1. Hierdie omsendbrief vervang Omsendbrief 0007/2005.

2. Die regulasies met betrekking tot die Afneem, Administrasie en Bestuur van Nasionale Eksamens, soos dit op elke kandidaat se persoonlike rooster en in die antwoordboeke verskyn, stel dit baie duidelik dat dit 'n onreëlmatigheid vir 'n kandidaat is om 'n selfoon of enige ander elektroniese toestel te gebruik wat kandidate kan help terwyl hulle eksamen skryf. Dit is irrelevant of die selfoon of elektroniese toestel afgeskakel of in gebruik is. Om bloot 'n selfoon of elektroniese toestel in die eksamenlokaal te hê, is 'n eksamenonreëlmatigheid.

3. 'n Kandidaat wat gedurende die eksamen in besit van 'n selfoon of 'n ongemagtigde elektroniese toestel gevind word, sal sy of haar uitslae vir die eksamenvraestel as nietig verklaar laat word. Die betrokke kandidaat mag vir 'n minimum van een (1) en 'n maksimum van drie (3) daaropvolgende eksamens uitgesluit word, met die uitsondering van aanvullende eksamens.

4. In 2014 is die uitslae van elf kandidate nietig verklaar, omdat hulle in besit van selfone in die eksamenlokaal was.

5. Gevorderde selfoontegnologie maak dit moontlik om spesifieke inligting op 'n selfoon te laai. Bewys hiervan is gevind tydens die afneem van die 2012 Nasionale Senior Sertifikaat-eksamen toe drie voltydse kandidate gevind is met selfone, wat aan oorfone gekoppel is. Hierdie selfone was met serpe bedek. Die drie betrokke kandidate se uitslae vir die betrokke vak is nietig verklaar. In 2013 is 'n selfoon in die besit van 'n ander kandidaat gevind. Tydens die ondersoek is ontdek dat vyf-en-sewentig (75) fotos van handboekbladsye op die selfoon gestoor was.

6. Gedurende die voorlees van die eksamenreëls voor elke sessie, moet die hoofopsiener alle kandidate herinner om seker te maak dat hulle hul selfone en elektroniese toestelle ingehandig het. Die hoofopsiener moet kandidate inlig dat 'n selfoon of elektroniese toestel wat tydens die afneem van 'n eksamen in die besit van 'n kandidaat gevind word, gekonfiskeer sal word en 'n onreëlmatigheid teen die kandidaat verklaar sal word.

7. Dit is belangrik vir die opsieners om 'n kandidaat wat opdaag nadat die hooftoesighouer die eksamenreëls voorgelees het, te vra of hy/sy enige selfone of elektroniese toestelle in sy/haar besit het voor hulle met die afneem van die eksamen begin.

8. In die geval waar 'n kandidaat, gedurende die verloop van die eksamen, met 'n selfoon of 'n elektroniese toestel in sy/haar besit gevind word, moet die volgende prosedure gevolg word:
8.1 Die opsiener moet die kandidaat se selfoon/ongemagtigde elektroniese toestel verwyder asook die eksamenantwoordboek en die woord "ONREËLMATIGHEID" op die voorste buiteblad van die antwoordboek skryf asook die tipe/aard van die onreëlmatigheid, datum en tyd.
8.2 Die opsiener moet dan 'n nuwe antwoordboek aan die kandidaat uitreik. Hierdie antwoordboek moet ook geëndosseer word met die woorde: "NUWE ANTWOORDBOEK" asook die datum en tyd van uitreiking.
8.3 Die kandidaat moet ingelig word dat die feit dat hy/sy toegelaat word om voort te gaan met die eksamen, nie as 'n kondonering van sy/haar oortreding dien nie en dat 'n geskrewe verslag aan die einde van die eksamen aan die Departement voorgelê sal word.
8.4 Die opsienier moet geen bykomende tyd toelaat om te vergoed vir die verlore tyd tydens die verloop van die opsporing en prosessering van die eksamen-onreëlmatigheid nie.
8.5 Aan die einde van die eksamensessie moet die opsiener wat die selfoon of ongemagtigde elektroniese toestel ontdek het, onmiddellik 'n volledige skriftelike verslag aan die prinsipaal van die skool voorlê. Die kandidaat moet na afloop van die eksamen aangespreek word oor die onreëlmatigheid en versoek word om 'n geskrewe beëdigde verklaring of reaksie op die beweerde oortreding te voorsien. Die hoofopsiener moet 'n onreëlmatigheidsverslag oor die betrokke onreëlmatigheid invul en hierdie vorm moet deur die opsiener, die prinsipaal asook die betrokke kandidaat onderteken word.
8.6 Indien die kandidaat weier om die vereiste geskrewe verklaring in te dien of 'n reaksie te verskaf, moet hierdie weiering skriftelik deur die hoofopsiener bevestig word.
8.7 Die prinsipaal moet alle verslae in hierdie verband by sy of haar kringbestuurder indien vir voorlegging aan:

Direktoraat: Assesseringsbestuur
Vir aandag: Assistentdirekteur van Onreëlmatighede
Wes-Kaap Onderwysdepartement
Grand Central Towers-gebou
Laer Parlementstraat
Kamer 5-19

8.8 Die opsiener moet die selfoon of elektroniese toestel waarop beslag gelê is, nagaan om uit te vind of dit nie inkriminerende materiaal bevat nie. Indien dit enige inkriminerende materiaal bevat, moet die selfoon of elektroniese toestel met die verslae en die antwoordboeke aan die Direktoraat: Assesseringsbestuur oorhandig word. Indien die selfoon of die elektroniese toestel geen inkriminerende materiaal bevat nie, kan dit aan die einde van die eksamensessie aan die betrokke kandidaat terugbesorg word.

9. Aangeheg by hierdie minuut is die onreëlmatigheidsverslag wat voltooi moet word ten einde onreëlmatighede aan te meld.

10. Prinsipale en sentrumbestuurders word versoek om hierdie inligting onder die aandag van al hulle kandidate te bring voor die aanvang van alle eksamens.


GETEKEN: PENNY VINJEVOLD
HOOF: ONDERWYS
DATUM: 2015:03:12

"Irregularities Report Form"  (grootte: 51 KB)