1. Ingevolge die Regulations pertaining to the National Curriculum Statement Grades R-12, afgekondig in Kennisgewing No. R1114, Regulasiekoerant No. 9886 van 28 Desember 2012, mag 'n leerder een keer in die Verdere Onderwys en Opleidingsfase agtergehou word om te voorkom dat die leerder vir langer as vier jaar in hierdie fase agterbly.

2. Dit beteken dat 'n leerder wat nie aan die bevorderingsvereistes in graad 10 of graad 11 voldoen nie nadat die graad herhaal is, toegelaat mag word om tot die volgende graad bevorder te word. Maar, sodanige leerder moet aan alle vereistes van die Nasionale Senior Sertifikaat (NSS) aan die einde van graad 12 voldoen vir toekenning van die Nasionale Senior Sertifikaat (NSS).

3. Met inagneming hiervan, is die bevordering tot of graad 11 of graad 12 onderworpe aan die volgende kriteria:

  1. Die leerder moes óf graad 10 óf graad 11 gedruip, en of graad 10 of graad 11 herhaal het.
  2. Die leerder moes 30% in vier van die sewe vakke wat vir die NSS aangebied word, behaal het. Dit sluit Taal van Leer en Onderrig (TLO) en drie ander vakke uit Groepe A en/of B in, insluitend Lewensoriëntering.
  3. Die leerder moes gereeld skool bygewoon het. Afwesigheid van meer as 20 onderrigdae sonder 'n geldige rede sal die leerder diskwalifiseer om bevorder te word. Dit geld as ongereelde bywoning.
  4. Die leerder moes aan die voorgeskrewe skoolgebaseerde assesserings (SGA)-vereistes vir alle vakke wat aangebied word, voldoen het, insluitend die vakke wat gedruip is.
4. Die meervoudige eksamengeleentheid (MEG) aan die einde van graad 12 mag slegs aan leerders wat van graad 11 tot graad 12 bevorder is, gebied word om sy/haar NSS-eksamens suksesvol te voltooi.

5. Die MEG is 'n toegewing wat gemaak word om 'n minimum van vier vakke (insluitend Lewensoriëntering) in die graad 12-jaar af te lê en die oorblywende vakke in die Junie-eksamens van die volgende jaar. Dit mag slegs aangebied word as daar aan al die volgende kriteria voldoen word:

Die graad 12-leerder moes:

  1. vanaf graad 11 tot graad 12 bevorder wees;
  2. al sy/haar SGA-vereistes in al sewe vakke in graad 12 voltooi het;
  3. skool gereeld bygewoon het (afwesigheid van meer as 20 onderrigdae sonder 'n geldige rede);
  4. die September-eksamens in alle vakke afgele het; en
  5. 'n minimum van drie vakke in die 2018 September-eksamens gedruip het.
6. Die MEG-opsie is ingestel om leerders wat van graad 11 tot graad 12 bevorder is, te akkommodeer. Hierdie leerders se prestasies in graad 12 mag aandui dat hulle nie die vereistes wat gestel word om al ses vakke in een sessie te skryf, sal kan hanteer nie.

7. Alle skole moet saam met hulle ouers/voogde vanaf November 2018 getrou bly aan die bevorderingstelselprosedures en die toepassing van die MEG.
7.1 Nadat die besluit oor die bevordering van 'n graad 11-leerder tot graad 12 op skoolvlak geneem is, sal die ouers/voogde van alle leerders wat bevorder is, versoek word om 'n verbintenisooreenkoms (Bylae A) te teken, waar:

  1. die ouer/voog erken dat sy/haar seun/dogter nie aan die kriteria voldoen het om tot graad 12 te vorder nie;
  2. die ouer/voog erken dat sy/haar seun/dogter 'n spesiale toegewing toegestaan is om tot graad 12 bevorder te word; en
  3. die ouer/voog erken dat die prinsipaal, in oorlegpleging met hulle, sal versoek dat hulle 'n aansoek moet teken sodat die leerder die MEG-proses aan die einde van graad 12 kan volg (Bylae B), mits die leerder aan al die kriteria voldoen.
7.2 Hierdie proses moet teen 20 Januarie elke jaar afgehandel wees. Die getekende verbintenisooreenkoms moet by skole geliasseer word en beskikbaar gestel word vir bevestiging.
7.3 Die prinsipaal en kringbestuurder moet seker maak dat die stand van die leerder wat bevorder is korrek op SOBIS teen 20 Januarie elke jaar aangedui word.
7.4 Die prinsipaal moet deur die hele graad 12-jaar voldoende ondersteuning aan die bevorderde leerder bied.
7.5 Die prinsipaal moet die prestasie van die bevorderde leerder in elke kwartaal monitor en die ouer/voog van 'n geskrewe verslag oor die leerder se vordering aan die einde van elke kwartaal voorsien.
7.6 Elke kwartaallikse verslag moet die vak(ke) waarin die leerder nie goed presteer het nie aandui, en die leerder mag derhalwe versoek word om daardie vak(ke) na die Junie-eksamens van die volgende jaar te verskuif en dit dan te skryf.
7.7 Dit behels dat die besluit oor of die bevorderde leerder die MEG-opsie sal volg, sal afhang van die leerder se prestasie in die afsonderlike vakke in kwartaal een en kwartaal twee en in die voorbereidende eksamen in kwartaal drie. Die prestasie in die voorbereidende eksamen sal die hoof-beslissende faktor wees wat sal bepaal of 'n leerder versoek sal word om die MEG-opsie te volg.
7.8 Na die voorbereidende eksamen in September, mag die prinsipaal die ouer/voog en die bevorderde leerder raadpleeg oor die aansoek om die MEG-opsie.

  1. Die MEG-opsie is slegs van toepassing op leerders wat tot graad 12 bevorder is en aan al vyf kriteria voldoen het.
  2. Leerders wat tot graad 12 bevorder is en 'n aanvaarbare prestasievlak in alle vakke in hulle graad 12-jaar getoon het, sal toegelaat word om al ses vakke in die graad 12-eksamens af te lê.
  3. Die prinsipaal sal op die aansoek, Bylae B, die vier vakke (insluitend Lewensoriëntering) aandui wat in die graad 12-jaar geskryf sal word, en die drie vakke wat in die Junie-eksamen van die volgende jaar geskryf sal word.
  4. Die prinsipaal moet die getekende Bylae B en ander toepaslike dokumentasie bere ingeval bewys daarvan deur die distrikskantoor of Hoofkantoor aangevra word.
  5. Die identifikasie van die MEG-leerders moet op SOBIS aangebring word.
8. Distrikte moet die skole aandagtig monitor om te verseker dat die beleid oor leerderbevordering en die meervoudige eksamengeleentheid voldoende toegepas word.

9. Die besluite wat oor bevordering en die MEG geneem word, moet in die leerder se belang geneem word.

10. U word vriendelik versoek om die inhoud van hierdie omsendbrief onder die aandag van alle onderwysers, ouers/voogde en leerders by u skool te bring.


GETEKEN: HA LEWIS
WAARNEMENDE HOOF: ONDERWYS
DATUM: 2018:12:10

"Regulation Gazette No. 9886"  (grootte: 854 KB)
Bylae A: Verbintenisooreenkoms  (grootte: 91 KB)
Bylae B: Aansoek om Meervoudige Eksamengeleentheid (meg)  (grootte: 80 KB)