1. UMphathiswa weMfundo esiSiseko kuzwelonke ufakele izilungiso kumhlathi 145 weMimiselo neMigangatho yokuXhaswa kweZikolo ngeMali kaZwelonke (National Norms and Standards for School Funding) ukulungiselela

  1. ukuvunywa kwemibutho ejoyinwa ngokuzithandela (voluntary associations) emele amabhunga olawulo ezikolo (SGBs) ezikolo zikarhulumente;
  2. iintlawulo eziya kwimirhumo yobulungu ehlawulwa ziiSGB kwimibutho ejoyinwa ngokuzithandela yeeSGB; kunye
  3. nokuxhaswa ngemali kwemibutho yeSGB eyaziwayo ukulungiselela injongo yokuqhuba uqeqesho.
2. Ezi zilungiso zifakelweyo zipapashwe kwiGazethi kaRhulumente No. 35617 yowe-27 Agasti 2012 (ikopi yayo iqhotyoshelwe apha kolu xwebhu) yaye ziqala ukusebenza ukususela nge-1 Apreli 2013.

3. Ngokomhlathi 145B womgaqo-nkqubo ofakelwe izilungiso, iiSGB ezingamalungu okanye eziba ngamalungu abhalisiweyo ombutho weeSGB ojoyinwa ngokuzithandela owaziwayo ziya kuthi, ukususela ngomhla wokusebenza kwalo mgaqo-nkqubo, zibe selungelweni lokuhlawula imirhumo yonyaka yobulungu bombutho weSGB ezingamalungu awo.
3.1 Apha ngasezantsi kufumaneka ilisti yemibutho yeeSGB ekhoyo neenkcukacha zoqhagamshelwano zayo. Amabhunga olawulo ezikolo angekabi yinxenye yale mibutho nanqwenela ukuba ngamalungu, anokuqhagamshelana nawo nawuphi na umbutho kule, ukufumana ingcaciso engaphezulu.

UMBUTHO WEBHUNGA LOLAWULO IGAMA IFONI IDILESI YE-IMEYILI
Governing Body Foundation Dr Malcolm Venter 083 3751066 malcolmventer@gbf.org.za
Khayelitsha SGBA Mr B Mnani 078 2823971 bonginkosimnani@yahoo.co.uk
Mitchell's Plain SGBA Mr N Kassiem 021-3761067 admin@ovalnorthss.wcape.school.za
National Association for SGBs Ms Tammy Daniels 084 3108668 daniels@dwa.gov.za
Paarl SGBA Ms Denise Ontong 021-8624366 deniseontong@webmail.co.za
Wellington District SGB Forum Mr JC Williams 021-8732401 admin@pauwgedenkps.wcape.school.za
Federation of Governing Bodies of South African Schools (FEDSAS) Mr Graham Bam 021-9102240 wcape1@fedsas.org.za
SANASE (South African National Association for Special Education) Mr Danie Thiart 021-7122075 dthiart@yahoo.com
3.2 Intlawulo yomrhumo wobulungu akukho mfuneko yokuba ibe ngumrhumo wobulungu wonyaka opheleleyo yaye ingasayi kudlula ibe ngaphaya komrhumo wobulungu opheleleyo. Iintlawulo ziya kubalwa njengoko kuchaziweyo kumhlathi 145B(c) wezilungiso ezifakelweyo yaye ukuhlawulwa kwemali kuya kwenziwa ngokungqinelanayo nomhlathi 145B(e).
3.3 ISebe leMfundo leNtshona Koloni (iWCED) ngoku lilungisa isistim esekhompyutheni apho amalungu eeSGB anokungenisa khona amabango awo eentlawulo zemirhumo yobulungu kwisebe kwaye neentlawulo zinokwenziwa ezikolweni okanye kwimibutho yeeSGB liSebe iWCED. Ingcaciso engaphezulu malunga noku iya kuthunyelwa ekuhambeni kwexesha.

4. Ngokomhlathi 145C walo mgaqo-nkqubo, iimali zinokufumaneka phantsi kwemiqathango ethile kwimibutho yeeSGB eyaziwayo enqwenela ukuqeqesha amalungu eSGB okanye amaqela eeSGB ukwenzela ukuba kuphuculwe ukusebenza kwawo. Qaphela ukuba, nakuba kunjalo, uqeqesho olwenziwa yimibutho yeeSGB aluyisayi kuthatha indawo yoqeqesho olwenziwa lisebe, yaye intsebenziswano yeeSGB ngokumalunga noku ibalulekile.

5. Kucelwa wazise le ngcaciso ingasentla kuwo onke amalungu eSGB ukuze ayithathele ingqalelo.


ISAYINWE: NGU-PA VINJEVOLD
INTLOKO: YESEBE LEMFUNDO
UMHLA: 2013:02:04

"Government Gazette No. 35617 of 27 August 2012"  (ubukhulu: 429 KB)