1. 2016 diensstate

Verwys asseblief na die Wes-Kaap Onderwysdepartement (WKOD) Omsendbrief 0031/2009, van 28 Augustus 2009, vir 'n volle beskrywing van die wetgewing en maatreels van toepassing op die jaarlikse uitreik van onderwysdiensstate aan skole. Die inhoud van daardie omsendbrief bly van toepassing op 2016, behalwe vir die volgende wysigings:

1.1 Ingevolge die maatreels van die Hersiene Posverspreidingsmodel, moet gewone openbare skole en spesiale openbare skole van hulle jaarlikse onderwysdiensstate voorsien word teen 30 September van die voorafgaande jaar. Dus, vir die 2015 akademiese jaar verval alle onderwysdiensstate wat aan gewone openbare en spesiale openbare skole uitgereik is (sowel as alle addisionele poste wat geskep is vir en uitgereik is aan 'n openbare skool in 2015 as gevolg van 'n toename in die leerderinskrywings of die kurrikulumbehoeftes van die skool) op 31 Desember 2015.
1.2 Die onderwysdiensstate vir 2016 sal op 21 Augustus 2015 op die Sentrale Onderwysbestuursinligtingstelsel (SOBIS) onder die skakel Administration (Establishments) gepubliseer word.

2. Addisionele toekennings (Posvlak 1-poste)

Die WKOD behou die reg voor om die toekenning van die onderwysdiensstaat van 2016 te hersien indien die inligting oor 'n skool, soos vervat op SOBIS, nie korrek bevind is nie.


3. Hersiening van die 2016 onderwysdiensstate
3.1 Skole kan 'n hersiening van die berekening van hul onderwysdiensstaat aanvra indien die SOBIS-leerderinskrywingsvorms, soos gereflekteer op die onderwysdiensstaatbrief, van die leerderdata op 31 Julie 2015 verskil. Ten einde die WKOD in staat te stel om die berekening uit te voer, moet die skool bewys by die Direktoraat: Strategiese Mensbestuur voorle dat die leerderinskrywings soos gebruik en genoem in die onderwysdiensstaatbrief, foutief is. Hierbenewens kan skole wat aandui dat hulle genoeg klaskamers het en leerders vir 2016 ingeskryf het of van voorneme is om addisionele leerders vir 2016 in te skryf, om addisionele poste aansoek doen. Aansoeke moet gedurende die tydperk van 31 Augustus 2015 tot 18 September 2015 voorgele word, en alle aansoeke moet via SOBIS gedoen word. Geen aansoek om addisionele poste sal oorweeg word indien dit nie via SOBIS voltooi is nie.
3.2 In die geval waar 'n skool 'n graad of grade uitfaseer, sal die onderwysdiensstaat van sodanige skool hersien word, gebaseer op die aantal leerders wat in die skool agter-bly. In die geval waar leerders 'n skool verlaat tydens die uitfasering van 'n graad of grade, sal die onderwysdiensstate van die ontvangende skool (skole) hersien word.

