterking van 'n algemene begrip en die voorsiening van toepaslike voorligting om vakbeplanning, metodologie en assesseringspraktyke te bevorder.
3. 'n Ontleding van die 2003 graad 10-vorderingsprestasie het onthul dat beide onderwysers en leerders sou baat by verdere intervensie en ondersteuning en gevolglik is 'n moniteringsinstrument in 2003 in 'n aantal skole geloods en vir implementering in 2004 verfyn. Die doel van hierdie moniteringsinstrument is om terugvoering van onderwysers te bekom oor daardie kurrikulumkwessies wat as onderrig- en leerstoornisse fungeer wanneer leerders van die AOO- na die VOO-band vorder.
4. Senior Kurrikulumbeplanners van Hoofkantoor sal in die loop van die derde kwartaal relevante vakonderwysers in 'n steekproef skole besoek en onderhoude met hulle voer. Skole wat as deel van die steekproef geïdentifiseer is, sal vooraf deur hulle onderskeie OBOS'e daarvan in kennis gestel word. Onderwysers word aangeraai om bewyse van werk wat gedoen is voor te lê om werklike probleemidentifikasie te fasiliteer.
5. Inligting wat op hierdie wyse ingewin word, sal binne 'n sistemiese konteks van onskatbare waarde wees vir die identifikasie van leerstoornisse en sal die WKOD in staat stel om die stoornisse effektief en doeltreffend aan te spreek. Daarbenewens sal dit dien as basis vir die voorgenome VOO: NKV-opleidingsproses wat in 2005 'n aanvang sal neem.
6. Ondersoeke soos hierdie bied aan skole en vakonderwysers die geleentheid om ondervindinge te deel en om bydraes te lewer tot die verbetering van die kurrikulumbystandsprogramme wat deur die WKOD aangebied word.
7. Prinsipale word versoek om al hulle personeellede te verwittig van hierdie bystandsinisiatief.


GETEKEN: J.P. RAULT-SMITH
HOOF: ONDERWYS
DATUM: 2004:06:30