1. Die rolle en funksies van 'n distrikskantoor is om inrigtings te help en te ondersteun om onderwys van hoe gehalte te lewer.

2. Op 03 April 2013 in Staatskoerant No. 36324 het die Departement van Basiese Onderwys 'n beleid oor die organisasie, rolle en verantwoordelikhede van onderwysdistrikte gepubliseer om eenvormige strukture en vaktaal regdeur die distrikte in nege provinsies te bevorder.
2.1 Hierdie beleid het daartoe gelei dat die Wes-Kaap Onderwysdepartement (WKOD) sy bestaande distrikstrukture moes hersien om te verseker dat hulle met die nuwe nasionale norme en standaarde vir distrikskantore in lyn gebring is.
2.2 Die WKOD het in 2015 met 'n konsultasieproses begin waarby onderwysunies, distrikspersoneel en beheerliggaamverenigings betrokke is.

3. Die huidige struktuur van 49 kringspanne sal op 31 Desember 2015 ontbind en in 2016 met 64 kringe vervang word.
3.1 Elke kring sal deur 'n Kringbestuurder bestuur word wat ondersteuning aan inrigtings sal verskaf.
3.2 As gevolg van die toenemende getal kringe sal party skole vanaf 1 Januarie 2016 aan 'n ander kring toegeken word.
3.3 Die proses het ook die herorganisering van distriksgrense tot gevolg gehad, waar 49 skole in 2016 na 'n ander distrik sal skuif. Alle veranderinge in hierdie verband sal deur distriksdirekteurs aan skole oorgedra word.

4. Distrikte het reeds begin met 'n proses om inrigtings in te lig oor die naderende veranderinge en die tipe ondersteuning wat tydens die oorgangsfase tot hul beskikking sal wees.

5. Alle navrae aangaande kringtoekennings, distriksgrense en ondersteuning aan skole moet aan die toepaslike distriksdirekteur gerig word.


GETEKEN: PA VINJEVOLD
HOOF: ONDERWYS
DATUM: 2015:11:20