4. Herberekening van onderwysdiensstaat as gevolg van verandering aan leerder-inskrywings gedurende 2016
4.1 Die WKOD behou die reg voor om Posvlak 1-poste af te skaf indien daar in die loop van 2016 'n afname in die skool se leerderinskrywings is. In sodanige gevalle sal onderwysers wat tydelik aangestel is na konsultasie na poste by ander skole oorgeplaas word. Daarom, indien onderwysers op 'n tydelike basis gewerf word, moet prinsipale aansoekers inlig dat hulle aangestel sal word met die verstandhouding dat hulle moontlik oorgeplaas kan word na ander skole indien hulle poste afgeskaf word as gevolg van 'n afname in die leerderinskrywings by die skool.
4.2 Alle kontrakaanstellings moet vir 12 maande wees indien dit teen 'n addisionele kontrakpos is wat vir 12 maande aan die skool toegeken is. Hierdie nominasies moet ingedien word deur middel van die Contract Appointment Tracking System (CAT) stelsel.
4.3 Kontrakaanstellings teen permanente vakante poste moet vir 'n tydperk van 6 maande gemaak word indien die skool vir sodanige pos kwalifiseer. Indien dieselfde pos na 6 maande steeds vakant is, moet dit deur dieselfde posbekleer gevul word indien die prestasie-evaluering van die posbekleer gunstig is.
4.4 Daar word van alle skole verwag om hul inskrywingsgetalle teen Dinsdag, 01 Maart 2016 op SOBIS by te werk. Die onderwysdiensstate van al die skole waarvan die leerderinskrywings minder as hul leerderinskrywingstal op 31 Julie 2015 is, sal teen 18 Maart 2016 herbereken word. Indien die skool 'n pos of poste moet verloor, sal die getal kontrakaanstellings gelyk aan of minder as die getal poste wat die skool verloor nie met ingang 01 April 2016 toegeken word nie.
4.5 In gevalle waar daar vanaf 13 Januarie 2016 tot 29 Januarie 2016 'n toename in leerderinskrywings is, kan die skool gedurende die tydperk van 13 Januarie 2016 tot 29 Januarie 2016 aanlyn om ('n) groeipos(te) aansoek doen. Die leerderinskrywings-totaal wat in ag geneem word, sal die inskrywingstotaal op SOBIS ten tye van die aansoek wees. Geen aansoek sal aanvaar word indien dit nie via SOBIS ingedien is nie.

Distrikskantore moet verseker dat alle skole hulle aansoeke, teen 29 Januarie 2016, aanlyn ingedien het.

4.6 Prinsipale moet asseblief op die volgende let:

  • Nominasies vir onderwysers in addisionele poste, waarvoor aansoek gedoen is as gevolg van groei en/of kurrikulumbehoeftes van die skool, kan slegs gemaak word nadat skriftelike goedkeuring deur Hoofkantoor verleen is.
  • Geen onderwyser kan met haar/sy pligte begin voor goedkeuring vir 'n addisionele pos nie deur Hoofkantoor verleen is nie.
5. Vul van geadverteerde poste
5.1 Alle poste wat reeds in 'n departementele Vakaturelys geadverteer is, mag permanent gevul word, mits daardie poste op die onderwysdiensstaat vir 2016 verskyn.
5.2 Indien 'n geadverteerde pos nie op die onderwysdiensstaat vir 2016 verskyn nie, is die skool nie op daardie pos geregtig nie en sal sodanige pos as foutiewelik geadverteer beskou word.
5.3 Die bepaling dat 'n geadverteerde pos (veral 'n bevorderingspos) slegs gevul kan word indien dit nie veroorsaak dat 'n botallige onderwyser geskep word nie, bly van krag.
5.4 Indien die prinsipaal en die beheerliggaam van mening is dat die posbeskrywing van die geadverteerde pos nie langer aan die kurrikulumbehoeftes van die inrigting voldoen nie, mag hulle die WKOD versoek om die pos te beskou as foutiewelik geadverteer. 'n Gedetailleerde verduideliking wat deur die prinsipaal en die voorsitter van die beheerliggaam onderteken is, moet sodanige versoek vergesel.
5.5 Ten einde stabiliteit in 2016 te verseker, beoog die WKOD om die omskakelproses te gebruik om Posvlak 1-poste vir aanstelling op 01 Januarie 2016 te vul. Waar poste vasgele is om in Vakaturelys 3/2015 geadverteer te word en die skool 'n geskikte opvoeder geidentifiseer het wat van tydelike tot permanente status omgeskakel kan word, kan die advertensie van die konsep- vakaturelys verwyder word.

