1. Intshayelelo
1.1 Injongo yale setyhula kukwazisa ii-ofisi zezithili nezikolo ngenkqubo yokuthengwa kwefanitshala nezixhobo zokusebenza ngo-2018 ukulungiselela u-2019.
1.2 ISebe leMfundo leNtshona Koloni (WCED) linekhontraki yeminyaka emithathu yokwenza nokubonelela ngefanitshala eyongezelelayo kwizikolo zePhondo leNtshona Koloni. Le khontraki iquka ii-ayithem zefanitshala yesikolo eziyi-31 ezikwikhatalogu eqhotyoshelweyo (kwisiHlomelo A). Izikolo zivumeleke ukwenza isicelo kuphela kwilisti yee-ayithem zefanitshala ezikwiifom i-WCED 026A form kunye no-026B (kwisiHlomelo B no-C) eziqhotyoshelweyo.
1.3 Makwenziwe isicelo sefanitshala kwi-WCED 026A form (kwisiHlomelo B).
1.4 Makwenziwe isicelo sezixhobo zokusebenza kwi-WCED 026B form (isiHlomelo C).

2. Inkqubo yokubeka phambili ngokokubaluleka kwanokuthengwa kwefanitshala eyongezelelayo nezixhobo zokusebenza zezikolo ezikhoyo (izongezelelo)
2.1 Zonke izicelo zefanitshala kunye nezezixhobo zokusebenza ezisuka kwizikolo ezikhoyo mazingeniswe zikwifom echanekileyo kumphathi wesekethe wesikolo ungadlulanga owe-02 Februwari 2018.
2.2 Mayizaliswe ngokupheleleyo nangokufanelekileyo i-WCED 026A form yerikhwizishini yefanitshala yokongezelela izixhobo zokusebenza ne-WCED 026B requisition form yokongezelela izixhobo zokusebenza.
2.3 Abalawuli bezithili okanye amagosa ekudluliselwe kuwo amagunya wabo aya kwenza ilisti ebekwa phambili ngokokubaluleka yee-ayithem ngokungqinelana nebhajethi ekhoyo. Oku kuthetha ukuba asiyiyo yonke ifanitshala kunye/okanye izixhobo zokusebenza ezicelwe zizikolo ezinokubekwa phambili ngokokubaluleka ukuba indleko iyonke yezicelo iyagqitha kwibhajethi ekhoyo. Le listi yezinto ezibekwa phambili ngokokubaluleka iya kuthunyelwa kwiCandelo loLawulo eliyiNtloko kwiZithili (Chief Directorate: Districts) ingadlulanga i-23 Februwari 2018, ukufumana imvume.
2.4 Amagosa ekudluliselwe kuwo amagunya kwii-ofisi zezithili aya kwazisa izikolo ngokubhala incwadi malunga nokuba ingaba izicelo zabo okanye inxalenye yazo yavunywa na, yenziwa izilungiso na okanye hayi. Kucetyiswa ukuba izikolo mazibalandelele abaphathi beesekethe ukwenzela ukuze zibuze ukuba yeyiphi ifanitshala kunye/okanye izixhobo zokusebenza ekwenziwe izicelo zazo ezamiselwa njengeziphambili ngokokubaluleka.
2.5 ICandelo lokuXhasa amaZiko ngeziBonelelo kwaNdlunkulu liya kuqwalasela kwaye lifake ii-odolo zefanitshala evunyiweyo nezixhobo zokusebenza ekuqaleni konyaka-mali omtsha ukususela ngowe-01 Apreli 2018.

