1. Die Wes-Kaap Onderwysdepartement se visie van "gehalteonderwys vir elke kind in elke klaskamer in elke skool" plaas die fokus van alle aktiwiteite by ons skole, veral in klaskamers waar die meeste onderrig en leer plaasvind, op onderrigmetodes wat leer sal versterk.
2. Die 21ste eeu waarin ons leerders moet funksioneer, vereis vaardighede bo en behalwe die verwerwing van vakinhoudkennis. Terwyl geletterdheid en syfervaardigheid sleutelboublokke bly om kennis te verstaan, te gebruik en te skep, sien ons reeds dat die hedendaagse wêreld van almal vereis om vaardige kommunikeerders en effektiewe medewerkers te wees wat in staat is om probleme op te los en kreatiewe en kritiese denkvaardighede te gebruik om die wêreld waarin ons leef, te ondersteun.
3. Ten einde leerders te ondersteun om hierdie bekwaamhede te verwerf in die kort tyd wat hulle in skole spandeer, moet ons op effektiewe onderrig fokus wat tot die beste moontlike leer sal lei. Dit is moontlik wanneer gehalteonderrig en assessering van gehalte plaasvind in ondersteunende skool- en klaskameromgewings wat gesteun word deur 'n kultuur van reflektiewe praktyk vir voortdurende verbetering.
4. Die meeste navorsingstudies toon dat gesonde onderrigleierskap en gehalteonderrig, wat deur pedagogie ingelig word wat die beste kans het om leer te verdiep, krities is om ons gestelde visie te verwesenlik. Navorsing het ook bevind dat onderwysers, wat deur kundige onderrigleierskap van Skoolbestuurspanne (SBS'e) ondersteun word, 'n beduidende impak het om leerders, wat uit verskillende agtergronde kom en verskillende leerbehoeftes het, te help om hul leerwinste maksimaal te optimaliseer.
5. In 'n poging om onderrigleierskap en onderrig vir verbeterde leer te ondersteun, beklemtoon die aangehegte ondersteuningsmatriks die sleutelkomponente waarop ons graag wil he onderwysers in elke klaskamer moet fokus. Vir elk van hierdie elemente word 'n pedagogiese vraag gestel om die denke oor die gebruik van onderrigmetodes te rig. Hierdie ondersteuningsmatriks is nie 'n plaasvervanger vir die GGBS-kriteria nie en het niks met die GGBS-proses te doen nie. Die enigste doel van die matriks is om dag-tot-dag gehalteonderrig en assessering van gehalte in elke klaskamer te ondersteun. Dit het niks met onderwyserevaluering te doen nie.
6. Enige poging wat daarop gemik is om onderrigbekwaamheid te verbeter, vereis eerlike selfrefleksie oor jou huidige onderwyspraktyke (die suksesse en swakpunte) en om dan ingeligte besluite te neem oor die volgende logiese stappe om as 'n professionele persoon te groei. Ten einde hierdie proses te bevorder, beklemtoon die matriks tipiese onderrigkaraktereienskappe wat 'n ontwikkelende, 'n effektiewe of 'n hoogs effektiewe onderwyser kan demonstreer. Op hierdie manier kan elke onderwyser oor sy/haar eie praktyk reflekteer en 'n gevoel kry van die vlak waarop hy/sy in terme van elke onderrigkomponent presteer. Die matriks help ook om vas te stel wat die volgende ontwikkelingsvlak van bevoegdheid is waarop die onderwyser kan werk.
7. Binne vakkonteks sal ons Vakadviseurs onderwysers kurrikulum- en pedagogiese ondersteuning gee in terme van die agt onderrigkomponente ten einde verbeterde leer te verseker.
8. Nog 'n kritiese dimensie van hierdie ondersteuningsinisiatief is die onderrigleierskap wat van prinsipale, departementshoofde en vakhoofde moet kom. As kurrikulumleiers moet die skoolhoof en sy/haar bestuurspan prosesse instel om te verseker dat leerders op die beste moontlike maniere leer en dat skoolgebaseerde assessering (formeel en informeel) gebruik word om leer en onderrig te verbeter. Dit is in hierdie leierskapsdimensie dat kringbestuurders en ander distriksamptenare 'n belangrike rol in die ondersteuning van leierskapspanne by skole sal speel.
9. Die matriks bied aan ons 'n woordeskat om oor gehalteonderrig te praat en te dink en om beter maniere te vind om as personeel te visualiseer hoe ons skole meer beduidend kan bydra om leerders te help ontwikkel en voor te berei om die geleenthede na skool te gebruik en tot die samelewing by te dra.
10. Hierdie jaar is as die Jaar van Waardesgedrewe Leer verklaar. Baie van die elemente in die ondersteuningsmatriks is daarop gerig om waardes in te skerp wat leerders sal help om hul selfbeeld te bou en die uitdagings wat ons as samelewing in die gesig staar, te bemiddel. Deur hierdie waardes te demonstreer in ons onderrig en in die manier waarop ons assessering ontwerp en gebruik, sal ons leerders se assimilasie van daardie waardes vergemaklik.
11. Prinsipale en onderwysers word aangemoedig om by hierdie ondersteuningsmatriks vir gehalteonderrig en assessering betrokke te raak om die gesprek oor die bereiking van beter leeruitkomste vir elke leerder te handhaaf. Daar word dus aanbeveel dat besprekings oor die onderrigkomponente deel word van die professionele ontwikkelingsprogram by skole.
12. Ons leerders is ons toekoms. Kom ons doen alles in ons vermoë om die gehalte van ons onderrig, asook wat en hoe leerders leer, te verbeter. Wees verseker van die ondersteuning van distriks- en hoofkantooramptenare op ons gesamentlike reis om voortdurende verbetering van die leerervarings wat by ons skole aangebied word, te bewerkstellig.
13. Die matriks is in die drie amptelike tale van die Wes-Kaap beskikbaar. Vir die beste gebruik word dit aanbeveel dat dit op A3-papier gedruk word.


GETEKEN: BK SCHREUDER
HOOF: ONDERWYS
DATUM: 2018:02:26

Ondersteuningsmatriks vir kwaliteit onderrig en leer  (grootte: 80 KB)