1. Die NSVP word befonds deur 'n voorwaardelike toekenning wat kwartaalliks van die nasionale Departement van Basiese Onderwys (DBO) ontvang word. Die huidige regsraamwerk vir hierdie toekenning word uitgestippel in die Wet op die Verdeling van Inkomste (WVI), 2014.

2. Die volgende is, onder andere, die minimum vereistes wat van toepassing is op die bestuur en werking van die NSVP:
2.1 Maaltye moet op alle skooldae aan alle leerders in alle kwintel 1 – 3 openbare primêre en sekondêre skole verskaf word. (Die program is in April 2011 amptelik uitgebrei om kwintiel 3 openbare sekondêre skole in te sluit.)
2.2 Maaltye geniet voorrang, ongeag enige funksies of byeenkomste by die skool, en moet elke dag op die voorgeskrewe tye bedien word. Vrugte en groente moet op die voorgeskrewe dae bedien word.
2.3 Die skool se prinsipaal, as die rekenpligtige amptenaar, is verantwoordelik vir die algehele bestuur van die program by die skool en om die sukses daarvan te verseker. Die pligte van die prinsipaal sluit die volgende in:

  • Om 'n onderwyser te identifiseer en te nomineer wat as die NSVP-skoolkoordineerder kan dien. (Die koordineerder sal toesig hou oor die daaglikse aktiwiteite van die program en verseker dat daar genoegsaam rekord gehou word ooreenkomstig die NSVP-riglyne en aan die prinsipaal rapporteer.)

  • Om te verseker dat vrywillige voedselbewerkers (VVB's) (werklose ouers vanuit die gemeenskap) aangestel word om te help met die voorbereiding en bediening van maaltye. (Meer inligting oor VVB's word verskaf in paragraaf 5 hieronder.
2.4 Om te verseker dat die voedingstyd by die skool nie inbreuk maak op onderrigtyd nie, is dit uiters belangrik dat die voedingstyd versigtig beplan word en op die rooster aangebring word, en dat daar behoorlike toesig gedurende daardie tyd sal wees.
2.5 Die program is ontwerp om te verseker dat die leerders hulle maaltye binne die eerste twee uur van die skooldag ontvang, aangesien baie van hierdie leerders nie 'n maaltyd sou geeet het gedurende die vorige 12 uur nie. Ontbyt moet voor 8:00 vm bedien word, en die hoofmaaltyd teen nie later nie as 12:30 nm.
2.6 Die hou van 'n daaglikse voedingsregister en 'n VVB's-bywoningsregister word verduidelik in NSVP-riglyne no. 1. Hierdie registers moet daagliks voltooi word om aan te teken hoeveel leerders maaltye ontvang het, en hoeveel VVB's elke dag aan diens was.
2.7 Volgens die Suid-Afrikaanse Buro vir Standaarde (SABS), Standaard No. SANS 1539, word slegs een 19 kg gassilinder in die kombuis toegelaat.
2.8 Daar moet kennis geneem word dat dokumentasie rakende betalings aan VVB's op 'n jaarlikse basis aan alle skole wat by die NSVP betrokke is, gestuur word. Volgens die WVI honoraium sal 'n minimum van R900 per persoon per maand, in lyn met 'n voedselbewerker tot leerder ratio van 1:200, betaal word. 'n Ratio van 1:20 word aanbeveel vir skole waar leerderinskrywing 250 of minder is. Distrikskoordineerders is opdrag gegee om die vasgestelde honorarium na te gaan wanneer hulle skole besoek, en om te verseker dat die voedselbewerkers die toelaeboek teken.

3. Daar word van die skoolbeheerliggaam (SBL) verwag om:

  • ondersteuning te bied wanneer addisionele vereistes vir die program aangeskaf moet word;
  • te verseker dat die program doeltreffend toegepas word; en
  • die prinsipaal by te staan met die aanstelling van VVB's.
4. Die volgende moet, ten opsigte van die gebruik van vrywillige voedselbewerkers (VVB's) in die program, beklemtoon word:
4.1 VVB's is verantwoordelik vir die voorbereiding, kook en bediening van maaltye, en vir die skoonmaak van die kookarea. Daar word van hulle verwag om 'n hoe vlak van persoonlike higiene te handhaaf.
4.2 VVB's sal aangestel word en 'n maandelikse honorarium ontvang wat in lyn is met die goedgekeurde WKOD-skale en -tariewe vir vrywilligers.
4.3 'n VVB-registrasievorm moet voltooi word wanneer 'n VVB aangestel word. Die voltooide vorm moet gefaks word na die NSVP-koordineerder by die onderwysdistrikskantoor.
4.4 Die NSVP-koordineerder by die distrikskantoor moet skriftelik ingelig word wanneer 'n VVB die diens van die skool verlaat sodat die maandelikse honorariumoordrag vir daardie persoon gestaak kan word.
4.5 Die volle honorariumbedrag, soos aangedui in die vrywillige honorariumskaal, moet aan 'n VVB betaal word.
4.6 VVB's moet hulle maandelikse honorarium aan die einde van elke maand ontvang. Elke VVB moet 'n vrywillige verifikasiedokument onderteken wat ontvangs van die honorariumbetaling erken.
4.7 'n Ooreenkoms moet tussen die skool en elke VVB aangegaan word. Dit moet onderteken word deur die skool sowel as deur die betrokke VVB. 'n Voorbeeld van sodanige ooreenkoms verskyn in NSVP-riglyn no. 5, en moet aangepas word vir die behoeftes van die skool. Dit word aanbeveel dat hierdie ooreenkoms jaarliks op 1 April hernu word. Kopiee van getekende ooreenkomste moet in die skool se NSVP-leers gehou word.

(Tydens hulle besoeke het die oudit- en moniteringspan gevind dat sommige skole nie geondertekende VVB-ooreenkomste het nie. Die skool se prinsipaal moet verseker dat al hulle VVB’s ooreenkomste onderteken word en dat dit behoorlik geliasseer word.

5. NSVP het alle skole van 'n NSVP-lêer voorsien. Die NSVP-skoolkoördineerder moet verseker dat hulle alle die toepaslike dokumentasie rakende die NSVP-lêer, behou.

6. Kwintel 1 tot 3 skole wat nie al hulle leerders voed nie, moet hulle koördineerders en VVB’s bewus maak van hierdie feit. Briewe vanaf skole wat 'n afwyking van die hele skoolvoeding versoek, moet aan die provinsiale kantoor voorsien word, vir rekordhouding.

7. Dit is uiters belangrik dat die vervaldatums op alle kos items deeglik nagegaan word, en dit moet in ag geneem word dat die raklewe van die voedsel onder geen omstandighede oorskry mag word nie.

8. Daar moet deeglik beplan word om 'n tekort aan gas te voorkom.

9. Ek wil van hierdie geleentheid gebruik maak om al ons prinsipale en NSVP-personeel te bedank vir hulle toewyding en entoesiasme wanneer dit kom by die versorging van ons kinders.


GETEKEN: PA VINJEVOLD
HOOF: ONDERWYS
DATUM: 2014:04:09