1. 2015 se personeeldiensstate

Verwys asseblief na die Wes-Kaap Onderwysdepartement (WKOD) Omsendbrief 0031/2009, van 28 Augustus 2009, vir 'n volle beskrywing van die wetgewing en maatreëls van toepassing op die jaarlikse uitgawe van onderwyspersoneeldiensstate vir skole. Die inhoud van daardie omsendbrief bly van toepassing tot 2015, behalwe vir die volgende wysigings:
1.1 Ingevolge die maatreëls van die Hersiene Posverspreidingsmodel, moet gewone openbare skole en spesiale openbare skole van hulle jaarlikse diensstate voorsien word teen 30 September van die voorafgaande jaar. Dus, vir die 2014-akademiese jaar verval alle onderwyspersoneeldiensstate wat aan gewone openbare en spesiale openbare skole uitgereik is (sowel as alle addisionele poste wat geskep is vir en uitgereik is aan 'n openbare skool in 2014 as gevolg van 'n toename in die leerderinskrywings of die kurrikulumbehoeftes van die skool) op 31 Desember 2014.
1.2 Die onderwyserdiensstate vir 2015 sal gepubliseer word op die Sentrale Onderwysbestuursinligtingstelsel (SOBIS), onder die skakel Administration (Establishments) op 22 Augustus 2014.

2. Addisionele toekennings (Posvlak 1 poste)

Die WKOD behou die reg voor om die toekenning van die onderwyserpersoneeldiensstaat van 2015 te herbereken indien die inligting oor 'n skool, soos vervat op die SOBIS, nie korrek bevind is nie.
3. Hersiening van 2015 se diensstate
3.1 Skole kan 'n hersiening van die berekening van hulle onderwyspersoneeldiensstaat aanvra indien die SOBIS-leerderinskrywingsvorms, soos gereflekteer op die diensstaatbrief, verskil van die leerderdata soos op 31 Julie 2014. Ten einde vir die WKOD om die berekening uit te voer, sal die skool bewys moet voorlê by die Direktoraat: Strategiese Mensbestuur dat die leerderinskrywings soos gebruik en genoem in die diensstaatbrief, foutief is. Skole wat daarbenewens aandui dat hulle genoeg klaskamers het en van voorneme is om addisionele leerders vir 2015 in te skryf, kan aansoek doen om addsisionele poste. Aansoeke moet voorgelê word gedurende die tydperk van 26 Augustus 2014 tot 19 September 2014, en alle aansoeke moet via die SOBIS gedoen word. Geen aansoek om addisionele poste sal oorweeg word indien dit nie via die SOBIS voltooi is nie.
3.2 In die geval dat 'n skool 'n graad of grade uitfaseer, sal die diensstaat van sodanige skool herbereken word, gebaseer op die aantal leerders wat in die skool agterbly. In die geval waar leerders 'n skool verlaat tydens die uitfasering van 'n graad of grade, sal die personeeldiensstate van die ontvangende skool(skole) se diensstate hersien word.

4. Herberekening van onderwyspersoneeldiensstaat as gevolg van verandering in leerderinskrywings gedurende 2015
4.1 Die WKOD behou die reg voor om posvlak 1-poste af te skaf indien daar in die loop van 2015 'n verlaging is in die skool se leerderinskrywings. In sulke gevalle sal onderwysers wat tydelik aangestel is, na ander poste by ander inrigtings oorgeplaas word. Daarom, indien onderwysers op 'n tydelike basis gewerf word, moet skoolhoofde aansoekers inlig dat hulle aangestel sal word met die verstandhouding dat hulle moontlik oorgeplaas kan word na ander skole indien hulle poste afgeskaf word as gevolg van 'n daling in die leerderinskrywings van die skool.
4.2 Alle kontrakaanstellings kan slegs tot 31 Maart 2015 gemaak word. Kontrakaanstellings wat vanaf 01 April 2015 gemaak word, kan tot 31 Desember 2015 gemaak word, indien die skool vir sodanige pos kwalifiseer.
4.3 Dit word van alle skole verwag om hulle inskrywingsgetalle op die SOBIS, teen Dinsdag, 3 Maart 2015, by te werk. Al daardie skole wie se leerderinskrywings minder is as hulle leerderinskrywingstal soos op 31 Julie 2014, se onderwyspersoneeldiensstaat sal teen 13 Maart 2015 herbereken word. Indien die skool 'n pos of poste moet verloor, sal die getal substantiewe kontrakaanstellings gelyk aan of minder as die getal poste wat die skool verloor, nie toegeken word met ingang van 01 April 2015 nie.
4.4 In gevalle waar daar 'n toename is in leerderinskrywings van 19 Januarie 2015 tot 31 Januarie 2015, kan die skool, gedurende die periode van 19 Januarie 2015 tot 30 Januarie 2015, aanlyn aansoek doen om 'n groeipos. Die leerderinskrywingstotaal wat in ag geneem word, sal die inskrywingstotaal op die SOBIS ten tye van die aansoek wees. Geen aansoek sal aanvaar word indien dit nie via die SOBIS ingedien is nie.

