| 1. |
I-NSNP ixhaswa ngemali yegranti ekhutshwa phantsi kwemiqathango nefunyanwa qho ngekota kwiSebe leMfundo esiSiseko kuzwelonke (ISebe iDBE). Isikhokelo esikhoyo ngoku semithetho esetyenziswayo kule granti sicaciswa gca nguMthetho i-Division of Revenue Act (DoRA) ka-2014. |
| 2. |
Oku kulandelayo, phakathi kwezinye izinto, zezona mfuno zisezantsi zimiselweyo ezisetyenziswa ekulawuleni nasekwenziweni kwemisebenzi ye-NSNP: |
| 2.1 |
Ukutya makunikwe bonke abafundi abakuwo onke amaNqanaba eNtlupheko 1 - 3 kwizikolo zikarhulumente eziziiprayimari neziziisekondari ngazo zonke iintsuku zesikolo. (Iprogram yanatyiswa ngokusemthethweni ukwenzela ukuba ibandakanye nezikolo zikarhulumente eziziisekondari zeNqanaba leNtlupheko 3 ngo-Apreli 2011.) |
| 2.2 |
Ukutyisa abafundi ngumba obaluleke gqitha, kungakhathaliseki nayiphi na eminye imisebenzi okanye izinto eziqhubeka esikolweni, yaye ukutya makuphakwe ngamaxesha amiselweyo ngosuku ngalunye. Abafundi mabanikwe iziqhamo nemifuno ngeentsuku ezimiselweyo. |
| 2.3 |
Inqununu yesikolo, njengegosa elifanele ukuphendula ngokuqhubeka esikolweni, luxanduva lwayo ukongamela ulawulo lweprogram esikolweni nokuqinisekisa impumelelo yayo. Imisebenzi yenqununu ibandakanya oku kulandelayo:
- Ukukhetha nokutyumba utitshala omakasebenze njengomququzeleli wesikolo we-NSNP. (Umququzeleli uya kubeka esweni asuphavayize imisebenzi yemihla ngemihla yale program, aqinisekise ukugcinwa kweerekhodi ngokufanelekileyo (adequate recordkeeping) ngokungqinelana nesikhokelo se-NSNP yaye anike ingxelo kwinqununu.)
- Ukuqinisekisa ukuqeshwa kwamavolontiya aphatha ukutya (volunteer food handlers (VFHs)) (abazali abangaqeshwanga abangabahlali) ukuncedisa ekulungiseni nasekuphakeni ukutya. (Ingcaciso engaphezulu ngamavolontiya aphatha ukutya icaciswe phantsi komhlathi 5 apha ngezantsi.)
|
| 2.4 |
Ukuqinisekisa ukuba ixesha lokutyisa esikolweni alidluleli kwelokufundisa, kunyanzelekile ukuba ixesha lokutyisa licwangciswe ngenyameko nangobulumko lize lifakwe kwithayimthebhile, yaye konke oku makube phantsi kweliso ngokufanelekileyo ngelo xesha. |
| 2.5 |
Iprogram yenzelwe ukuqinisekisa ukuba abafundi bafumana ukutya kwabo kwiiyure ezimbini zokuqala zosuku lwesikolo, njengoko abaninzi kwaba bafundi benokuba abakhange bafumane kutya kwiiyure eziyi-12 ezidlulileyo. Isidlo sakusasa masiphakwe phambi ko-8:00am kuze ukutya kwesidlo sasemini (main meal) kuphakwe phambi ko-12:30pm. |
| 2.6 |
Ukugcinwa kwerejista yokutyisa abantwana yemihla ngemihla (daily feeding register) nerejista yamavolontiya aphatha ukutya (VFHs) zicaciswa kwi-NSNP Guideline No. 1. Ezi rejista mazizaliswe yonke imihla ukwenzela ukuba kurekhodwe ukuba bangaphi na abafundi abafumene ukutya yaye emangaphi amavolontiya aphatha ukutya ebesemsebenzini ngosuku ngalunye. |
| 2.7 |
Ngokwe-South African Bureau of Standards (SABS), Standard No. SANS 1539, kuphela yisilinda yerhasi enye engu-19kg evumelekileyo ekhitshini. |
| 2.8 |
Makuqatshelwe ukuba amaxwebhu amalunga nokuhlalwulwa kwe-VFHs athunyelwa qho ngonyaka kuzo zonke izikolo ezichaphazelekayo kwi-NSNP. Ngokwe-DoRA iintlawulo zobuvolontiya yi-R900 ubuncinane ngomntu ngamnye ngenyanga ngokungqinelana nomlinganiselo 1:200 omele ivolontiya elinye ngomfundi ngamnye. Kucetyiswa lo mlinganiselo ongu-1:200 kwizikolo apho inani lobhaliso labafundi ingu-250 okanye lingaphantsi kwelo. Abaququzeleli bezithili banikwe umsebenzi wokutshekisha iintlawulo ezimiselweyo xa betyelele izikolo nokuba baqinisekise ukuba amavolontiya aphatha ukutya (VFHs) ayayisayina incwadi i-stipend book. |
| 3. |
Kulindeleke ukuba ibhunga lolawulo lesikolo (iSGB):
- linike inkxaso malunga nokufumana ezinye iimfuno ezongezelelweyo zale program;
- liqinisekise ukuba iprogram iphunyezwa ngokuyimpumelelo; yaye
- lincedise inqununu ekuqesheni amavolontiya aphatha ukutya (VFHs).
