| |
Ekuqapheleni iimfuno zokwenziwa kwenkonzo yeSebe leMfundo, ngokunjalo nezoluntu kwanezabasebenzisi beenkonzo, ndiyavuya ukwazisa ukuba iSebe leMfundo leNtshona Koloni (iSebe iWCED) lisebenzisa umgaqo-nkqubo omalunga nokusebenza iiyure zomsebenzi ezahlukileyo (staggered working hours). Ukusebenza iiyure zomsebenzi ezahlukileyo kuthetha ukuba umsebenzi angathetha-thethana nesuphavayiza yakhe ngeeyure zomsebenzi lo gama asasebenza iiyure eziyi-40 zomsebenzi zeveki. Lo mgaqo-nkqubo wenzelwe ikakhulu ukunika inkxaso abasebenzi abathi, ngenxa yeemeko ezithile ezibachaphazelayo, bakufumane kunzima ukusebenzisa mbo iiyure ezimiselweyo okanye iiyure zomsebenzi, oko kukuthi, u-7:30 – 16:00 yonke imihla.
Lo mgaqo-nkqubo unika ithuba abasebenzi base-ofisini beSebe iWCED abasebenza ngeeyure zomsebenzi eziqhelekileyo ukuba bavunyelwe ukusebenzisa iiyure zomsebenzi ezahlukileyo ukususela ngowe-1 Apreli 2013 ngokuhambelanayo nale migqaliselo nemimiselo elandelayo:
- ixesha lokuqala umsebenzi malingabikho phambi ko-7:00 lize lona ixesha lokutshayisa lingabikho semva ko-16:30;
- ixesha lokuba semsebenzini (core time) limiselwe u-08:00 de kube ngo-15:30 (iiyure eziyi-7½). Kufuneka ukuba ngeli xesha lokuba semsebenzini bonke abasebenzi babe semsebenzini, lingafakwanga ikhefu lelantshi;
- makubekho ikhefu lelantshi lemizuzu eyi-30 ukusuka ku-12:30 – 13:00 okanye ku-13:30, lingqinelane netotali yeeyure eziyi-8 (lingafakwanga ikhefu lelantshi) ezisetyenzwayo yonke imihla;
- iiyure zomsebenzi eziqhelekileyo zeSebe leMfundo zisahleli zingu-07:30 – 16:00 lize ixesha lelantshi lisusele ku-12:30 – 13:00. Nakuphi ukwahluka kula malungiselelo, kuya kunyanzela abasebenzi ukuba benze amalungiselelo ngokuzalisa le fom eqhotyoshelweyo apha (isiHlomelo A);
- igunya lokuvuma izicelo zabasebenzi ngabanye zokwahluka kwiiyure zomsebenzi eziqhelekileyo, lidluliselwe kuBalawuli bamacandelo ahluka-hlukeneyo kwiSebe leMfundo;
- amaxesha omsebenzi ekuvunyelwene ngawo aya kuhlala esebenza kude kufumaneke imvume yokutshintsha emva kwexesha lobuncinane beenyanga eziyi-6;
- imimiselo enxulumene ne-ovathayim iya kuhlala ingatshintshwanga. Oku kuthetha ukuba ixesha le-ovathayim liya kuqala ngoko nangoko emva kokuba kugqitywe inkonzo yeeyure eziyi-8 ngosuku lweveki;
- iikopi zeefom apho ukwahluka kwiiyure zesiqhelo kuvunyiweyo, mazingeniswe kwiCandelo loLawulo lezaBasebenzi (abaqeshwe eMaphandleni nabaqeshwe ezi-Ofisini) ukwenzela iinjongo zokurekhoda;
- abasebenzi mabaqinisekise ukuba baswayipha amakhadi abo okungena (access cards) xa bengena kwisakhiwo ukuqala umsebenzi nokuswayipha kwakhona xa bephuma kwisakhiwo ngexesha lokutshayisa.
Kucelwa abasebenzi baqinisekise ukuba bahambelana mbo neeyure zomsebenzi ezivunyiweyo.
|