3. Ithuba lokusebenza kwewaranti kunye nefanitshala eyonakeleyo
3.1 Ifanitshala nezixhobo zokusebenza zinewaranti yonyaka omnye ukususela kumhla wokusiwa kwazo ezikolweni zikwahamba nale migqaliselo ilandelayo:
3.1.1 Izikolo ezafumana ifanitshala eyonakeleyo mazazise uNdlunkulu kwangethuba ngokungenisa ingxelo ebhaliweyo kule dilesi ye-imeyili ilandelayo: Mpumelelo.Hendricks@westerncape.gov.za.
3.1.2 I-WCED iya kubonisana nabathengisi ukwenzela ukuba benze amalungiselelo okulungisa okanye okutshintsha bafake enye ifanitshala nezixhobo zokusebenza eziye zonakale ungadlulanga unyaka wokuqala zafunyanwayo sisikolo.
3.2 Ifanitshala okanye izixhobo zokusebenza ezonakeleyo ezinokulungiswa mazigcinwe ngononophelo ukuthintela ukuba zingonakali kwakhona.
3.3 Ukuba izikolo zithatha isigqibo sokuba zi-odole ifanitshala ngqo kubathengisi, intlawulo yezo odolo iya kusuka kwi-akhawunti yesikolo.
3.4 Kucetyiswa izikolo zisebenzise isabelo sazo saqho ngonyaka semimiselo nemigangatho emiselweyo yolwabiwo-mali kunye neemali zesikolo ukuthenga kunye/okanye ukulondolozwa kwefanitshala nezixhobo zokusebenza ezingafakangwa kuluhlu lwezinto ezibaluleke kakhulu yi-ofisi yesithili.

4. Ukulawulwa kwefanitshala nezixhobo zokusebenza ezikolweni
4.1 Izikolo maziseke ikomiti yokusingatha ukuthengwa kweempahla neenkonzo (procurement committee) eya kuba noxanduva lokugcina iirekhodi ezihlaziyiweyo zefanitshala kwanezixhobo zokusebenza ezisesikolweni (Jonga isikhokelo esiyi-Basic Financial System for Schools).
4.2 Ifanitshala okanye izixhobo zokusebenza ezingasasebenziyo mazicinywe yaye zichithwe emva kokuba kuthathwe isigqibo ngazo kwintlanganiso engokuchithwa kweempahla. Imizuzu yale ntlanganiso mayibonise isigqibo eso kwaye igcinwe kwirekhodi kwisikolo eso.
4.3 Ikopi yemizuzu ekubhekiswa kuyo kumhlathi 4.2 mayithunyelwe ku Mpumelelo.Hendricks@westerncape.gov.za ukuqinisekisa ukuba iCandelwana leZixhobo zokuSebenza neFanitshala kwaNdlunkulu lizihlaziya qho ekhompyutheni ii-inventri zefanitshala nezeerekhodi zezixhobo zokusebenza kumathuba ngamathuba ukuqinisekisa ukufumaneka kweerekhodi ezihlaziyiweyo zefanitshala nezezixhobo zokusebenza kwi-CEMIS, ezazifakwe kwixesha elidlulileyo ekhompyutheni sisikolo eso. Ukuya phambili, yonke ifanitshala nezixhobo zokusebenza ezisiwe ezikolweni ziya kufakwa ekhompyutheni kwi-CEMIS liCandelwana leZixhobo zokuSebenza neFanitshala kwaNdlunkulu. Izikolo ziseza kulinikwa ithuba lokufaka ekhompyutheni ifanitshala eyongezelelayo ethengwe ngeemali zazo kwi-CEMIS kumathuba ngamathuba ukuqinisekisa iirekhodi ezihlaziyiweyo zefanitshala nezezixhobo zokusebenza.
4.4 Izikolo mazizihlaziye iirekhodi ze-inventri zazo qho ngonyaka (istokhwe esikhoyo, izinto ezichithwayo nezinto ezishotayo). Ezi rekhodi mazisetyenziselwe ukuqaphela imfuneko yezongezelelo kwifanitshala nakwizixhobo zokusebenza.
4.5 Kukhuthazwa izikolo ukuba ziyibhale ngokucacileyo yonke ifanitshala nezixhobo zokusebenza ukwenzela ukuba zigcinwe ngokukhuselekileyo kubusela bee-asethi.

5. Uyabulelwa ngentsebenziswano yakho malunga nale miba ibaluleke kangaka.


ISAYINWE: NGU-BK SCHREUDER
INTLOKO: YESEBE LEMFUNDO
UMHLA: 2017:10:27

IsiHlomelo A: "School furniture catalogue 2016 - 2019"  (ubukhulu: 626 KB)
IsiHlomelo B: "WCED 026A"  (ubukhulu: 25 KB)
IsiHlomelo C: "WCED 026B"  (ubukhulu: 21 KB)