1. Die hersiening van diensstate van staatsdiensondersteuningspersoneel by spesiale openbare skole vir 2016 is op grond van die leerdertalle op 31 Julie 2015 uitgevoer.
2. Die hersiening het staatsdiensondersteuningspersoneel (administrasie-, instandhoudings-en skoonmaakdienste) by spesiale openbare skole ingesluit, ooreenkomstig die norme en standaarde wat vir gewone openbare skole goedgekeur is, soos in Omsendbrief 0025 van 2011 gekommunikeer, en waar spesiale openbare skole koshuise het, ooreenkomstig die norme en standaarde wat vir koshuise goedgekeur is.
3. Spesiale openbare skole wat moontlik staatsdiensondersteuningspersoneelposte in 2016 kan verloor en wat kontrakwerknemers in die geaffekteerde poste het, mag nie die kontrakte van die geaffekteerde werknemers verder as 31 Maart 2016 verleng nie. Skoolhoofde moet kontrakwerknemers nie later nie as 31 Desember 2015 in kennis stel dat hul kontrakte weens die afskaffing van poste nie verder as 31 Maart 2016 verleng sal word nie.
4. Permanente staatsdiensondersteuningspersoneel by skole waar ondersteuningspersoneelposte verloor is, sal by vakante poste by ander skole gepas en daarin geplaas word. Die pas- en plaasproses sal deur distrikskantore hanteer word. Alle permanente werknemers wat nie gepas en geplaas kan word nie, sal botallig verklaar word en sonder enige verandering aan hul diensvoorwaardes by hul skole bly. Indien permanente poste vakant sou word, sal botallige werknemers voorkeur geniet by die pas en plaas in sodanige poste voordat die vul van hierdie poste op 'n kontrakbasis goedgekeur word.
5. Alle nuwe staatsdiensondersteuningspersoneelposte wat nie deur die proses van passing en plasing gevul kon word nie, sal in die inrigtingsgebaseerde staatsdiensvakaturelys vir 2016 geadverteer word. Geen kontrakaanstellings in nuut geskepte staatsdiensondersteuningspersoneelposte mag gedurende die tydperk van 01 Januarie 2016 tot 31 Maart 2016 gemaak word nie, aangesien dit eers vanaf 01 April 2016 in werking tree.
6. Die diensstate van staatsdiensondersteuningspersoneel vir 2016 sal op 1 Desember 2015 onder "Administration" op SOBIS gepubliseer word.


GETEKEN: PA VINJEVOLD
HOOF: ONDERWYS
DATUM: 2015:12:01