1. Die verlofbedeling vir die goedkeuring van familieverantwoordelikheidsverlof is uiteengesit in Omsendbrief 60/2003 van 6 Maart 2003.

2. Na die oudit van familieverantwoordeliksverlof deur die Ouditeur-Generaal, het die Wes-Kaap Onderwysdepartement tot die gevolgtrekking gekom dat nie alle inrigtingsgebaseerde opvoeders bekend is met die maatrëels wat van toepassing is op familieverantwoordelikheidsverlof nie. Om hierdie rede word die maatrëels aangaande familieverantwoordelikheidsverlof in hierdie omsendbrief uiteengesit.

3. Familieverantwoordelikheidsverlof in die geval van siekte of geboorte

Aan 'n inrigtingsgebaseerde opvoeder sal 'n maksimum van *5 werksdae verlof met volle betaling per jaarlikse verlofsiklus toegeken word
3.1 Indien sy gade of lewensmaat geboorte skenk; of
3.2 sy of haar kind, gade of lewensmaat siek is.

*NOTA: Resolusie 1/2012 het die maksimum aantal dae van 3 na 5 dae verander

4. Familieverantwoordelikheidsverlof in die geval van 'n sterfgeval

Aan 'n inrigtingsgebaseerde opvoeder sal 'n maksimum van 5 werksdae verlof met volle betaling per jaarlikse verlofsiklus toegeken word indien die opvoeder
4.1 se kind, gade of lewensmaat sterf,
4.2 of 'n nabyfamilielid sterf

NOTA: Soos vermeld in Resolusie 1/2012 word 'n nabyfamilielid gedefinieer as die werknemer se ouer, aanneem-ouer, grootouer, skoon-ouers, skoonbroer-en-suster, kind, aangenome kind, stiefkind, kleinkind, broer of suster

5. Daar word van die inrigtingsgebaseerde opvoeder verwag om dokumentêre bewys te lewer om die voorgenoemde geleentheid waarvoor verlof aangevra word, te bevestig.

6. Spesiale verlof vir dringende privaatsake

'n Inrigtingsgebaseerde opvoeder mag gedurende 'n geskeduleerde werkstydperk spesiale verlof met volle salaris toegestaan word om te sien na 'n dringende private aangeleentheid waarvan die aard sodanig is dat dit die inrigtingsbaseerde opvoeder se afwesigheid van diens noodsaak.

7. Die totale aantal dae wat volgens paragrawe 3, 4 en 6 van hierdie omsendbrief benut kan word, mag nie veertien (14) werksdae in 'n jaarlikse verlofsiklus oorskry nie.

8. Dit moet beklemtoon word dat die maksimum aantal dae wat hierbo aangedui is per jaarlikse verlofsiklus, en nie per geleentheid is nie.

9. Die getal dae toegeken vir familieverantwoordelikheidsverlof en spesiale verlof vir dringende privaatsake mag nie opgehoop word nie. Dit word nie van die inrigtingsgebaseerde opvoeder se opgehoopte verlof verhaal nie.

10. 'n Inrigtingsgebaseerde opvoeder wat sy of haar familieverantwoordelikheidsverlof en/of spesiale verlof vir dringende privaatsake uitgeput het, mag aansoek doen om
10.1 sy of haar opgehoopte verlof te benut: en/of
10.2 onbetaalde verlof. (Die maatrëels ten opsigte van die toestaan van onbetaalde verlof word vervat in Omsendbrief 66/2003.)

11. Bring asseblief hierdie omsendbrief onder die aandag van alle inrigtingsgebaseerde opvoeders, met inbegrip van diegene wat met verlof is, en laat hulle dit teken en dateer.


GETEKEN: PA VINJEVOLD
HOOF: ONDERWYS
DATUM: 2013:02:01