1. Die doel van hierdie omsendbrief is om alle WKOD-inrigtings en skoolbeheerliggame in te lig aangaande die bestaan van gesaghebbende interdikte wat individue en organisasies verbied om politieke bedrywighede te bedryf gedurende skooltyd. Hierdie interdikte kom voor in artikel 33A van die Suid-Afrikaanse Skolewet (SASW), 1996 (Wet 84 van 1996), en artikel 46B van die Wes-Kaapse Wet op Skoolonderwys, 1997 (Wet 12 van 1997).

2. Hierdie omsendbrief herroep Omsendbrief 10/2009 en 38 van 2009 in hulle totaliteit. Verder wysig dit paragraaf 3.3 van Omsendbrief 76/1998 as volg: "Geen advertensie van 'n seksuele of politieke aard, of wat die gebruik van sterk drank, tabak of enige verwante produkte bevorder, word toegelaat nie. Enige voorgestelde advertensies moet beskikbaar gestel word vir ouers se kommentaar en besware vir 'n periode van 21 dae, aangesien verskillende godsdienstige of kulturele groepe verskillende interpretasies van veral die bewoording, "seksuele ... aard" mag hê.

3. Die verbod in paragraaf 2 is net so van toepassing op 'n kommersiële ooreenkoms op 'n reklame- of advertensiebord.

4. Artikel 20(1) (g) noem dit dat die beheerliggaam van 'n skool die skool se eiendom en geboue en gronde wat deur die skool beslaan word, met inbegrip van skoolkoshuise moet bestuur en beheer, maar die uitoefening van hierdie mag moet in geen opsig inmeng met, of andersinds belemmer, die implementering van 'n besluit geneem deur die Lid van die Uitvoerende Raad of die Departementshoof ingevolge enige wet of beleid nie.

5. Hierdie bepaling van die Wet plaas 'n verantwoordelikheid op 'n beheerliggaam om seker te maak dat die skooleiendom se gebruik, ook vir kommersiële doeleindes, gedoen word op 'n wyse wat voldoen aan bestaande wetsbepalings en dat dit in ooreenstemming is met die opdragte van die Provinsiale Minister.

6. Die SASW is in 2011 gewysig deur die Wysigingswet op Wette op Basiese Onderwys, 2011 (Wet 15 van 2011), deur die invoeging van artikel 33A wat noem dat “Geen partypolitieke aktiwiteite mag bedryf word by 'n skool gedurende skooltyd soos bepaal deur die beheerliggaam van die skool ingevolge artikel 20(1) (f) van die SASW nie."

7. Die partypolitieke aktiwiteite bedoel in subartikel (1) van artikel 33A van SASW sluit in, maar is nie beperk nie tot

  1. propagandeveldtogte

  2. die hou van saamtrekke;

  3. die verspreiding van pamflette en strooibiljette; en

  4. die hang of opstel van plakkate en baniere.
8. 'n Lid van 'n politieke party mag nie, vir die doel van partypolitieke aktiwiteite, op skooltyd inbreuk maak nie.

9. Artikel 46B (5) van die Wes-Kaapse Provinsiale Wet op Skoolonderwys, 1997 (Wet 12 van 1997) definieer "skooltyd" as " die tye van die skooldag soos bepaal deur die beheerliggaam ingevolge artikel 21A(1) (g), en enige ander tyd waartydens kurrikulêre of buitekurrikulêre aktiwiteite op die skoolterrein plaasvind".

10. Die SASW bepaal verder, in artikel 33A(4) dat 'n skool nie die vertoon van materiaal van 'n partypolitieke aard op sy terrein mag toelaat nie, tensy sodanige partypolitieke materiaal verband hou met die kurrikulum by die skool.

11. Artikel 46B(3) van die Wes-Kaapse Provinsiale Wet op Skoolonderwys verhinder 'n beheerliggaam of prinsipaal om 'n politieke party of 'n lid van sodanige party toe te laat om partypolitieke aktiwiteite by 'n skool gedurende skooltyd te bedryf.

12. Verantwoordelikhede van die skoolhoofde

Prinsipale van openbare skole, soos per artikel 12 93) van die SASW, moet altyd optree op 'n wyse wat die waardes van die grondwet en die oppergesag van die wet bevorder en handhaaf. Deur dit te doen, sal hulle, o.a.

  1. die Departementshoof in die beheerliggaam verteenwoordig wanneer hulle in amptelike hoedanigheid optree soos bedoel in artikel 23(1) (b) en 24 (1) (j) van die SASW;

  2. verseker dat die beleid en wetgewing geïmplementeer word;

  3. die beheerliggaam inlig aangaande beleid en wetgewing; en

  4. die Onderwyshoof inlig aangaande enige verbrekings van die bepalings van enige wetgewing wat die onderwys reguleer.
13. Enige verlof wat deur die prinsipaal of die skoolbeheerliggaam toegestaan is vir die bedryf van enige van die verbode aktiwiteite soos in hierdie omsendbrief uiteengesit is, sal nie goeie regsgronde wees, of 'n geldige verskoning of beskerming in die wet regverdig nie, aangesien sodanige verlof onwettig sal wees ingevolge die toepaslike wetgewing.

14. Versuim om te verseker dat hierdie vereistes nagekom word, kan daarop uitloop dat dissiplinêre maatreëls ingestel kan word teen 'n prinsipaal wat oortree.

15. Bring asseblief die inhoud van hierdie omsendbrief onder die aandag van alle opvoeders en lede van die skoolbeheerliggaam.


GETEKEN: PA VINJEVOLD
HOOF: ONDERWYS
DATUM: 2013:11:22

Omsendbrief 76 van 1998  (grootte: 250 KB)
"South African Schools Act (SASA), 1996 (Act 84 of 1996)"  (grootte: 255 KB)
"Western Cape Provincial School Education, 1997 (Act 12 of 1997)"  (grootte: 61 KB)
"Basic Education Laws Amendment Act, 2011 (Act 15 of 2011)"  (grootte: 735 KB)