1. 2019 onderwysdiensstate

Verwys asseblief na die Wes-Kaap Onderwysdepartement (WKOD) Omsendbrief 0031/2009 van 28 Augustus 2009 vir 'n volle beskrywing van die wetgewing en maatreëls van toepassing op die jaarlikse uitreik van onderwysdiensstate aan skole. Toegang tot die genoemde omsendbrief kan op die WKOD se webwerf onder "circulars 2009" verkry word. Benewens die volgende wysigings, bly die inhoud van daardie omsendbrief van toepassing op 2019:
1.1 Ingevolge die maatreels van die Hersiene Posverspreidingsmodel, moet gewone openbare skole en spesiale openbare skole teen 30 September van die voorafgaande jaar van hul jaarlikse onderwysdiensstate voorsien word. Dus, vir die 2018 akademiese jaar sal alle onderwysdiensstate wat aan gewone openbare skole uitgereik is (asook alle addisionele poste wat in 2018 as gevolg van 'n toename in die leerdertalle of die kurrikulumbehoeftes van die skool geskep is vir en uitgereik is aan 'n openbare skool) op 31 Desember 2018 verval.
1.2 Die onderwysdiensstate vir 2019 sal op 24 Augustus 2018 op die Sentrale Onderwysbestuursinligtingstelsel (SOBIS) onder die skakel "Administration (Establishments)" gepubliseer word.

2. Addisionele toekennings (Posvlak 1-poste)

Hierdie kantoor is verplig om die toekenning van die onderwysdiensstaat van 2019 te hersien indien daar bevind word dat die inligting oor 'n skool, soos vervat op SOBIS, nie korrek is nie.
3. Hersiening van die 2019 onderwysdiensstate
3.1 Skole kan 'n hersiening van die berekening van hul onderwysdiensstaat aanvra indien die SOBIS-leerdertalle op die onderwysdiensstaatbrief van die leerderdata op 31 Julie 2018 verskil. Ten einde hierdie kantoor in staat te stel om die berekening uit te voer, moet die skool bewyse aan die Direktoraat: Strategiese Mensbestuur voorle dat die leerdertalle, soos gebruik en in die onderwysdiensstaatbrief vermeld, foutief is. Hierbenewens kan skole wat aandui dat hulle genoeg klaskamers het en addisionele leerders ingeskryf het, of van voorneme is om addisionele leerders vir 2019 in te skryf, vir addisionele poste aansoek doen. Aansoeke moet tussen 27 Augustus 2018 en 14 September 2018 ingedien word en alle aansoeke moet op SOBIS gedoen word. Aansoeke vir addisionele poste sal slegs oorweeg word indien dit op SOBIS voltooi is.
3.2 In die geval waar 'n skool 'n graad of grade uitfaseer, sal die onderwysdiensstaat hersien word, gebaseer op die aantal leerders wat in die skool agterbly. In die geval waar leerders 'n skool verlaat tydens die uitfasering van 'n graad of grade, sal die onderwysdiensstate van die ontvangende skool (skole) hersien word.

4. Herberekening van die onderwysdiensstaat as gevolg van 'n verandering in leerdertalle in 2019
4.1 Die WKOD behou die reg voor om Posvlak 1-poste af te skaf indien daar deur die loop van 2019 'n afname in die skool se leerdertalle is. In sodanige gevalle sal onderwysers wat tydelik aangestel is, na konsultasie, na poste by ander skole oorgeplaas word. Daarom, indien onderwysers op 'n tydelike basis gewerf word, moet prinsipale aansoekers inlig dat hulle aangestel sal word met die verstandhouding dat hulle moontlik na ander skole oorgeplaas kan word indien hul poste as gevolg van 'n afname in die leerdertalle by die skool afgeskaf word.
4.2 Alle kontrakaanstellings moet vir 12 maande wees indien dit teen 'n addisionele kontrakpos is wat vir 12 maande aan die skool toegeken is. Hierdie nominasies moet deur middel van die the Contract Appointment Tracking (CAT) -stelsel by Hoofkantoor ingedien word.
4.3 Kontrakaanstellings teen permanente vakante poste moet vir 'n tydperk van ses maande gemaak word indien die skool vir sodanige pos kwalifiseer. Indien dieselfde pos na ses maande steeds vakant is, moet dit deur dieselfde posbekleer gevul word, mits sy of haar prestasie bevredigend is.
4.4 Alle skole word versoek om hul leerdertalle teen Dinsdag, 05 Maart 2019 op SOBIS by te werk. Die onderwysdiensstate van alle skole waarvan die leerdertalle minder is as hul leerdertalle op 31 Julie 2018 sal teen 22 Maart 2019 herbereken word. Indien die skool 'n pos of poste gaan verloor, sal die getal kontrakaanstellings wat gelyk is aan of minder is as die getal poste wat die skool verloor dienooreenkomstig vanaf 01 April 2019 hersien word.
4.5 In gevalle waar daar vanaf 09 Januarie 2019 tot 18 Januarie 2019 'n toename in leerdertalle is, kan die skool gedurende die tydperk van 07 Januarie 2019 tot 21 Januarie 2019 aanlyn om 'n groeipos of groeiposte aansoek doen. Die leerdertaltotaal wat in ag geneem sal word, sal die leerdertaltotaal op SOBIS ten tye van die aansoek wees. Slegs aansoeke wat op SOBIS ingedien is, sal aanvaar word.

