1. Die hersiening van diensstate van staatsdiensondersteuningspersoneel by gewone openbare skole vir 2016 is op grond van die leerdertalle op 31 Julie 2015 uitgevoer.

2. Die hersiening het staatsdiensondersteuningspersoneel by gewone openbare skole ingesluit, ooreenkomstig die norme en standaarde soos in Omsendbrief 0025 van 2011 gekommunikeer, en waar gewone openbare skole koshuise het, ooreenkomstig die norme en standaarde wat vir koshuise goedgekeur is.

3. Bogenoemde hersienings is volgens die volgende beginsels uitgevoer:

  1. handhawing van stabiliteit by skole vir 2016;
  2. bepaling van die finansiële impak van meer staatsdiensondersteuningspersoneeltoekennings in ooreenstemming met die begrotingsvoorsiening vir die 2015/2016 mediumtermyn uitgaweraamwerk; en
  3. die rasionalisering van die toekenning van staatsdiensondersteuningspersoneel by skole wat leerders verloor het, wat vereis dat die staatsdiensondersteuningspersoneeltoekennings met die goedgekeurde norme en standaarde in ooreenstemming gebring word.
4. Gegewe die huidige fiskale uitdagings ten opsigte van die vergoeding van werknemersbegroting van die Wes-Kaap Onderwysdepartement, het die Hoof van Onderwys goedgekeur dat skole wat geen leerders verloor of bygekry het nie hul 2015 staatsdienspersoneeltoekennings vir 2016 sal behou. Skole wat leerders verloor het, sal aangepaste staatsdiensondersteuningstoekennings vir 2016 ontvang.

5. Gewone openbare skole wat moontlik staatsdiensondersteuningspersoneelposte in 2016 kan verloor en wat kontrakwerknemers in die geaffekteerde poste het, mag nie die kontrakte van die geaffekteerde werknemers verder as 31 Desember 2015 verleng nie. Skoolhoofde moet kontrakwerknemers nie later nie as 30 November 2015 in kennis stel dat hul kontrakte weens die afskaffing van poste nie verder as 31 Desember 2015 verleng sal word nie.

6. Permanente staatsdiensondersteuningspersoneel by skole waar ondersteunings-personeelposte verloor is, sal teen vakante poste by ander skole gepas en daarin geplaas word. Die pas- en plaasproses sal deur distrikskantore hanteer word. Alle permanente werknemers wat nie gepas en geplaas kan word nie, sal botallig verklaar word en sonder enige verandering aan hul diensvoorwaardes by hul skole bly. Indien permanente poste vakant sou word, sal botallige werknemers voorkeur geniet by die pas en plaas in sodanige poste voordat die vul van hierdie poste op 'n kontrakbasis goedgekeur word.

7. Die diensstate van staatsdiensondersteuningspersoneel vir 2016 sal op 13 November 2016 onder "Administration" op SOBIS gepubliseer word.


GETEKEN: PA VINJEVOLD
HOOF: ONDERWYS
DATUM: 2015:11:04