Kringspanbestuurders moet verseker dat alle skole hulle aansoeke, teen 30 Januarie 2015, aanlyn ingedien het.
4.5 Prinsipale moet asseblief op die volgende let:

  • Nominasies vir onderwysers in addisionele poste, waarvoor aansoek gedoen is as gevolg van groei en/of kurrikulumbehoeftes van die skool, kan slegs gemaak word nadat skriftelike goedkeuring van die WKOD verkry is.
  • Geen onderwyser mag met haar/sy pligte begin voor goedkeuring nie verleen is vir 'n addisionele pos deur die WKOD nie.
5. Vul van geadverteerde poste
5.1 Alle poste wat reeds in 'n departementele Vakaturelys geadverteer is, mag permanent gevul word, mits daardie poste op die diensstaat vir 2015 verskyn.
5.2 Indien 'n geadverteerde pos nie op die diensstaat vir 2015 verskyn nie, is die skool nie geregtig op daardie pos nie en sal sodanige pos as foutiewelik geadverteer, beskou word.
5.3 Die bepaling dat 'n geadverteerde pos (veral 'n bevorderingspos) slegs gevul kan word indien dit nie veroorsaak dat 'n botallige onderwyser geskep word nie, bly van krag.
5.4 Indien die skoolhoof en die beheerliggaam van mening is dat die posbeskrywing van die geadverteerde pos nie langer aan die kurrikulumbehoeftes van die inrigting voldoen nie, mag hulle die WKOD versoek om die pos te beskou as foutiewelik geadverteer. 'n Volledige verduideliking moet so 'n versoek vergesel.

6. Vul van vakante substantiewe poste (gebaseer op instellings soos op 22 Augustus 2014)
6.1 Voorkeur sal gegee word aan die plasing van onderwysers wat as botallig verklaar is.
6.2 Voorkeur sal gegee word vir die plasing van gekwalifiseerde onderwysers wat voordeel getrek het uit die Funza Lushaka-beursskema en alle ander nuut gekwalifiseerde onderwysers.

7. Vul van bykomende onderwysposte (gebaseer op aansoeke vir groei en kurrikulumbehoeftes tussen 26 Augustus 2014 en 19 September 2014
7.1 Voorkeur sal gegee word vir die plasing van gekwalifiseerde onderwysers wat voordeel getrek het uit die Funza Lushaka-beursskema en alle ander nuut gekwalifiseerde onderwyers.
7.2 In die geval dat 'n Funza Lushaka-beurshouer 'n indiensnemingsaanbod nie aanvaar nie, kan ander paslik gekwalifiseerde werklose onderwysers vir aanstelling oorweeg word vir 'n vakante substantiewe pos.
7.3 Slegs gekwalifiseerde onderwysers met 'n ROKW 13 of hoër kan oorweeg word vir vakante onderwysposte. Die Departement sal die reg uitoefen om ander onderwysers aan te stel slegs indien geen gekwalifiseerde onderwysers geïdentifiseer kan word vanaf die bogenoemde kategorieë nie. Aansoeke vir aanstellings van tydelike onderwysers in die volgende kategorieë moet vooraf goedkeuring verkry vanaf die Hoofdirektoraat: Mensbestuurspraktyke.

  1. Onderwysers bo die ouderdom van 65 jaar;
  2. Onderwysers wat voorheen 'n loopbaan in die onderwysberoep gehad het;
  3. Buitelanders;
  4. Onderwyers wat weens swak gesondheid afgetree het; en
  5. On- en ondergekwalifiseerde onderwysers.
7.4 Kringspanbestuurders kan ook oorplasings na ander skole goedkeur (sonder om die versoek vir oorplasing na die Hoofkantoor te verwys) in gevalle waar die oorplasing die proses van herontplooiing sal bevorder, d.w.s waar die oorplasing die herontplooiing van 'n botallige onderwyser tot 'n vakante substantiewe pos sal bring. Hierdie maatreël geld ook in gevalle waar die oorplasing 'n Funza Lushaka-beurshouer sal toelaat om, in die pos wat ontruim is weens die oorplasing, aangestel te word.

8. Botallige onderwysers
8.1 Onderwysers wat reeds as botallig verklaar is, gebaseer op vorige diensstate en in ooreenstemming met vorige prosesse en wat steeds botallig is, behou hulle botallige status. Hierdie onderwysers sal ingevolge die geldende kollektiewe ooreenkomste van die Raad op Arbeidsverhoudinge in die Onderwys (RAVO) hanteer word.
8.2 Botallige onderwysers kan deur middel van passing en plasing in vakatures op die nuwe diensstaat opgeneem word.
8.3 Onderwysers wat permanent aangestel is moet ingevolge die Kollektiewe Ooreenkoms 2 van 2003 van die RAVO geïdentifiseer word.
8.4 Die verklaring van botallige onderwysers wat nie gepas geplaas kan word teenoor die 2015 onderwyspersoneeldiensstaat nie, moet teen 30 November 2014 afgehandel wees. Kringspanbestuurders sal briewe uitreik aan betrokke onderwysers wat hulle in kennis stel dat hulle as botallig verklaar is en afskrifte van sodanige briewe sal aan die Direktoraat: Werwing en Keuring gestuur word, vir die aandag van mnr Lindsay Jansen, teen nie later nie as 30 November 2014.

9. Navrae

Rig asseblief alle navrae aangaande hierdie omsendbrief en die betrokke wetgewing aan u kringspanbestuurder.

10. Algemeen

Bring asseblief die inhoud van hierdie omsendbrief onder die aandag van alle onderwysers en lede van u skoolbeheerliggaam.


GETEKEN: JH LYNERS
WAARMENDE HOOF: ONDERWYS
DATUM: 2014:08:19