1. Le setyhula mayifundwe neSetyhula 0212/2003 kwakunye neMimiselo ephathelele kweZona Yure ziseZantsi zoKufundisa kwiVeki yeSikolo nganye nakuSuku lweSikolo ngalunye kwiZikolo zikaRhulumente eNtshona Koloni, (Regulations relating to the Minimum Teaching Hours per School Week and School Day in Public Schools in the Western Cape), eyapapashwa kwiSongezelelo kwiGazethi yePhondo 7065 ye-28 Novemba 2012, kunye nayo nayiphi na eminye imigaqo-nkqubo nemithetho echaphazelekayo.
2. ISebe leMfundo leNtshona Koloni (ISebe iWCED) liqaphele ukuba kukho iziphene ezithile ekuphunyezweni koMthetho weZikolo zaseMzantsi Afrika, 1996 (uMthetho 84 ka-1996) (South African Schools Act (SASA), 1996 (Act 84 of 1996)). Isiqendu 20(1)(f) seSASA sifuna ukuba ibhunga lolawulo lesikolo sikarhulumente limiselwe amaxesha osuku lwesikolo angqinelana nemiqathango esebenzayo yezengqesho yabasebenzi abasesikolweni.
3. Kufunyaniswe ngoku ukuba izikolo ezininzi kwiphondo azinayo imigaqo-nkqubo equka konke engamaxesha esikolo. Izikolo ezininzi zikhokelwa yimbono eqhelekileyo nesuselwa kwimbali ethile yokuba isikolo simele ukuqala ngo-08:00 yaye siphume ngo-14:30.
4. Injongo yesi sikhokelo siqhotyoshelweyo kukuncedisa amabhunga olawulo ekuqulunqeni imigaqo-nkqubo yawo eya kulungiselela iprogram yezemfundo epheleleyo yesikolo. ISebe iWCED linqwenela ukugxininisa ukuba esi sikhokelo asenzelwanga kuqalisa usuku olude lwesikolo yaye asinyanzelekanga. Injongo yesi sikhokelo kukuba iSebe iWCED lizimisele ekunikeni inkxaso izikolo zethu zibenako ukomeleza ukufundiswa kwemfundo esemgangathweni eya kubangela ukuba bonke abafundi bafumane iziphumo ezisemgangathweni.
5. Iinqununu ngokomthetho zimele ukunika amabhunga olawulo ingcaciso neengcebiso ngemiba yemigaqo-nkqubo.
6. Akuba amabhunga olawulo ewuvumile ngokusemthethweni lo mgaqo-nkqubo ungamaxesha esikolo, makaqinisekise ukuba bonke abazali, ootitshala nabafundi bayaziswa ngawo phambi kokuba uphunyezwe.
7. Kucelwa wazise okukule setyhula onke amalungu ebhunga lolawulo, ootitshala nabafundi abachaphazelekayo ukuze bakuthathela ingqalelo.


ISAYINWE: NGU-BK SCHREUDER
INTLOKO: YESEBE LEMFUNDO
UMHLA: 2017:10:27

"South African Schools Act (SASA), 1996 (Act 84 of 1996)"  (ubukhulu: 255 KB)
ISIKHOKELO SAMABHUNGA OLAWULO SOKUMISELWA KWAMAXESHA ESIKOLO  (ubukhulu: 107 KB)