6. Vul van vakante substantiewe poste (gebaseer op onderwysdiensstate van 21 Augustus 2015)

Voorkeur vir die vulling van poste sal volgens die volgende rangorde geskied:

  • Onderwysers wat as botallig verklaar is
  • Pas gekwalifiseerde onderwysers
  • Ander onderwysers wat paslik gekwalifiseer is.

'n Pas gekwalifiseerde opvoeder is 'n finalejaarstudent en/of 'n gekwalifiseerde opvoeder wat die afgelope drie jaar gekwalifiseer het en nog nooit die geleentheid gehad het om 'n opvoederspos in diens van die staat te beklee nie. Hierdie groep sluit Funza Lushaka beurshouers in.


7. Vul van addisionele onderwysposte (gebaseer op aansoeke vir groei en kurrikulum-behoeftes tussen 31 Augustus 2015 en 18 September 2015)
7.1 Slegs gekwalifiseerde onderwysers met 'n ROKW 13 of hoer kan oorweeg word vir vakante en addisionele onderwysposte. Die WKOD sal die reg uitoefen om ander onderwysers aan te stel slegs indien geen gekwalifiseerde onderwysers uit die bogenoemde kategoriee geidentifiseer kan word nie. Aansoeke vir aanstellings van tydelike onderwysers in die volgende kategoriee moet vooraf goedkeuring van die Direkteur: Werwing en Keuring verkry:
7.1.1 Onderwysers bo die ouderdom van 65 jaar;
7.1.2 Onderwysers wat die onderwys verlaat het as gevolg van:

  • Aftrede
  • Bedanking
  • Swak gesondheid
  • Wangedrag
  • Dros
7.1.3 Buitelanders; en
7.1.4 Ongekwalifiseerde en ondergekwalifiseerde onderwysers.
7.2 Distrikskantore kan ook oorplasings na skole goedkeur (sonder om die versoek vir oorplasing na die Hoofkantoor te verwys) in gevalle waar die oorplasing die proses van herontplooiing sal bevorder, d.w.s waar die oorplasing die herontplooiing van 'n botallige onderwyser in 'n vakante substantiewe pos tot gevolg sal hê. Hierdie maatreel geld ook in gevalle waar die oorplasing en pas gekwalifiseerde onderwyser sal toelaat om in die pos wat weens die oorplasing ontruim is, aangestel te word.

8. Botallige onderwysers
8.1 Onderwysers wat reeds as botallig verklaar is, gebaseer op vorige onderwysdiensstate en in ooreenstemming met vorige prosesse en wat steeds botallig is, behou hul botallige status. Hierdie onderwysers sal ingevolge die geldende kollektiewe ooreenkomste van die Raad op Arbeidsverhoudinge in die Onderwys (RAVO) hanteer word.
8.2 Botallige onderwysers moet deur middel van passing en plasing in gepastevakatures op die nuwe onderwysdiensstaat opgeneem word.
8.3 Onderwysers wat permanent aangestel is, moet ingevolge die Kollektiewe Ooreenkoms 2 van 2003 van die RAVO geīdentifiseer word.
8.4 Die verklaring van botallige onderwysers wie nie teen die 2016 onderwysdiensstate gepas en geplaas kan word nie, moet teen 30 Oktober 2015 afgehandel wees. Distrikskantore sal briewe aan die betrokke onderwysers uitreik om hulle in kennis te stel dat hulle as botallig verklaar is en afskrifte van sodanige briewe moet aan die Direktoraat: Strategiese Mensbestuur, vir aandag me Brenda Davids, teen nie later nie as 30 Oktober 2015 gestuur word.

9. Navrae

Alle navrae aangaande hierdie omsendbrief en die tersaaklike wetgewing moet aan kringspanbestuurders gerig word.


10. Algemeen

Die inhoud van hierdie omsendbrief moet onder die aandag van alle onderwysers en lede van die beheerliggaam gebring word.



GETEKEN: PA VINJEVOLD
HOOF: ONDERWYS
DATUM: 2015:08:20