| 1. |
Le setyhula itshitshisa iSetyhula 0032/2016. |
| 2. |
ISebe leMfundo leNtshona Koloni (WCED) liyivumile le nkqubo ilandelayo: |
| 2.1 |
Iindawo ezikumaziko eSebe iWCED kunye/okanye ezikumaziko emfundo ephakamileyo zinokusetyenziselwa iindibano zaseburhulumenteni. Iindibano ezilolu hlobo zifuna uXwebhu lweMvumelwano (Memorandum of Agreement (MOA)), oluneziqulatho zoXwebhu oluyidrafti lwe-MOA (oluqhotyoshelwe njengesiHlomelo A), noluyimvumelwano emakungenwe kuyo ngokusayina olu xwebhu ngawo omabini amaqela achaphazelekayo phambi kokuba iqalise indibano ethile. Igosa leSebe iWCED elinegunya lokusayina ubuncinane malibe ngumntu okwinqanaba loMlawuli. |
| 2.2 |
Iindleko nemimiselo nemiqathango esebenzayo kuwo omabini amaqela achaphazelekayo, mazicaciswe kuXwebhu lwe-MOA yaye makungabikho zintsingiselo zimbaxa kulo. Ezi ndleko zinokubandakanya imbuyiselo esengqiqweni yenkcitho eyongezelelweyo enokubakho ngenxa yokunyuka kweqondo lokusetyenziswa kombane, amanzi, (ukusetyenziswa kweethoyilethi), ithoyilethipheyipha kunye nazo naziphi na iifasilithi zezixhobo zesandi nemifanekiso (audiovisual facilities) kunye/okanye neenkonzo zokhuseleko ezibonelelwe liziko. |
| 2.3 |
Amanye amaziko eSebe iWCED kunye/okanye amaziko emfundo ephakamileyo anokubatyisa abantu njengenxalenye yenkonzo efunekayo. Kwiimeko ezinjengezi, kuya kusebenza inkcitho eqingqiweyo nemayibhalwe kuXwebhu lwe-MOA. |
| 2.4 |
Isibonelelo saqho ngosuku (inkcitho eqingqiweyo) ngokweSikhokelo sePhondo simi ngolu hlobo lulandelayo:
| Ukutya/Into eselwayo (engebubo utywala) |
Esona sibonelelo siphezulu saqho ngosuku (2017/18) |
| Isidlo sasemini |
R67,20 (ngosuku) |
| Ikofu/Iti/Idrinki (imini yonke) |
R21,72 (ngosuku) |
|
| 2.5 |
Esi sibonelelo saqho ngosuku sihlaziywa qho ngonyaka liSebe loMphathiswa (Department of the Premier (DotP)). Iindleko ekuvunyelwene ngazo ziya kuhlawulwa kwiziko elichaphazelekayo ngeentlawulo ezenziwa ngoomatshini (transfers payments) njengoko kuvunyelwene phakathi kwamaqela achaphazelekayo kwi-MOA. Akukho malungiselelo enzelwa iintlawulo zesidlo sakusasa nesesopholo (tariff for breakfast and supper) njengoko umphathi owenza lo msebenzi ochaphazelekayo, kuya kufuneka anike izizathu ezivokothekileyo ukulungiselela ukuvunywa koku kwinqanaba leNtloko yeSebe eliKhulu echaphazelekayo (uSekela Malwuli-Jikelele). |
| 3. |
Xa kungenzeka ukuba kungabikho fasilithi ifanelekileyo yeSebe iWCED kunye/okanye eyeziko lemfundo ephakamileyo ifumanekayo, zinokusetyenziswa iifasilithi zamanye amasebe karhulumente okanye ezo zoomasipala. Kule meko kusebenza umgqaliselo owamkelekileyo wokufumana inkonzo efunekayo kwicandelo likarhulumente yaye ikowuteshini yeendleko makuvunyelwane ngayo ize ibhalwe phantsi kuXwebhu lwe-MOA. |
| 4. |
Nakuba kunjalo, ukuba azikho iifasilithi ezifanelekileyo ezifumanekayo kwiSebe iWCED kunye/okanye kumaziko emfundo ephakamileyo, okanye kwamanye amasebe karhulumente okanye koomasipala, kuya kusebenza iinkqubo zokuthengwa kweempahla neenkonzo zikarhulumente eziqhelekileyo zokufumana iifasilithi nezokutyiswa kwabantu abakwindibano. Kwiimeko ezinjengezi, imigaqo (parameters) iya kungqinelana nesikhokelo se-DotP se-R85,14 umntu ngamnye ngosuku. Nakuba kunjalo, abaphathi abenza lo msebenzi abachaphazelekayo, mabaqinisekise ukuba iinzuzo zokuncitshiswa kweendleko zivele kumboneleli-nkonzo ngothetha-thethwano lokuncitshiswa kweendleko, apho kunokwenzeka. |
| 5. |
Makugcinwe irejista yabantu abakhoyo kwindibano kuzo zonke iindibano yaye abakhoyo mabayisayine le rejista ngosuku ngalunye lokubakho kwabo kwindibano. Irejista esayiniweyo yabantu abakhoyo kwindibano mayifakwe njengenxenye yamaxwebhu entlawulo eyenziwa ngomatshini abubungqina babantu abebekho. |
| 6. |
Mazithintelwe kangangoko kunokwenzeka iindibano zaseburhulumenteni eziqhuba ixesha elide kunosuku olunye kuba zibangela iindleko. Nakuba kunjalo, ukuba kunyanzelekile ukuba kwenziwe amalungiselelo okubakho kweendibano/kwamatheko eentsuku ezininzi, uXwebhu lwe-MOA oluyimvumelwano ekungenwe kuyo, malucacise inkqubo yembuyiselo (reimbursement) ukulungiselela iinkonzo zokutyiswa kwabantu ngosuku lokuqala nangezoo ntsuku zilandelayo. Kubalulekile ke ngoko ukuba abaphathi baqinisekise ukuba iyaphunyezwa yaye ilandelwe ngokuthe mbo inkqubo yokuphendula (RSVP process). Ababoneli-nkonzo baya kubuyiselwa ngokulungisa ukutya ngokwelisti epheleleyo yabantu ekulindeleke babekho ngosuku olunye kwakunye nenani kanye labantu abakhoyo ngeentsuku ezilandelayo. |
| 7. |
Xa kusetyenziswa iifasilithi zeSebe iWCED njengendawo yendibano, uMgaqo-nkqubo osebenzayo oyi-Policy for Air Travel, Road Transport and Accommodation for Official Purposes, uya kusebenza kwabo bameli bathe ngenxa yeemeko ezithile, bafuna indawo yokulala ezihotele, nakwizindlu zeendwendwe (guest houses), njl.njl. |
| 8. |
Ezi nkqubo zisebenza ukususela nge-01 Isilimela 2017 yaye mazaziswe bonke abachaphazekelayo ukuze bazithathele ingqalelo. |
ISAYINWE: NGU-BK SCHREUDER
INTLOKO: YESEBE LEMFUNDO
UMHLA: 2017:05:06
|
 |