|
| 4. |
Ngokumalunga nokusetyenziswa kwamavolontiya aphatha ukutya kule program, makugxininiswe oku kulandelayo: |
| 4.1 |
Ii-VFH zenza umsebenzi wokulungisa, ukupheka nokuphaka ukutya, kunye nokucoca indawo ekuphekelwa kuyo. Kulindeleke ukuba zigcine umgangatho wococeko lwazo buqu ukwinqanaba eliphezulu. |
| 4.2 |
Ii-VFHs ziya kuqeshwa yaye zifumane iintlawulo zobuvolontiya qho ngenyanga ngokungqinelana namanqanaba eentlawulo eSebe iWCED (WCED scales and rates) zamavolontiya aphatha ukutya.
|
| 4.3 |
Xa kuqeshwa i-VFH makuzaliswe ifom yobhaliso ye-VFH Ifom ezaliswe ngokupheleleyo mayithunyelwe ngefeksi kumququzeleli we-NSNP kwi-ofisi yesithili semfundo echaphazelekayo. |
| 4.4 |
Umququzeleli we-NSNP kwi-ofisi yesithili semfundo makaziswe ngencwadi ebhaliweyo xa i-VFH lisishiya isithuba sengqesho esikolweni ukwenzela ukuba zimiswe iintlawulo zobuvolontiya zaqho ngenyanga. |
| 4.5 |
I-VFH mayihlawulwe intlawulo yobuvolontiya epheleleyo, njengoko kucacisiwe kumanqanaba eentlawulo zobuvolontiya. |
| 4.6 |
Ii-VHFs mazifumane iintlawulo zobuvolontiya zazo zaqho ngenyanga ekupheleni kwenyanga nganye. I-VFH nganye mayisayine uxwebhu lokungqinisisa iintlawulo zobuvolontiya (volunteer verification document) ukuvuma ukufumana loo ntlawulo yobuvolontiya. |
| 4.7 |
Makwenziwe imvumelwano sisikolo nevolontiya ngalinye. Mayisayinwe ngabo bobabini, isikolo nevolontiya elichaphazelekayo. Umzekelo wemvumelano elolu hlobo uyafumaneka kwisikhokelo i-NSNP Guideline No. 5. kwaye mayitshintshwe apha naphaya ukulungiselela iimfuno zesikolo. Kucetyiswa ukuba le mvumelwano mayihlaziywe qho ngonyaka nge-1 Apreli. Iikopi zeemvumelwano ezisayiniweyo mazigcinwe efayilini ye-NSNP yesikolo
(Ngethuba lokutyelela izikolo, ikomiti yokuphicotha nokubeka esweni umsebenzi yafumanisa ukuba ezinye izikolo azizange zizisayine iimvumelwano ze-VFH. Inqununu yesikolo mayiqinisekise ukuba zonke ii-VFHs zayo ziyazisayina iimvumelwano yaye zifayilishwe ngokufanelekileyo.) |
| 5. |
I-NSNP inike zonke izikolo ifayili ye-NSNP. Umququzeleli weNSNP weSikolo makaqinisekise ukuba amaxwebhu achaphazelekayo amalunga neNSNP agcinwa kule fayili inikwe izikolo. |
| 6. |
Izikolo zamaNqanaba eNtlupheko 1 - 3 ezibangatyisi bonke abafundi bazo mazazise abaququzeleli nee-VFHs zabo ngalo mba. Iileta ezivela ezikolweni ezicela ukutenxa kule nkqubo yokutyisa bonke abafundi besikolo mazisiwe kwi-ofisi yephondo ngenjongo yokuba zigcinwe kwirekhodi (for record keeping). |
| 7. |
Kubaluleke kakhulu ukuba imihla yokuphelelwa kwezinto ezityiwayo (expiry dates) itshekishwe ngocoselelo yaye makuqatshelwe ukuba ithuba lokugcinwa kwezinto ezityiwayo zingekonakali makungagqithwa kulo naphantsi kwazo naziphi na iimeko. |
| 8. |
Makwenziwe izicwangciso ngocoselelo ukwenzela ukuthintela ukuphelelwa yirhasi. |
| 9. |
Ndinqwenela ukusebenzisa eli thuba ndidlulise umbulelo wethu ongazenzisiyo kuzo zonke iinqununu zethu nabasebenzi beNSNP ngokuzimisela kwabo nangokukhuthala kwabo ekunyamekeleni abantwana bethu. |
ISAYINWE: NGU-PA VINJEVOLD
INTLOKO: YESEBE LEMFUNDO
UMHLA: 2014:04:09
|
 |