Die distrikskantoor word versoek om seker te maak dat alle skole hul aansoeke teen 21 Januarie 2019 aanlyn indien.
4.6 Prinsipale se aandag word op die volgende gevestig:

  • Nominasies vir onderwysers in addisionele poste, waarvoor aansoek gedoen is as gevolg van groei en/of kurrikulumbehoeftes van die skool, kan slegs na skriftelike goedkeuring van Hoofkantoor gemaak word.
  • 'n Onderwyser mag nie met haar/sy pligte begin voor goedkeuring vir 'n addisionele pos nie deur Hoofkantoor gegee is nie.
5. Vul van geadverteerde poste
5.1 Alle poste wat reeds in 'n WKOD Vakaturelys geadverteer is, mag permanent gevul word, mits daardie poste op die onderwysdiensstaat vir 2019 verskyn.
5.2 Indien 'n geadverteerde pos nie op die onderwysdiensstaat vir 2019 verskyn nie, is die skool nie op daardie pos geregtig nie en sal sodanige pos as foutiewelik geadverteer beskou word.
5.3 Die bepaling dat 'n geadverteerde pos (veral 'n bevorderingspos) slegs gevul kan word indien dit nie veroorsaak dat 'n botallige onderwyser geskep word nie, bly van krag.
5.4 Indien die prinsipaal en die beheerliggaam van mening is dat die posbeskrywing van die geadverteerde pos nie langer aan die kurrikulumbehoeftes van die inrigting voldoen nie, mag hulle hierdie kantoor versoek om die pos as foutiewelik geadverteer te beskou. 'n Gedetailleerde verduideliking wat deur die prinsipaal en die voorsitter van die beheerliggaam onderteken is, moet sodanige versoek vergesel.
5.5 Ten einde stabiliteit in 2019 te verseker, beoog die WKOD om die omskakelproses te gebruik om Posvlak 1-poste vir aanstelling op 01 Januarie 2019 te vul. Waar poste vasgelê is om in Vakaturelys 02/2018 geadverteer te word en die skool 'n geskikte opvoeder geïdentifiseer het wat van tydelike tot permanente status omgeskakel kan word, kan die advertensie van die vakaturelys verwyder word.

6. Vul van vakante substantiewe poste (gebaseer op onderwysdiensstate van 24 Augustus 2018)
6.1 Die Departement ondervind steeds die finansiële beperkinge ten opsigte van die Vergoeding van Werknemers (VvW) -begroting vir die 2018/2019 tot 2020/2021 mediumtermyn uitgaweraamwerke. Een van die strategieë wat in 2018 ondersoek is, was om die impak van die VvW-uitgawe te verminder deur botallige onderwysers doeltreffend te bestuur, wat die laterale oorplasing van onderwysers tussen skole met vakatures en die benutting van botallige onderwysers waar kurrikulumuitdagings ervaar is, ingesluit het.
6.2 Die departement sal weer maatreëls implementeer en die effektiewe gebruik en aanwending van botallige onderwysers in 2019 noukeurig monitor. Die volgende stappe sal binne die tydsraamwerke wat geïdentifiseer is, gedoen word:

Intervensie en aktiwiteite Tydsraamwerk
Alle onderwysers wat nie in die 2019 onderwysdiensstate vir 2019 geabsorbeer kan word nie, word formeel botallig verklaar. 01-30 September 2018
Distrikte identifiseer geskikte poste vir onderwysers wat botallig verklaar is vir 2019 en konsulteer met prinsipale/ beheerliggame vir die plasing van die botallige onderwysers. Formele plasingsbriewe sal uitgereik word aan botallige onderwysers wat gepas en in vakante substantiewe poste vir 2019 geplaas kan word. 01-31 Oktober 2018
Distrikte voorsien Hoofkantoor van 'n lys met onderwysers wat nie geplaas kan word nie, vir plasing in ander distrikte. 31 Oktober 2018
Hoofkantoor maak aanbevelings aan distrikte vir plasing in distriksposte. 01-30 November 2018
Formele plasingsbriewe word uitgereik aan botallige onderwysers wat paslik in vakante substantiewe poste vir 2019 geplaas kan word. 01-30 November 2018
Botallige onderwysers wat nie gepas en geplaas kan word nie, moenie deel van die skool se roosterbeplanning vir 2018 uitmaak nie. 10 Desember 2018
In gevalle waar skole addisionele onderwysers as gevolg van groei in leerdertalle benodig, sal distrikte met prinsipale/beheerliggame vir die plasing van botallige onderwysers onderhandel. Formele plasingsbriewe sal uitgereik word aan onderwysers wat paslik geplaas kan word. 15 January 2019
6.3 Onderwysers wat reeds as botallig verklaar is - gebaseer op vorige onderwysdiensstate en in ooreenstemming met vorige prosesse - en wat steeds botallig is, behou hul botallige status. Hierdie onderwysers sal ingevolge die geldende kollektiewe ooreenkomste van die Raad op Arbeidsverhoudinge in die Onderwys (RAVO) hanteer word.
6.4 Onderwysers wat permanent aangestel is, moet ingevolge Kollektiewe Ooreenkoms 4 van 2016 van die RAVO as botallig geïdentifiseer word.
6.5 Daar sal voortgegaan word met pogings om botallige onderwysers gedurende die 2019 akademiese jaar te plaas onderwysers die diens van die WKOD verlaat en waar die botalige onderwysers se profiel aan die kurrikulumvereistes van die vakante pos/te voldoen.
6.6 Aanstelling van pas gekwalifiseerde onderwysers:

