1. Ukuhlaziywa kwamanani ezithuba ezabelwe izikolo zabasebenzi abanika inkxaso benkonzo karhulumente kwizikolo zikarhulumente ukulungiselela u-2016 kwakwenziwe ngokususelwa kumanani abafundi njengoko anjalo ngowe-31 Julayi 2015.

2. Oku hlaziywa kwabandakanya abasebenzi abanika inkxaso benkonzo karhulumente abakwizikolo zikarhulumente eziqhelekileyo ngokungqinelana nemimiselo nemigangatho njengoko bekwazisiwe kwiSetyhula 0025 ka-2011, nalapho izikolo zikarhulumente eziqhelekileyo zineehostele ngokungqinelana nemimiselo nemigangatho evunyiweyo yeehostele.

3. Oku kuhlaziywa sele kukhankanywe apha ngaphambili bekusenziwa ngokwale migqaliselo ilandelayo:

  1. ukugcina uzinzo ezikolweni ukwenzela u-2016;
  2. ukumisela ukuchaphazeleka kwemeko yezemali kukwandiswa kwesabelo-mali sabasebenzi abanika inkxaso benkonzo karhulumente ngokungqinelana nesabelo sebhajethi sango-2015/2016 senkqubo-sikhokelo senkcitho yethuba eliphakathi (medium term expenditure framework); kunye
  3. nokuhlenga-hlengiswa kwesabelo-mali sabasebenzi abanika inkxaso benkonzo karhulumente kwizikolo eziphulukene nabafundi, okufuna ukulungelelaniswa kwesabelo-mali sabasebenzi abanika inkxaso benkonzo karhulumente nemimiselo nemigangatho evunyiweyo.
4. Ngenxa yeemeko zezemali ezingumngeni zangoku kwibhajethi yembuyiselo yabaqeshwa yeSebe leMfundo leNtshona Koloni, iNtloko yezeMfundo yakuvuma ukuba izikolo ezingakhe ziphulukane nabafundi kunye/okanye ezafumene abafundi ziya kusigcina isabelo-mali sazo sabasebenzi abanika inkxaso benkonzo karhulumente sango-2015 ukulungiselela u-2016. Izikolo eziphulukene nabafundi ziya kufumana izabelo-mali ezihlenga-hlengisiweyo zabasebenzi abanika inkxaso benkonzo karhulumente ukulungiselela u-2016.

5. Izikolo zikarhulumente eziqhelekileyo ezijongene nokuphulukana nezithuba zabasebenzi benkonzo karhulumente abanika inkxaso ngo-2016 nezinabaqeshwa bemvumelwano (contract employees) kwizithuba ezichaphazelekayo azinako ukuzandisela elinye ixesha iimvumelwano zabaqeshwa abachaphazelekayo kude kube ngaphaya kwe-31 Disemba 2015. Iinqununu mazibazise abaqeshwa bemvumelwano (contract employees) abachaphazelekayo ungadlulanga owe-30 Novemba 2015, ukuba ngenxa yokupheliswa kwezithuba zabo, iimvumelwano zabo azisayi kwandiselwa ixesha elisemva kowe-15 Disemba 2015.

6. Abasebenzi abanika inkxaso benkonzo karhulumente abasisigxina abasezikolweni eziphulukene nezithuba zabasebenzi abanika inkxaso baya kumataniswa yaye bafakwe kwizithuba ezingenabantu kwezinye izikolo. Inkqubo yokumataniswa nokufakwa kwizithuba iya kulawulwa zii-ofisi zezithili. Bonke abaqeshwa abasisigxina abangenako ukumataniswa nokufakwa kwizithuba, baya kuvakaliswa njengabangaphezu kwemfuneko yaye baya kuhlala ezikolweni zabo yaye aziyi kutshintshwa iimeko zabo zengqesho. Xa kunokwenzeka ukuba kubekho izithuba ezisisigxina ezingenamntu, abaqeshwa abangaphezu kwemfuneko baya kuqwalaselelwa ukuqeshwa kuqala ekumatanisweni nasekufakweni kwabo kwizithuba ezilolu hlobo phambi kokuba kunikwe imvume yokuzaliswa kwezithuba zemvumelwano.

7. Amanani ezithuba ezabelwe izikolo zabasebenzi abanika inkxaso benkonzo karhulumente ukulungiselela u-2016, aya kupapashwa kwiCEMIS phantsi ko"Administration" nge-13 Novemba 2015.


ISAYINWE: NGU-PA VINJEVOLD
INTLOKO: YESEBE LEMFUNDO
UMHLA: 2015:11:04