1. Die Wes-Kaap Onderwysdepartement (WKOD) het 'n Procedural Policy Framework - Universal Access to Quality Grade R goedgekeur en uitgereik aan alle inrigtings wat graad R aanbied. Die Raamwerk is in ooreenstemming met die nasionale beleid oor graad R.

2. Die Raamwerk voorsien onder andere inligting oor die indiensneming van graad Rpraktisyns en watter regsdokument 'n praktisyn moet ontvang en veilig bewaar.

3. Die WKOD het ook Omsendbrief 0039/2012 uitgereik waarin skole ingelig is van die veranderinge in die gebruik van graad R-subsidies. Van besondere belang in hierdie omsendbrief, was die feit dat dit weer gestaaf is dat 80% van die subsidie aan graad Rpraktisyns betaal moet word, in ooreenstemming met die voorskrifte van die Raamwerk.

4. Die WKOD is veral oorval met oproepe van praktisyns wat kla dat hulle nie die toepaslike en voorgeskrewe salaris ontvang nie. Daar is gevalle waar prinsipale van inrigtings met graad R, op die vereiste vlak betaal en later versoek dat 'n praktisyn of praktisyns 'n gedeelte van die salaris elke maand aan hulle terugbetaal. Daar is gevalle waar die praktisyns hulle uiteindelik tot die Kommissie van Versoening, Bemiddeling en Arbitrasie (KVBA) wend.

5. Hoofde van inrigtings moet kennis neem dat die WKOD geoudit word ingevolge die Wet op Openbare Finansiële Bestuur (WOFB), 1999 (Wet 1 van 1999), soos gewysig. Een van die doeleindes

6. Dit is teen hierdie agtergrond dat die WKOD alle skoolbeheerliggame (SBLe) versoek om graad R-praktisyns elektronies te betaal, met onmiddellike effek. Die volgende prosedures moet gevolg word:
6.1 Elke inrigting moet elke praktisyn in hulle diens versoek om die inrigting van hulle bankbesonderhede te voorsien;
6.2 Die SBL van die inrigting of die prinsipaal, wat behoorlik daartoe gedelegeer is deur die SBL, moet die nodige reëlings tref met 'n erkende finansiële inrigting, verkieslik een waar die inrigting banksake doen; en
6.3 Die prinsipaal moet die IBB-bestuurder: VKO voorsien van 'n afskrif van die elektroniese betalingsooreenkoms, met die gekose finansiële instelling, teen nie later nie as 24 Oktober 2014.

7. Waar daar 'n verandering van praktisyn is moet dieselfde proses, soos hierbo uiteengesit, gevolg word. In hierdie geval moet die prinsipaal die afskrif, soos beskryf in 6.3 hierbo, binne 14 dae na so 'n ooreenkoms met die finansiële instelling gesluit is, voorsien.

8. Paragraaf 5 van Omsendbrief 39/2014, gedateer 25 Maart 2014, gee duidelike riglyne aangaande die betaling van graad R-praktisyns se salarisse. SBL’e en prinsipale word aangemoedig om hulself te vergewis van die inhoud van hierdie omsendbrief.

9. Distriksgebaseede IBB-bestuurders: VKO en Skool Korporatiewe Beamptes (SKB's) sal nakoming gedurende die normale verloop van hulle pligte monitor. Hoofkantoorgebaseerde beamptes kan ook sodanige besoeke tydens hulle moniterings- en evalueringsbesoeke aan distrikte uitvoer.

10. SBL'e en prinsipale moet daarop let dat die elektroniese betaling van praktisynsalarisse 'n nakomingsvereiste vir die toekomstige oordrag van subsidies aan inrigtings sal word.

11. Prinsipale van alle gewone openbare skole met graad R-klasse word verder herinner aan hulle verpligtinge ingevolge artikel 16A (2) (h) tot (k) van die Suid-Afrikaanse Skolewet, 1996 (Wet 84 van 1996), soos gewysig, wat staaf dat die prinsipaal –

  1. die beheerliggaam moet bystaan met die bestuur van die skoolfondse, welke bystand moet insluit— die voorsiening van inligting rakende enige voorwaardes opgelê of lasgewings uitgereik deur die Minister, die Lid van die Uitvoerende Raad of die Departementshoof ten opsigte van alle finansiële aangeleenthede van die skool soos in Hoofstuk 4 beoog; raad gee aan die beheerliggaam oor die finansiële implikasies van besluite met betrekking tot die finansiële aangeleenthede van die skool;
  2. alle redelike stappe neem om enige finansiële wanadministrasie of wanbestuur deur enige personeellid of deur die skool se beheerliggaam te voorkom;
  3. 'n lid wees van 'n finansiële komitee of afvaardiging van die beheerliggaam ten einde 'n aangeleentheid wat finansiële implikasies vir die skool inhou, te bestuur; en
  4. enige wanadministrasie of wanbestuur van finansiële aangeleenthede aan die beheerliggaam van die skool en aan die Departementshoof rapporteer.
12. Dra asseblief die inhoud van hierdie omsendbrief oor aan SBL-lede en alle graad R-praktisyns.


GETEKEN: PA VINJEVOLD
HOOF: ONDERWYS
DATUM: 2014:10:14

"Public Finance Management Act (PFMA), 1999 (Act 1 of 1999)"  (grootte: 487 KB)
"South African Schools Act, 1996 (Act 84 of 1996)"  (grootte: 255 KB)