'n Ander strategie om die kostes op die VvW-begroting te verminder is om eerder pas afgestudeerde onderwysers in die WKOD aan te stel as onderwysers wat reeds hoë salarisse verdien. Sodoende tref ons voorsorg dat nuwe onderwysers die diens van die WKOD betree.

'n Pas afgestudeerde onderwyser word gedefinieer as 'n finalejaarstudent en/of 'n gekwalifiseerde onderwyser wat die afgelope drie jaar gegradueer het en nog nooit in diens van die staat was nie. Hierdie groep sluit Funza Lushaka-beurshouers in.

Terselfdertyd erken ons dat skole die uiteindelike keuse behoort te he om die beste persoon vir hul skool te werf. Ten einde te verseker dat ons die verskillende belange balanseer, word prinsipale en beheerliggame genooi om die Hoof van Onderwys direk skriftelik te nader (en die Distriksdirekteur hierby insluit) indien hulle sterk besware teen die aanstelling van sodanige pas afgestudeerde onderwysers by hul skole het, en die resultaat van hul petisie afwag. Sodanige petisies behoort minstens twee weke voordat die onderwyser diens aanvaar, ingedien te word sodat elke geval na behore oorweeg kan word.
6.7 Ander paslik gekwalifiseerde onderwysers

Slegs gekwalifiseerde onderwysers met 'n ROKW 13 of hoer kwalifikasie kan vir vakante substantiewe onderwysposte oorweeg word. Hierdie kantoor sal dit oorweeg om ander onderwysers aan te stel indien geen gekwalifiseerde onderwysers uit bogenoemde kategorieë geïdentifiseer kan word nie.

7. Vul van addisionele onderwysposte (gebaseer op aansoeke vir groei- en kurrikulumbehoeftes tussen 27 Augustus 2018 en 14 September 2018)
7.1 Voorkeur vir de vul van addisionele onderwysposte sal in die volgende rangorde gegee word:

  • Botallige onderwysers
  • Pas gekwalifiseerde onderwysers
  • Ander paslik gekwalifiseerde onderwysers

Slegs gekwalifiseerde onderwysers met 'n ROKW 13 of hoër kwalifikasie kan vir vakante en addisionele onderwysposte oorweeg word. Hierdie kantoor sal slegs oorweeg om ander onderwysers in diens te neem indien geen gekwalifiseerde onderwysers uit bogenoemde kategorieë geïdentifiseer kan word nie. Aansoeke vir die aanstelling van tydelike onderwysers in die volgende kategoriee moet vooraf deur die Hoofdirektoraat: Mensbestuurspraktyke goedgekeur word:

  1. Onderwysers ouer as 65 jaar;
  2. Onderwysers wat die staatsdiens om die volgende redes verlaat het:
    1. Aftrede
    2. Bedanking
    3. Swak gesondheid
    4. Wangedrag
    5. Drostery
  3. Buitelandse onderwysers;
  4. Ongekwalifiseerde en ondergekwalifiseerde onderwysers.
7.2 Distrikskantore kan ook oorplasings na ander skole goedkeur in gevalle waar die oorplasing die proses van herontplooiing sal bevorder, d.w.s waar die oorplasing die herontplooiing van 'n botallige onderwyser in 'n vakante substantiewe pos tot gevolg sal hê. Hierdie maatreel geld ook in gevalle waar die oorplasing 'n pas gekwalifiseerde onderwyser sal toelaat om in die pos, wat weens die oorplasing ontruim is, aangestel te word.

8. Navrae

Alle navrae aangaande hierdie omsendbrief en die tersaaklike wetgewing moet aan kringbestuurders gerig word.

9. Algemeen

Die inhoud van hierdie omsendbrief moet onder die aandag van alle onderwysers en lede van die beheerliggaam gebring word.


GETEKEN: BK SCHREUDER
HOOF: ONDERWYS
DATUM: 2018:08:23