1. Die Departement van Basiese Onderwys (DBO) in samewerking met al die provinsiale onderwysdepartemente sal weereens die Suid-Afrikaanse Skoolkooreisteddfod (SASKE) in 2016 reël, bestuur en monitor.
2. Die 2016-kompetisie is herontwerp om meer omvattend te wees en sal in die volgende afdelings vir skoolkore voorsiening maak:

Primêre skole
Jong kinders (Graad R-2)
Grondslagfase (Graad 3-4)
Intermediêre Fase (Graad 5-7)
Plaasskole

Sekondêre Skole
Sekondêr A
Skole wat gedurende die afgelope vier jaar deurlopend goed presteer het in die vyf goedgekeurde kategorieë (bv. gemengde kore – Afrika, Afrikaans, Westers en manlike en vroulike kore).
Sekondêr B
Skole wat vir die eerste keer deelneem asook daardie skole wat aan die program deelgeneem het, maar nie die nasionale vlak bereik het nie.
Oop Kategorie
Vir beide bogenoemde kategorieë om te kies wat hulle geskik vind.

Verwys asseblief na die "2016 Participation Rules" vir die voorgeskrewe musiek en kriteria vir deelname. Die prinsipaal en dirigent MOET hierdie reëls lees en hulself vertroud maak daarmee. Die Wes-Kaap Onderwysdepartement (WKOD) sal skole wat aan die SASKE deelneem, streng monitor. Skole wat die reëls verontagsaam, sal onmiddellik gediskwalifiseer word en nie toegelaat word om vir die volgende vyf jaar nie aan die SASKE deel te neem nie.
3. Grondslagfase-kore sal slegs aan die distrik se eisteddfod deelneem. Hulle sal nie aan die provinsiale en nasionale afdelings van die kompetisie deelneem nie.
4. Musiekstukke is vir alle afdelings voorgeskryf. Die reels vir deelname asook die 2016-bladmusiek kan van die DBO se webblad afgelaai word by: http://www.thutong.doe.gov.za/Default.aspx?alias=www.thutong.doe.gov.za/schoolenrichment U kan ook u distrikskantoor vir hulp met die musiek of die reels vir deelname kontak.
5. Om vir die kompetisie in te skryf, moet skole die aangehegte registrasievorm voltooi en dit teen 18 Maart 2016 terugstuur aan die amptenaar wat vir skoolverryking by hul distrikskantoor verantwoordelik is. Skole word versoek om die koor se grootte tot 'n maksimum van 45 leerders te beperk. Dit help om logistieke reelings te vergemaklik.
6. Dirigente en prinsipale van deelnemende skole sal genooi word om distrikswerksessies by te woon om hulself met die voorgeskrewe musiek en die reels vir deelname vertroud te maak
7. Distrik- en provinsiale uitdunningsrondtes sal onderskeidelik tussen April en Mei 2016 plaasvind.
8. Skole sal slegs toegelaat word om na die volgende been van die kompetisie te vorder as die beoordeelaars hul vertoning 'n punt van 60% (vlak 3) of meer gee.
9. Prinsipale en skoolbestuurspanne moet seker maak dat kooroefeninge nie met die skool se akademiese program en kontaktyd inmeng nie. Dit is baie belangrik dat dirigente nie leerders vra om kooroefening tydens onderrigtyd by te woon nie.
10. Skole wat aan hierdie geleenthede deelneem, moet self reelings vir hulle reis- en verblyf tref. Die WKOD sal reis en verblyf soos volg subsidieer:

  • Skole wat meer as 200 km (retoer) reis, sal tot 'n maksimum van R3 000.00 per skool vir distriksrondtes en provinsiale rondtes ontvang.
  • Skole wat meer as 700 km (retoer) reis, sal tot 'n maksimum van R5 000.00 per skool vir distriksrondtes en provinsiale rondtes ontvang.
  • Verblyf vir die bywoning van die provinsiale rondtes sal teen R100.00 per leerder per nag gesubsidieer word.

Hierdie subsidies sal betaal word sodra 'n. memorandum van verstandhouding onderteken is wat ten minste drie weke voor die geleentheid by Hoofkantoor ingedien moet word.
11. Die nasionale eindronde sal tussen 28 en 30 Junie 2016 in Johannesburg plaasvind. Die WKOD sal vervoer en verblyf vir 'n maksimum van 45 leerders per skool vir hierdie geleentheid verskaf. Die WKOD sal nie hiervan afwyk nie.
12. Bring asseblief die inhoud van hierdie minuut onder die aandag van alle opvoeders, ouers en leerders.


GETEKEN: PA VINJEVOLD
HOOF: ONDERWYS
DATUM: 2016:02:25

2016 Suid-Afrikaanse Skoolkooreisteddfod - Registrasievorm  (grootte: 37 KB)
Distriksamptenare se kontakbesonderhede  (grootte: 24 KB)