1. Hierdie omsendbrief herroep Omsendbrief 0046/2003 en Omsendbrief 0002/2004 in die geheel.
2. Die Provinsiale Minister wat vir onderwys in die Wes-Kaap verantwoordelik is en optree ingevolge die bepalings van die Wet op die Beheer van Tabakprodukte, 1993 (Wet 83 van 1993), het die Rookbeleid van die Wes-Kaap Onderwysdepartement, 2015, goedgekeur.
3. Wysigings aan wetgewing met betrekking tot rook in openbare plekke het plaasgevind sedert die Rookbeleid van die Wes-Kaapse Provinsiale Administrasie in 2002 goedgekeur is. 'n Nuwe rookbeleid is dus vir die Wes-Kaap Onderwysdepartement ontwikkel. 'n Paar van die bepalings van die Rookbeleid van die Wes-Kaapse Provinsiale Administrasie, gepubliseer in 2002, is in die Rookbeleid van die Wes-Kaap Onderwysdepartement, 2015, vervat, asook sekere bywerkings van wysigings soos vervat in die Wet op die Beheer van Tabakprodukte, 1993 (Wet 83 van 1993).
4. Paragraaf 4.1 van die Rookbeleid van die Wes-Kaapse Provinsiale Administrasie bepaal dat die rook van tabakprodute in alle werkplekke van die Wes-Kaapse Provinsiale Administrasie verbode is. Hierdie bepaling sluit onderwysinrigtings in.
5. Alle werkplekke onder die jurisdiksie van die Wes-Kaap Onderwysdepartement word hiermee tot rookvrye gebiede, ingevolge paragraaf 5.1(a) van die Rookbeleid van die Wes-Kaap Onderwysdepartement, 2015, verklaar. Kennisgewings en uithangborde wat aandui waar rook verbode is, moet duidelik sigbaar wees en moet die volgende waarskuwing bevat: "ENIGE PERSOON WAT IN GEBREKE BLY OM TE VOLDOEN AAN HIERDIE KENNISGEWING SAL VERVOLG WORD.".
6. Sekere gebiede binne die werkplek kan ingevolge paragraaf 5.1(b) van die beleid as aangewese rookgebiede verklaar word. Die identifisering van sodanige gebiede binne die werkplek moet aan die bepalings van die Rookbeleid van die Wes-Kaap Onderwysdepartement, 2015, voldoen en kennisgewings en uithangborde wat aandui waar rook toelaatbaar is, moet duidelik sigbaar wees.
7. Die implementering van hierdie beleid sal in oorleg met departementele gesondheid- en veiligheidsverteenwoordigers of komittees by Hoofkantoor en distrikskantore en onderwysinstansies, aangestel ingevolge artikel 17 en 19 van die Wet op Beroepsgesondheid en Veiligheid, 1993 (Wet 85 van 1993), deur die Hoof-Direktoraat: Distrikte gemonitor word.
8. Dit is belangrik om kennis te neem dat die aangehegte Rookbeleid van die Wes-Kaap Onderwysdepartement, 2015, nie die Rookbeleid van die Wes-Kaapse Provinsiale Administrasie vervang nie, maar daarmee saam gelees moet word.
9. Hierdie beleid is onmiddellik van toepassing en Hoofdirekteure, Direkteure by Hoofkantoor en distrikskantore en hoofde van onderwysinstansies word versoek om die inhoud van hierdie omsendbrief onder die aandag van alle personeellede, beheerliggame en skoolgemeenskappe te bring.


GETEKEN: PA VINJEVOLD
HOOF: ONDERWYS
DATUM: 2016:01:13

Wes-kaapse Onderwysdepartement Rookbeleid, 2015  (grootte: 76 KB)
"Western Cape Provincial Administration Smoking Policy"  (grootte: 31 KB)