1. Die gewysigde Regulasies vir die Afneem, Administrasie en Bestuur van Assessering van die Senior Sertifikaat-eksamen maak voorsiening vir die skryf van die Senior Sertifikaateksamen tot Mei-Junie 2014.

2. Aangeheg is die rooster vir die Mei-Junie 2014 Senior Sertifikaat-eksamen.

3. Die eksamen begin op 06 Mei 2014 en loop ten einde op 25 Junie 2014.

4. Eksamensentrums vir die afneem van die Senior Sertifikaat-eksamens sal ingerig word in lokale wat deur die Wes-Kaap Onderwysdepartement (WKOD) bepaal word.

5. Ten opsigte van die toelating van kandidate tot die eksamenlokaal, moet opsieners verseker dat elke kandidaat sy of haar toelatingsbrief en identiteitsdokument toon. Opsieners moet hierdie toelatingsvereistes streng toepas. 'n Kandidaat wat nie die vereiste dokument(e) toon voor hy of sy die eksamenlokaal betree nie, moet egter nie verhinder word om daardie besondere eksamen te skryf nie. Die betrokke kandidaat moet die vereiste dokument(e) die volgende dag toon. Indien daardie kandidaat nalaat om dit te doen, moet 'n onreëlmatigheid verklaar word en die normale prosedure met betrekking tot onreëlmatighede moet gevolg word.

6. Die hoofopsiener moet seker maak dat kandidate die eksamenlokaal binnegaan 35 minute voor die amptelike aanvangstyd van die eksamensessie. Hierdie tyd moet soos volg gebruik word:
6.1 Die eerste 25 minute moet gebruik word om die kandidate hul korrekte sitplekke te laat inneem, om vraestelle uit te deel, en eksamenregulasies oor te dra.
6.2 Tydens die oorblywende 10 minute moet kandidate die geleentheid kry om die vraestel deur te lees.
6.3 In geen stadium tydens hierdie 35 minute is dit toelaatbaar om te skryf of notas te maak nie. Enige oortreding van hierdie reël sal as 'n onreëlmatigheid beskou word.
6.4 Kandidate moet ophou skryf op die tyd wat op die eksamenrooster aangedui word.

7. Verteenwoordigers van die WKOD, Umalusi en die Departement van Basiese Onderwys sal die eksamenprosesse by die eksamensentrums monitor.

8. Bring asseblief die inhoud van hierdie omsendbrief onder die aandag van alle kandidate wat van voornemens is om die Senior Sertifikaat-eksamen in Mei - Junie 2014 af te lê.


GETEKEN: PA VINJEVOLD
HOOF: ONDERWYS
DATUM: 2014:01:17

2014 Mei/Junie Finale Senior Sertifikaat-Eksamenrooster  (grootte: 61 KB)